Roberta Vinci

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

La Vinci la tira 'n cōlp a 'l vōl a gl'US Open 2012


La Roberta Vinci (Tàrant, 18 ad Favràr dal 1983, a s lèś [roˈbɛrta ˈvintʃi] in Itagliàn) l'è na tenìsta pugléśa prufesiunìsta da 'l 1999.

L'è élta 163 cm e la péśa 60 chilo. La dróa al bras dèstar e la tira 'l arvèrs cun na maṅ sōla, da spés tajâ, un quèl dimóndi difìcil da védar in dal tènis dal fémni mudéran. L'è anc bòna ad śugàr i cōlp davśèṅ a la réda. L'è alenàda par Francesco Cinà e la stà a Palèrum in dua la fà anc gl'alenamènt.

Cun l'Itâglia l'à vins par tri vòlti la Fed Cup, na vòlta cun al Bélgi e par dū vòlti cun i Stat Unî.

Al 10 ad Luj dal 2013 l'è rivàda a èsar la nùm'r ùndas dal mónd in singulàr, mént'r in dópi, insém a la Sara Errani, l'è stada la nùmar òṅ da 'l déś ad Setémbar dal 2012. In dla sò caréra l'à mis in bisàca nóṿ tìtui WTA in singulàr, pardénd par sinc vòlti in finàl, una anc a gl'US Open dal 2015 cun la Flavia Pennetta. In bisàca la gh'à anc nóṿ tìtui ITF.

La Vinci l'à tacâ a śugàr a tènis quànd la gh'iva siē an ma l'è anc bòna ad śugàr bèṅ a balòṅ.

Caréra

Prim piàṅ dla Roberta Vinci
La pugléśa la s léva in sù par schisàr na bucìna
La Vinci tòlta śò in dal 2009
La Roberta a gl'Australian Open dal 2011
Na volée dla tarantìna
Òṅ di sò servìsi
L'itagliàna a Katowice in dal 2013
La Roberta a 'l Roland Garros dal 2013
La Vinci durànt al China Open dal 2014
La Vinci tiràda śò a Wimbledon 2015

La tarantìna, dòp avér mancâ la qualificasiòṅ a 'l turnèo WTA ad Róma, la vins in d'l Agóst dal 1999 al tìtul ITF ad Cùneo e in Setémbar qvél ad Lécce. In dal Luj dal 2000 la fà suo al turnèo in s'l èrba ad Felixstowe (Régn Unî), ITF da vintsìnc-mila dòlar. In dal 2001 la sa spòsta in Vietnam par śugàr un ITF e la riva incóra in finàl ma 'sta vòlta la la pèrd cun la cinéśa Na Li par 4-6 5-7. In Luj l'ardópia al tìtul a Felixstowe. In Agóst la n pasa briśa 'l qualificasiòṅ a Turònt (6-3 2-6 0-6 da la rusa Anastasija Myskina) tut al cuntràri a gl'US Open in dua però pò la céd a 'l prim tùran a la śluvàca Martina Suchá. In Setémbar la pòrta a cà la sò prima partìda in un turnèo WTA a Bali (2-6 6-1 6-0 a l'austragliàna Annabel Ellwood) e la sèra 'l an a la puśisiòṅ 172 dal mónd.

La vèra al 2002 mancànd al qualificasiòṅ in di prim quàtar turnèo WTA śugâ. A Doha la i pasa par pò cédar subìt a la Tathiana Garbin par 3-6 6-4 5-7. In Avrìl la bat la Sofia Arvidsson in dal sò prim incóntar ad Fed Cup. In Śugn la riva in semifinàl a Taškent in dua la pèrd 6-7 6-7 cun la Tat'jana Puček.

In dal Śnar dal 2003 la śōga in Sardéggna 'l ITF 'd Urtiśèi da sinquànta-mila dòlar. Lè l'è bòna ad bàtar la Flavia Pennetta 2-6 7-6 6-3 ma minga la Mara Santangelo ch'la la manda a cà a 'l tèrs tùran par 6-2 6-1. In Śugn la pasa 'l qualificasiòṅ a Birmingham e 'l prim tùran cun l'Alicia Molik par 6-2 3-6 6-3 prima ad far al valìś cun la Tamarine Tanasugarn. La fà secónd tùran anc a Palèrum, cun na partìda vinsa cun l'Iveta Benešová e una pardùda cun la Katarina Srebotnik. La stmana dòp la fà na figùra da ciòld in d'l ITF ad Mòdna da sinquànta-mila dòlar andànd fóra subìt. In Utóbar invéci la n śbàlia gnanc un cōlp in d'l ITF ad Latìna e la fà arbasàr la crésta anc a la Galina Voskoboeva in finàl par 6-3 6-4. La pugléśa la sprava ad vìnsar anc la finàl ad Poitiers ma la Karolina Šprem la gh mét i spróc in mèś a 'l ródi purtànd la partìda da la sò banda par 6-4 7-5.

