Denisa Allertová
|
C'l artìcul chè 'l è scrit in
Miranduléś |
.jpg)
La Denisa Allertová (Praga, 7 ad Mars dal 1993) l'è na tenìsta céca. L'è élta 180 cm, la péśa 65 chilo, la dróa 'l bras dèst'r e la tira 'l arvèrs a dū maṅ.
In dla sò caréra l'à vins nóṿ tìtui ITF rivànd a èsar la nùmar sinquànta-sèt dal mónd al 28 ad Setémbar dal 2015 quànd l'è rivàda in finàl in dal turnèo WTA ad Cantòn pardénd però da la Jelena Janković par 2-6 0-6.
Caréra
_(18687778793).jpg)
La Denisa la s fà nutàr par la prima vòlta in dal 2011 quànd la riva in di quàrt in d'l ITF da sènt-mila dòlar ad Praga. 'L an dòp la vins al sò prim tìtul a Antàglia, al nùmar trént'òṅ, ITF da déś-mila dòlar.
La taca a la stésa manéra anc al 2013 vinsénd subìt a Sharm el-Sheikh. In Agóst la riva in di quàrt a Bad Saulgau, pardénd par 1-6 4-6 da la Patricia Mayr-Achleitner, e pò la fà incóra méj in 'n àtar ITF da vintsìnc-mila dòlar in dal Bélgi baténd l'Antonia Lottner par 6-1 6-3 e la Bernarda Pera par 6-1 7-6 prima 'd céd'r in semifinàl par 3-6 3-6 a la Kateřina Siniaková. La sèra la stagiòṅ a la puśisiòṅ 327 dal mónd.
In dal 2014 la partìs a raś faghénd suo gl'ITF òt e nóṿ a Antàglia. Sèmp'r in Turchìa la fà tris vinsénd anc qvél da sinquànta-mila dòlar 'd Ìstanbul śugâ in Avrìl. In Śugn la in vins àtar dū in Ungherìa pò in Luj la śōga dū finàli 'd fila in dla Repùblica Céca pardénd in tri set da la Petra Cetkovská a Olomouc e vinsénd invéci a Plzeň. In Setémb'r in Ulànda a riva par lē al sètim tìtul ITF d'l an quànd la bat la Teliana Pereira a Alphen aan den Rijn. A s pōl pròpria dir che la Denisa la gh dà dèntar dimóndi e difàti in Utóbar la s fà strada in dal turnèo WTA dal Lussembûrgh baténd la Sabine Lisicki par 7-5 6-2 e la Varvara Lepchenko par 4-6 6-3 7-5 prima 'd èsar però scanślàda in semifinàl da l'Annika Beck par 0-6 1-6.
In dal 2015 la pasa 'n tùr'n a gl'Australian Open ma a Katowice la và fóra subìt cun la Camila Giorgi ch'la la bat par 7-5 4-6 6-4. In Avrìl la riva in di quàrt a cà sua a Praga ma la pèrd 'l sò incóntar cun la Karolína Plíšková in tri set. A Wimbledon la céd a 'l secónd tùr'n a la Caroline Wozniacki mént'r a Bùcarest l'è l'Anna Karolína Schmiedlová a casàr-la fóra. In Agóst la śōga 'n ITF da stantasìnc-mila dòlar a Praga in dua la riva in finàl cun la María Teresa Torró Flor (3-6 6-7 al puntéǵ par la spagnōla). A gl'US Open la bat par la prima vòlta in caréra na Top 10, la Carla Suárez Navarro, prima 'd lasàr strada a la Roberta Vinci par 6-2 3-6 1-6. In Setémbar a Cantòn la fà fóra la Simona Halep par 6-4 6-3 e pò la Sara Errani par 7-5 6-2 e acsè la riva par la prima vòlta in na finàl 'd un turnèo WTA ma chè la ciàpa la paga da la Jelena Janković pardénd-ag 2-6 0-6. In Utóbar la riva in di quàrt a Linz (3-6 4-6 da la Kirsten Flipkens) e in di utàṿ in Lussembûrgh (5-7 2-6 da la Misaki Doi).
In dal 2016 l’Allertová la pasa dū tùr'n a Melbourne cun la Bethanie Mattek-Sands e cun la Sabine Lisicki prima 'd pigàr-'s a la Johanna Konta par 2-6 2-6. A Doha la bat l'Elina Svitolina ma minga l'Eugenie Bouchard.