Belinda Bencic

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


Un surìś dla Belinda Bencic


La Belinda Bencic (Flawil, 10 ad Mars dal 1997) l'è na tenìsta śvisra cun di urìgini śluvàchi. L'è élta 175 cm e la péśa 63 chilo, la dróa al bras dèstar e la tira 'l arvèrs a dū maṅ.

L'è stada la nùmar dódas dal mónd al 17 'd Agóst dal 2015 e in dla sò caréra l'à vins dū tìtui WTA e àtar tant ad qvéi ITF. L'à anc vins al tìtul ad Wimbledon di śōvan in dal 2013.

Caréra

La Belinda la taca a pistàr i camp da tènis dal sircùit ITF in dal 2011 a quatórd'ś an péna cumpiû e la riva subìt in di quàrt. 'L an dòp la vins dū ITF ad fila a Sharm el-Sheikh, i nùmar sèt e òt, dòp avér anc batû l'èx nùmar sédas dal mónd in dal qualificasiòṅ ad Bruxelles, l'Elena Bovina. In Lussembûrgh i gh dànan na carta salvàdga e la śvisra la śōga 'l sò prim turnèo WTA pardénd da la Venus Williams par 3-6 1-6.

In dal 2013 la riva in semifinàl in dū ITF da sinquànta-mila e da vintsìnc-mila sòlar, pò la śōga a Båstad e a Tokyo druànd dū carti salvàdghi. In Śvèsia la pèrd subìt da l'Anna Tatishvili par 6-2 4-6 4-6 mént'r in Giapòṅ la bat la Dar'ja Gavrilova prima 'd céd'r a la Petra Kvitová par 5-7 4-6. A Uśàka la pasa 'l qualificasiòṅ e la pasa anc 'l ustàcul Lauren Davis prima 'd lasàr strada a la Samantha Stosur. La stmana dòp la céd in finàl a la Zarina Dijas in 'n ITF da vintsìnc-mila dòlar. La sèra 'l an a la puśisiòṅ 212 dal mónd.

Un drit dla Śvisra
La Bencic tòlta śò in dal 2015 méntar la s tira sù la maja

In dal 2014 la Bencic la pasa 'l qualificasiòṅ a gl'Australian Open e la riva a 'l secónd tùr'n in dua la gh'à da pigàr-'s a la cinéśa Na Li. In Avrìl la riva in semifinàl a Charleston dand la paga a la Marija Kirilenko, a la Marina Eraković, a l'Elina Svitolina e a la Sara Errani prima 'd pigàr-'s a la Jana Čepelová. A Róma la fà sudàr la Flavia Pennetta ma pò la gh pèrd listés par 2-6 6-2 3-6 in dal secónd tùran dal turnèo. A Wimbledon la gh la cava a rivàr a 'l tèrs tùr'n in dua l'incróśa la nùmar tri dal mónd, la Simona Halep, ch'la gh'à la méj sèg par 6-4 6-1. A Ìstanbul e a Cincinnati la ciàpa la paga a 'l prim tùran, prima da la Caroline Wozniacki (0-6 0-6) e pò da la Karin Knapp (2-6 6-7). A gl'US Open però la śvisra la gh'à 'l diav'l adòs e par rivàr in di quàrt la spasa via la Yanina Wickmayer par 6-3 6-2, la Kurumi Nara par 6-4 4-6 6-1, l'Angelique Kerber par 6-1 7-5 e la Jelena Janković par 7-6 6-3. In sal più bèl però la ciàpa na patnàda da la Shuai Peng ch'la la manda a cà par 6-2 6-1. La sèra 'l an cun la finàl dal turnèo ad Tianjin, pardùda par 3-6 4-6 da l'Alison Riske, ch'la gh parmét ad rivàr a 33śum pòst dal ranking.

La Bencic la taca mâł al 2015 pardénd subìt cun la Dar'ja Gavrilova a Sydney (3-6 0-6), cun la Julia Görges a gl'Australian Open (2-6 1-6) e cun la Alizé Cornet a Anvèrsa (6-1 2-6 5-7). A Dubai la bat la Karin Knapp ma pò la vèṅ spasàda via da la Venus Williams par 1-6 2-6. A Doha la s férma subìt in dal qualificasiòṅ pardénd in tri sét da la Francesca Schiavone. Al prim turnèo minga lòfi ch'la fà 'l è qvél 'd Indian Wells in dua la riva in di utàṿ baténd la Caroline Wozniacki ma minga la Jelena Janković. La fà cumpàgn anc a Miami in dua la pèrd da la Sloane Stephens. A Stucàrda la s tōś l'arvìnsida cun la Julia Görges ma pò la và fóra a 'l secónd tùran cun la Carla Suárez Navarro. In di quàtar turnèo a vgnir śugâ in sla tèra rósa la vins sōl 'n incóntar. Tut' atra stòria in sl'èrba in dua la riva in finàl a 'S-Hertogenbosch (5-7 3-6 da la Camila Giorgi), la vins al Premier 'd Eastbourne (baténd lung la via la Mona Barthel, la Madison Keys, l'Eugenie Bouchard, la Johanna Konta, la Caroline Wozniacki e l'Agnieszka Radwańska) e la fà gl'utàṿ a Wimbledon pardénd cun la Viktoryja Azaranka par 2-6 3-6. In Agóst la fà védar tut al sò valōr vinsénd al Premier 5 ad Turònt in dua la bat quàtar dal primi siē śugadōri a 'l mónd (Caroline Wozniacki, Ana Ivanović, Serena Williams e Simona Halep), dand al secónd daspiaśēr d'l an a l'americàna e mandànd a cà dū finalìsti Slam cuma l'Eugenie Bouchard e la Sabine Lisicki. La Śvisra la fà 'l sò best ranking tucànd la puśisiòṅ dódas. A Cincinnati la bat l'Angelique Kerber e la Flavia Pennetta ma pò la gh'à da bandunàr dòp al prim sét pardû 2-6 cun la Lucie Šafářová. A gl'US Open la cata la strada stópa a 'l tèrs tùran cun la Venus Williams. La Belinda la gh dà dènt'r anc in dal Premier ad Tokyo parchè la bat la Samantha Stosur, la Garbiñe Muguruza Blanco e la Caroline Wozniacki prima 'd céd'r in finàl a l'Agnieszka Radwańska par 2-6 2-6. Praticamènt par la Bencic la stagiòṅ la finìs lè parchè la n stà minga bèṅ e la gh'à da bandunàr cun la Camila Giorgi a Wuhan e cun la Mirjana Lučić-Baroni a Pechîṅ, sénsa psēr śugàr gnanc 'l Elite Trophy ad Zhuhai.

Culegamènt estéran