L'inìsi dal 2004 l'è deludènt asè, sōl a Bùdapest la pasa 'l prim tùran ma pò la pèrd par 2-6 6-1 6-7 da la Jelena Janković. In Maǵ la pasa 'l qualificasiòṅ a 'l Roland Garros par pò cédar in dū sét a l'Elena Bovina. A Birmingham la riva in di utàṿ dand la paga a la Marija Kirilenko e a la Nathalie Dechy ma pò la n gh la cava minga a bàtar la nùmar 319 dal mónd, l'Anne Kremer. In Itâglia la tōś part a 'l WTA ad Palèrum (secónd tùran cun l'Anabel Medina Garrigues) e a 'l ITF ad Mòdna (quàrt cun la Kirsten Flipkens). In Istâ la sa spòsta in di Stat Unî par śugàr al qualificasiòṅ di US Open e la gh la cava a pasàr-i ma pò la và a cà subìt p'r òpra dla Patty Schnyder. La sèra 'l an pardénd subìt in d'l ITF ad Poitiers da la Nastas'sja Jakimava e acsè la rèsta a 'l 115śum pòst dla clasìfica WTA.

Al prim turnèo ch'la śōga in dal 2005 'l è qvél ad Tokyo. Lè l'è bòna ad bàtar l'Ai Sugiyama par 2-6 6-3 6-2 ma pò la vèṅ sćiancàda 0-6 2-6 da cl'atra giapunéśa, la Shinobu Asagoe. A Doha la và fóra subìt in tri sét par maṅ dla Conchita Martínez. Dòp avér mis in bisàca 'n àtar tìtul ITF in Frància a Dinan, la rénd ciàr ch'la fà pròpria fadìga a digerìr la Bovina parchè la gh pèrd incóra in dal secónd tùran dal turnèo ad Róma par 5-7 2-6. A gh và méj a Eastbourne cun di atri rusi, al fòrti Vera Zvonarëva e Anastasija Myskina, che lē la bat in dū sét par rivàr in semifinàl e pèrdar pò p'r un pēl cun la Vera Duševina par 6-2 6-7 3-6. A Wimbledon la céd a 'l tèrs tùran a la Kim Clijsters mént'r a Palèrum la s férma in di quàrt cun la Flavia Pennetta par 1-6 6-4 6-7. A la fiṅ 'd Agóst la pèrd subìt a gl'US Open cun la nùmar tri dal mónd, la francéśa Amélie Mauresmo. In Setémbar la riva in di quàrt a Pòrtrōś (5-7 6-7 da la Klára Zakopalová) e in Lussembûrgh (7-5 3-6 4-6 da la Dinara Safina). A Śurîg la pasa 'l qualificasiòṅ par pò cédar a la Francesca Schiavone 7-5 2-6 1-6. La pugléśa la finìs 'l an a la puśisiòṅ quarànt'òṅ.

I prim dū turnèo austragliàṅ dal 2006 a Gold Coast e a Canberra i vànan mâl, cun la pugléśa ch'la pèrd subìt cun la Na Li 4-6 0-6 e a 'l secónd tùran cun la giapunéśa Aiko Nakamura 5-7 0-6. A gl'Australian Open la dà prima un daśpiaśēr a cal grintèṅ dla Marion Bartoli, paràda via cun al puntéǵ ad 6-4 3-6 6-3, e pò la vèṅ sćiancàda par 1-6 2-6 da la Kim Clijsters, nùmar dū dal mónd. Dòp un prim tùran a Antwerp (3-6 3-6 da l'Ana Ivanović), la tōś part in Favràr a 'l turnèo dal Qatar. A Doha la bat subìt la tèsta ad série nùmar sèt dal tablòṅ, l'Elena Lichovceva, ma pò la gh'à da cédar a 'l tèrs tùran a l'Amélie Mauresmo par 4-6 0-6. Da Mars a Śugn la vins sōl 'n incóntar, la gh'à da spétar Palèrum par turnàr a śugàr bèṅ dabòṅ. In Sicìglia la bat una a drē a cl'atra la Kaia Kanepi par 7-5 6-4, la Klára Zakopalová par 6-2 7-6 e l'Aravane Rezaï par 6-3 5-7 6-1 ma pò la fà 'l valìś cun la carta salvàdga Tathiana Garbin par 2-6 2-6. In Lussembûrgh la cata n'atra itagliàna, la Francesca Schiavone, ch'la la manda a cà a 'l secónd tùran. Dòp tri ITF andâ mâl, la in śōga 'n àtar a Milàṅ a la fiṅ 'd Nuvémbar. Dòp avér fat al pēl e al còntarpēl a la Giulia Gatto-Monticone (6-0 6-0 al puntéǵ), la pugléśa la dà 'n daśpiaśēr anc a la Tathiana Garbin in semifinàl baténd-la 6-1 3-6 6-4 e pò la vins al tìtul avénd-ag la méj par 6-2 6-4 cóntar la giurgiàna Margalita Chakhnashvili. Anc cun cal turnèo chè in bisàca, la Vinci la và fóra listés da 'l primi sènt dal mónd.

'L inìsi dal 2007 par lē l'è pèś d'l an prima, cun tri prim tùran ad fila in Austràglia, cun la Vinci ch'la cróda śò a 'l 119śum pòst dal ranking. Pasànd p'r al qualificasiòṅ la pugléśa la riva in di quàrt a Tokyo (1-6 2-6 da l'Elena Dement'eva) e pò la vins al turnèo ad Bugutà amprufitànd-as dal bandòṅ in dal tèrs sét dla Tathiana Garbin quànd l'éra avànti 3-0. Invéci ad tōr al cuć par spinś'r-as più in élt, la Roberta la s indurménsa incóra in Primavéra quànd la mét in fila, da Indian Wells a Birmingham, siē scunfìti ad fila. A 'S-Hertogenbosch finalmènt la s fà 'n bcòṅ sōl dla Bovina (6-0 6-4) ma pò la céd a l'Al'ona Bondarenko par 6-7 3-6. Fra Wimbledon, Palèrum, Bad Gastein, Turònt, Forest Hills e US Open la Vinci la vins sōl dū incóntar pardénd-an siē, cun la Patty Schnyder, la Karin Knapp, l'Anna-Lena Grönefeld, la Svetlana Kuznecova, la Meilen Tu e la Marija Šarapova. La pugléśa la śgranfgna listés al 63śum pòst.

In dal primi déś stmani dal 2008 la śōga sōl un turnèo, al Gran Slam ad Melborne, e la gh pèrd subìt da la Virginia Ruano Pascual par 4-6 4-6. Cun i punt giapunéś e culumbiàṅ d'l an prima ch'i gh faṅ ciào, par la pugléśa i s vèr'n i us d'l Infèran dal sircùit ITF parchè in cal méntar l'éra śliciàda śò a 'l 218śum pòst. La prima śugadōra ch'la cata a Latìna l'è la canària Carla Suárez Navarro ch'la gh dà śò 'l péni par 6-3 6-1. Anc chi àtar ITF i vànan mâl asè, a part qvél ad Sant Malò in dua la bat l'Urszula Radwańska par pò cédar in di quàrt a la Renata Voráčová par 3-6 6-7. In Avrìl la và a śugàr al WTA ad Praga in dua la riva in di quàrt baténd 6-2 6-0 la carta salvàdga Kristýna Plíšková e 6-4 6-4 la Jill Craybas prima ad lasàr strada a la Vera Zvonarëva par 1-6 2-6. In tut al manéri, cun i ssanta punt mis in dal bisachèṅ, la Vinci la s tira sù ad trénta puśisiòṅ. A Róma i gh daṅ na carta salvàdga e lē la fà secónd tùran dand la paga a la Kaia Kanepi 6-4 4-6 6-0 ma finénd pò scunfìta da l'Agnieszka Radwańska in tri sét. Anc a Palèrum i gh dànan na carta salvàdga ma la pardénta furtunàda Anastasija Pavljučenkova la gh dà al bèṅsarvî 7-5 6-3. La pugléśa la và a catàr cunfòrt e punt (182) in di US Open parchè prima la pasa 'l qualificasiòṅ e pò la dà la paga a la francéśa Stéphanie Cohen-Aloro 6-1 6-4 prima ad chinàr al cupét cun la Dinara Safina par 4-6 3-6. In Setémbar la fà suo 'l ITF in sal dûr ad Shrewsbury e acsè la tórna in dal primi sènt dal mónd, finénd pò 'l an da nùmar utànta-tri.

In dal 2009 la vins al qualificasiòṅ a Brisbane e pò la fà secónd tùran faghénd sudàr l'Ana Ivanović ch'la la spunta 6-7 7-5 6-1. A gl'Australian Open la fà incóra na vòlta na figùra da ciòld cun la Carla Suárez Navarro andànd fóra in dal prim incóntar. In Mèsic la śōga a Acapûlc e a Monterrey faghénd sèmpar secónd tùran, stés quèl anc in sal cimènt 'd Indian Wells in dua la bat l'Ayumi Morita e la pèrd da la Sybille Bammer. La Vinci la śōga bèṅ in Avrìl in Spaggna faghénd i quàrt a Marbella (6-3 3-6 6-7 da la nùmar quàtar dal mónd, la Jelena Janković) e vinsénd al tìtul a Barcelóna baténd in dal sò parcōrs la Pauline Parmentier 6-4 7-6, la Flavia Pennetta 6-1 6-2, la Nastas'sja Jakimava 6-3 6-3, la Francesca Schiavone 0-6 7-6 6-4 e la Marija Kirilenko 6-0 6-4. A Fès però la Polona Hercog la gh fà 'l śgambét a 'l secónd tùran dòp avér-ag pardû par dū vòlti in dal 2008. In Maǵ la và fóra subìt a Róma da la Kateryna Bondarenko faghénd védar ch'la patìs dimóndi śugàr in dal turnèo ad cà. Da nùmar sinquànta-sinc dal mónd la śōga 'l qualificasiòṅ a Madrid pasànd-i ma pò la céd a 'l secónd tùran a la Vera Duševina par 6-4 1-6 4-6. A 'l Roland Garros la pésca subìt la Viktoryja Azaranka e la n gh'à mia scamp (6-4 6-2 al puntéǵ par la bielurùsa, nùmar nóṿ dal mónd). In s'l èrba la pòrta a cà i utàṿ a Birmingham (1-6 4-6 da la Yanina Wickmayer) e 'n tèrs tùran a Wimbledon (3-6 4-6 da la Serena Williams). A Palèrum, Pòrtrōś, Cincinnati e Turònt la riva a 'l secónd tùran, pèś a New Haven e a gl'US Open in dua la sparìs subìt, anc se cun di pès grôs cuma l'Agnieszka Radwańska e la Jelena Janković. A 'ndàr a la fiṅ d'l an la bat sōl la Flavia Pennetta (nùmar déś dal mónd) a Tokyo e la Kateryna Bondarenko in Lussembûrgh, srand la stagiòṅ a la puśisiòṅ ssanta-quàtar.

In dal 2010 la vèra 'l an śugànd a Brisbane. A 'l prim tùran la gh'à la méj su la Sara Errani par 6-4 2-6 6-2 ma pò la và a gambi a l'élta cun l'Anastasija Pavljučenkova par 6-1 4-6 1-6. La sa spòsta pò a Melbourne ma per lē gl'Austalian Open i finìsan a 'l tèrs tùran cun la Marija Kirilenko. In di Stat Unî (Indian Wells e Miami) la mét in fila incóra dū tèrs tùran, vgnénd batùda par la Yanina Wickmayer e la Venus Williams. La taca la stagiòṅ in sla tèra batùda in Spaggna dimóndi mâl a Marbella (prim tùran cun la Carla Suárez Navarro ch'la la bat 6-4 6-0) ma pò a Barcelóna l'è bòna ad rivàr in finàl (1-6 1-6 da la Francesca Schiavone). In sal rós la n diś pò piò la sua, catànd sù sōl di prim e secónd tùran. A 'S-Hertogenbosch e a Wimbledon la bat la Barbora Záhlavová-Strýcová e la Sybille Bammer pardénd invéci cun la Justine Henin e l'Anastasija Pavljučenkova. La taca la stagiòṅ in sal dûr a Cincinnati in dua la và fóra subìt cun la Dinara Safina e pò la pasa sōl un tùran a Montreal, batùda par 6-4 6-3 da la Bethanie Mattek-Sands. A New Haven la n pasa minga 'l qualificasiòṅ cun l'Elena Vesnina mént'r in di US Open la cata subìt la Venus Williams ch'la la spasa via par 6-4 6-1. In Setémbar la riva in di utàṿ a Tokyo (4-6 0-6 da la nùmar quàtar dal mónd, la Vera Zvonarëva). A Pechîn la manda a cà la Svetlana Kuznecova par 6-3 2-6 6-3 ma a 'l secónd tùran la fà 'l valìś cun la Vera Duševina. La finìs 'l an bèṅ, cun na semifinàl a Linz (3-6 5-7 da l'Ana Ivanović dòp avér batû in di quàrt la Sara Errani 5-7 6-3 6-4) e al tìtul dal turnèo dal Lussembûrg in dua la mét in riga la Sofia Arvidsson 6-4 7-6, la Barbora Záhlavová-Strýcová 7-6 4-6 7-6, la Kirsten Flipkens 7-6 6-1, l'Anne Keothavong 6-4 6-2 e la Julia Görges 6-3 6-4.

La Roberta la partìs in dal 2011 vinsénd cun la Christina McHale a Brisbane ma a 'l secónd tùran la s férma in dū sét cun la Dominika Cibulková. A Hobart la riva in di quàrt, mâl invéci a Melbourne in dua la và fóra subìt a òpra dla nùmar 134 dal mónd, l'austragliàna Alicia Molik, carta salvàdga. A Pattaya City la bat 7-5 6-3 l'Ana Ivanović in di quàrt ma pò la pèrd par 1-6 4-6 da la Sara Errani. A Dubai e a Doha la và fóra prèst, pardénd da 'l rusi Vera Zvonarëva e Nadia Petrova. A Indian Wells, Miami, Marbella e Stucàrda la pèrd subìt ma a Barcelóna la vins lē, 4-6 6-2 6-2 in finàl a la Lucie Hradecká. A Madrid la fà sudàr in di utàṿ la Na Li prima ad pèrdar sèg 6-2 2-6 1-6. A Róma la gh'à da bandunàr a 'l prim tùran cun la Sara Errani quànd l'éra sóta 2-6 0-1. A 'l Roland Garros la bèca a 'l tèrs tùran la ghignóśa Viktoryja Azaranka pardénd-ag 3-6 2-6. Dòp un prim tùran a Birmingham, in Śugn la fà suo al turnèo ad 'S-Hertogenbosch baténd via via la Polona Hercog 6-4 6-2, l'Alexandra Dulgheru 6-2 6-1, la Yanina Wickmayer 6-4 6-4, la Dominika Cibulková 7-5 6-1 e la Jelena Dokić 6-7 6-3 7-5. Cun cal sucès chè in sl'èrba, la tarantìna la gh la cava a vìnsar almànc un tìtul in tut al superfìsi. A Wimbledon la riva a 'l tèrs tùran pardénd da la nùmar òt dal mónd, la Petra Kvitová, par 3-6 3-6. In Luj a riva par lē 'n àtar tìtul a Bùdapest. In Ungherìa la bat la Zuzana Kučová in di quàrt par 4-6 7-6 6-3, la Klára Zakopalová in semifinàl par 6-4 6-4 e l'Irina-Camelia Begu in finàl par 6-4 1-6 6-4. A Palèrum la pèrd sèg invéci a 'l secónd tùran, cun la ruména ch'la gh'à la méj par 6-4 6-3. In Agóst a Turònt la mét in riga la Yanina Wickmayer 6-4 6-2, la nùmar òṅ dal mónd Caroline Wozniacki 6-4 7-5 e l'Ana Ivanović 7-6 6-2 par pò pèrdar da la Samantha Stosur 4-6 1-6. In di US Open la céd a 'l tèrs tùran a l'Andrea Petković par 4-6 0-6. La finìs 'l an cun un secónd tùran a Pechîn e dū prim tùran a Mósca e a Bali.

In d'l inìsi dal 2012 la Vinci la pòrta a cà pôc, un prim tùran a Sydney (5-7 2-6 da la Daniela Hantuchová) e dū secónd tùran a Auckland (3-6 4-6 da l'Elena Vesnina) e a Melbourne (4-6 2-6 da la Jie Zheng). A Parì a 'l quèrt la bat la Simona Halep par 6-4 6-4 e cla tèsta calda dla Bethanie Mattek-Sands par 6-3 1-6 6-3. In di quàrt però la lasa strada a la śugadōra ad cà Marion Bartoli che però la trìbula dimóndi par far suo 'l incóntar 4-6 6-4 7-6. A Acapûlc la tarantìna la céd in semifinàl a la Sara Errani 4-6 1-6, mént'r a Indian Wells e a Miami la pèrd da dū pès da nuànta cuma la Marija Šarapova e la Serena Williams, faghénd in tut al manéri utàṿ e tèrs tùran. A Barcelóna e a Stucàrda la fà secónd e prim tùran, ciapànd dal scòpli da la Simona Halep e da l'Angelique Kerber. A Esturìl la riva in semifinàl baténd la Nadia Petrova ma pò la céd a l'èstuna Kaia Kanepi par 2-6 5-7. A Madrid la pèrd in di utàṿ cun l'Agnieszka Radwańska 6-7 4-6 ma a Róma a riva incóra un prim tùran, 4-6 6-2 2-6 da la Karin Knapp, stès quèl anc a 'l Roland Garros p'r òpra dla Sofia Arvidsson (2-6 6-4 3-6 al puntéǵ). Dimóndi méj par lē la stagiòṅ in sl'èrba cun i quàrt a Birmingham (3-6 7-5 4-6 da la Jie Zheng) e a 'S-Hertogenbosch (4-6 6-7 da la Kirsten Flipkens) e gl'utàṿ a Wimbledon (2-6 2-6 da la Tamira Paszek). La tórna a śugàr mâl in sla tèra rósa a Palèrum e a Båstad (secónd e prim tùran). A gl'Ulimpìadi ad Lóndra la cata subìt la bélga Kim Clijsters e la fà ciào. In Agóst la tōś part a 'l turnèo ad Montreal e lè la bat la Yanina Wickmayer, l'Ana Ivanović e l'Angelique Kerber prima ad pèrdar in di quàrt da la Lucie Šafářová 2-6 2-6. Dòp un secónd tùran a Cincinnati, la vins al tìtul ad Dallas sćiancànd la Bojana Jovanovski in semifinàl par 6-0 6-0 e baténd la Jelena Janković in finàl par 7-5 6-3. Ch'la fus in fórma, la pugléśa la 'l fà védar anc in di US Open, turnèo in dua la dà la paga a l'Urszula Radwańska 6-1 6-1, a la Jaroslava Švedova 3-6 7-5 7-5, a la Dominika Cibulková 6-2 7-5 e a la nùmar dū dal mónd, l'Agnieszka Radwańska, 6-1 6-4. In di quàrt però la gh'à la pèś cun la sò cumpàgna ad dópi, la Sara Errani, par 2-6 4-6. A Tokyo la tarantìna la gh riva da nùmar sédas dal mónd e la s férma in di utàṿ a òpra dla Viktoryja Azaranka par 4-6 2-6. La Roberta la finìs 'l an rivànd in di quàrt in Lussembûrg (6-7 4-6 da la Venus Williams).

La tenìsta pugléśa la vèra al 2013 pardénd subìt a Brisbane da la Jarmila Gajdošová, carta salvàdga austragliàna, ma a Sydney l'è bòna ad far fóra la Nadia Petrova e la Jelena Janković prima ad cédar a l'Agnieszka Radwańska in di quàrt. A gl'Australian Open la buta a gl'urtìghi un match point cun l'Elena Vesnina e la céd acsè a la rusa par 6-4 6-7 4-6 a 'l tèrs tùran. A Parì a 'l quèrt la sćiànca la Simona Halep par 6-0 6-3 ma in di utàṿ la s férma 6-4 1-6 3-6 cun la Mona Barthel, pò vinsidōra dal turnèo. In Favràr in Dubai la manda a cà subìt la Svetlana Kuznecova par 6-3 6-2 e pò dū top déś cuma l'Angelique Kerber e la Samantha Stosur, sèmp'r in dū sét. In semifinàl però la pèrd incóra da la sò amìga Sara Errani par 3-6 3-6. A Miami la śōga un turnèo lung e fadigōś tacànd cun al bàtar, dòp un bye, l'americàna Christina McHale par 6-7 6-1 6-3 e pò la Carla Suárez Navarro par 5-7 6-4 6-4. In di utàṿ la gh la cava incóra a 'rbaltàr na partìda tacàda mâl cun l'Alizé Cornet, mandàda a cà par 2-6 6-4 6-4. In di quàrt però al miràcul al n gh vèṅ minga e la pugléśa la gh'à da cédar a la Jelena Janković par 4-6 7-6 3-6. In Avrìl la Roberta la tōś part a 'l turnèo nóṿ ad Katowice in Pulògna. In di quàrt la bat la Karolína Plíšková 6-1 6-0 e cun al stés puntéǵ anc l'Annika Beck in semifinàl. In finàl la cata la nùmar òt dal mónd, la céca Petra Kvitová, e la la bat par la prima vòlta in caréra par 7-6 6-1, vinsénd in cla manéra chè al tìtul e rivànd a èsar la nùmar dódas dal mónd. Dū stmani dòp la la bat incóra in dla semifiàl ad Fed Cup śugàda a Palèrum e la fà cumpàgn anc cun la Lucie Šafářová, dand acsè al punt deciśìṿ a l'Itâglia. A Stucàrda e a Madrid la paga la fadìga, andànd fóra subìt. A Róma invéci la riva a 'l tèrs tùran dand la paga a l'Elena Vesnina, tribulànd dimóndi, e a la Nastassja Burnett par pò lasàr strada a la rivelasiòṅ Simona Halep par 4-6 2-6. A 'l Roland Garros la Vinci la riva in di utàṿ, batùda par 1-6 3-6 da la Serena Williams. A 'S-Hertogenbosch la cata incóra la Halep ch'la la sćiànca 6-0 6-1 a 'l secónd tùran. In Śugn la riva in di utàṿ anc a Wimbledon, ciapànd però pò la paga da Na Li. In Luj la s pòrta a cà al turnèo ad cà ad Palèrum baténd in finàl la Sara Errani, dòp avér-ag pèrs par sinc vòlti ad fila, par 6-3 3-6 6-3. A la fiṅ 'd Luj la riva in di quàrt a Carlsbad baténd la Bethanie Mattek-Sands par 6-4 6-2 ma pò la gh'à da pigàs-'s a l'Ana Ivanović par 1-6 7-6 2-6. A Turònt la bat la Julia Görges e l'Ekaterina Makarova prima ad pèrdar cun la Dominika Cibulková par 3-6 6-7. A Cincinnati la riva in di quàrt (0-6 4-6 da la Jelena Janković) dòp i sò sucès cun la Bethanie Mattek-Sands, l'Andrea Petković e la Sara Errani. A gl'US Open la gh'à incóra l'ucaśiòṅ ad rivàr in dal primi déś dal mónd parchè la riva in di quàrt baténd la Tímea Babos, la Lucie Šafářová, la Karin Knapp e la Camila Giorgi, a gh cala sōl un sucès ma la pèrd da la Flavia Pennetta par 4-6 1-6. La Roberta la s pōl tiràr sù vinsénd a la fiṅ d'l an la Fed Cup cóntar la Rùsia vinsénd a fadìga 'l sò singulàr cun l'Aleksandra Panova par 5-7 7-5 8-6.

'L inìsi dal 2014 'l è 'n arbgàt par la Vinci ch'la pèrd siē pardìdi 'd fila cun l'Ana Konjuh, cun la Sara Errani, cun la Jie Zheng, cun l'Elina Svitolina, cun la Cvetana Pironkova e cun la Sorana Cîrstea. Quànd finalmènt la bat la Madison Keys a Indian Wells par 6-3 6-3, durànt l'intervìsta la s mét a piànśar ma la stagiòṅ la cuntìnua mâł par lē. A Esturìl la pèrd da l'Elena Vesnina in di quàrt par 6-7 6-4 5-7 pò a Madrid la riva a 'l tèrs tùran baténd la Caroline Wozniacki par 6-3 6-3 ma pardénd fàcil da l'Agnieszka Radwańska par 1-6 1-6. A Róma, a 'l Roland Garros, a Eastbourne e a Wimbledon i rìv'n àtar quàtar prim tùran. In Luj a Bùcarest la tórna a śugàr na finàl WTA ma la la pèrd par 1-6 3-6 cun la Simona Halep. La stmana dòp la sa spòsta in dal cimènt 'd Ìstanbul e anc chè la riva in finàl pardénd-la cun la Caroline Wozniacki par 1-6 1-6. La pugléśa la partìs pò par śugàr i turnèo dal Nòrd Amèrica a Turònt, a Cincinnati e a New Haven ma la mùcia sù sōl al briśi, tri prim tùran cun la Barbora Strýcová, cun la Sabine Lisicki e cun l'Ekaterina Makarova. A gl'US Open la riva a 'l tèrs tùran (4-6 3-6 da la Shuai Peng) e acsè la cróda śò in clasìfica a 'l 44śum pòst. Prima dla fiṅ d'l an la s fà nutàr a Pechîṅ in dua la bat la Jaroslava Švedova par 6-2 2-6 6-1, l'Agnieszka Radwańska par 6-4 6-4 e l'Ekaterina Makarova par 6-1 0-6 7-5 prima ad lasàr strada in di quàrt a la Petra Kvitová.

La pugléśa la vèra 'l 2015 pardénd subìt a Auckland da la Coco Vandeweghe e pò faghénd i quàrt a Hobart (6-7 2-6 da l'Heather Watson). Dòp soquànt prim e secónd tùran la riva in di utàṿ a Madrid in dua la céd in tri sét a la Lucie Šafářová. A Nurimbèrga la pèrd la finàl cun la Karin Knapp par 6-7 6-4 1-6 ma in séguit la fà quàtar prim tùr'n ad fila a 'l Roland Garros (6-4 4-6 1-6 da l'Alizé Cornet) e in di turnèo ingléś su l'èrba. A Bùcarest (utàṿ cun l'Aleksandra Krunić) e a Ìstanbul (quàrt cun la Magdaléna Rybáriková in dua la buta a gl'urtìghi un match point) la fà pèś d'l an pasâ e la cróda śò a 'l 58śum pòst in clasìfica. A Turònt però la Roberta la céd sōl in di quàrt a la Serena Williams par 4-6 3-6, pò la bat l'Eugenie Bouchard a New Haven par 6-1 6-0, dòp avér pardû al prim śōg d'l incóntar, mént'r a 'l secónd tùran la falìs tri match point cun la Caroline Wozniacki e la gh pèrd par 4-6 7-6 6-7. A gl'US Open la Vinci la dasfrùta un bèl tablòṅ par rivàr in di utàṿ baténd la Vania King par 6-4 6-4, la Denisa Allertová par 2-6 6-3 6-1 e la Mariana Duque Mariño par 6-1 5-7 6-2, pò l'Eugenie Bouchard la strabùca da par lē baténd la tèsta e la n è mia bòna 'd śugàr. La pugléśa la s cata acsè sénsa fadìga in di quàrt in dua la bat la Kristina Mladenovic par 6-3 5-7 6-4 ma in semifinàl la s cata la Serena Williams ch'in cà sua la vōl vìnsar al “Gran Slam” in na stagiòṅ in dua l'à pardû sōl dū vòlti, cun la Petra Kvitová a Madrid e cun la Belinda Bencic in dla Rogers Cup. Inóltar in di quàtar precedènt sèg la n à mai vins un sét in dua al màsim l'à fat sù quàtar śōg. Dòp és'r andàda avànti par 2-1 e servìsi, la pugléśa l'è custréta a cédar la prima partìda par 2-6 ma pò la gh dà dènt'r e la manda a cà la nùmar òṅ dal mónd par 2-6 6-4 6-4. In finàl però la Roberta la pèrd cun la Flavia Pennetta par 6-7 2-6 ma in tut al manéri la gh la cava a tùrnar in dal primi vint śugadōri a 'l mónd.

Sucès in dópi

In dópi la tenìsta pugléśa l'è stata bòna ad vìnsar vint-sinc tìtui, vint-a-dū insém a la sò amìga Sara Errani. Sèg l'à anc purtâ a cà anc al “Career Grand Slam” avénd vins fra 'l 2012 e 'l 2014 tut i tìtui Slam, sinc in tut.

Finàli in di Gran Slam

Turnéo An Vins/Pardû Aversàri in finàl Puntéǵ
US Open 2015 P Flavia Pennetta 6-7 2-6

Culegamènt estéran