Francesca Schiavone

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


Prim piàṅ dla Schiavone
La Schiavone tòlta śò durànt al Roland Garros dal 2011


La Francesca Schiavone (Milàṅ, 23 ad Śugn dal 1980, a s lèś [franˈtʃeska skjaˈvoːne] in Itagliàn) l'è na tenìsta itagliàna prufesiunìsta da 'l 1998, la sōla bòna ad vìnsar un turnèo dal Gran Slam, a Parì in dal 2010. La milanéśa l'è élta 166 cm e la péśa 64 chilo. Al sò scutmàj 'l è liunésa.

In dla sò caréra l'à purtâ a cà siē tìtui WTA su darsèt finàli śugàdi, rivànd anc a èsar la nùmar quàtar dal mónd, al 31 ad Śnar dal 2011. In tut l'à mis in bisàca da piò ad nóṿ migliòṅ ad dòlar, cavànd-gh-la a bàtar par déś vòlti dal tenìsti ch'i s catàv'n in di prim 10 pòst dla clasìfica, cuma al numri òṅ Justine Henin (Dubai 2008) e Amélie Mauresmo (Fed Cup 2006).

La Schiavone la preferìs śugàr in si camp ad tèra rósa e la dróa 'l arvèrs a na maṅ sōla, un quèl difìcil da védar in dal tènis dal fémni. Chris Fowler e Brad Gilbert i aṅ batśâ cal sò cólp lè "scùria dal cucér". L'è anc cgnusùda p'r i sîg ch'la tira quànd la culpìs la bucìna, ciamâ "grunting" in Ingléś, ch'i sarésan pò i vèrs dla bèstia ciamàda nimàl.

Al 23 ad Śnar dal 2011, śugànd cóntar la rusa Svetlana Kuznecova, l'à dâ vita a la partìda più lunga dla stòria di Gran Slam vinsénd-la 16-14 a 'l tèrs dòp 4 óri e 44 minùt ad śōg.

Caréra

La milanéśa a Auckland in dal 2010
La Francesca tòlta śò in dal 2012

Par la prima vòlta la s qualìfica p'r un turnèo dal Gran Slam (gl'US Open) in dal 2000, rivànd anc a 'l tèrs tùran. 'L an dòp la fà i quàrt a Parì e Róma e la semifinàl a Auckland, dvintànd acsè la nùmar vint-a-tri dal mónd.

In dal 2002 la n gh la cava briśa a rivàr in di utàṿ a Flushing Meadows parchè la s cata in sla sò strada la rusa Elena Bovina ch'la gh mòla lè un 7-6 6-4, mandànd-la a cà. A s véd ch'la Schiavone la n gh la cava pròpria minga a digerìr la Bovina parchè la rusa da spés la s fà un bcòṅ sōl ad lē, èsénd in vantàś 8-2 in di scòntar dirèt sèg.

Un cuć più in élt in clasìfica a gh al dà al turnèo ad Los Angeles dal 2003 (semifinàl pardùda cóntar la Kim Clijsters) e i quàrt a Flushing Meadows (vins da la Jennifer Capriati). La milanéśa la śgranfgna al quaturdicéśum pòst dal ranking WTA. Cun i utàṿ di Australian Open dal 2006 (śugâ cun la Kim Clijsters ch'la gh dà incóra la paga) la riva a far cumpàgn a 'l riśultâ più bèl p'r una tenìsta dal Bèl Paéś, 'l undicéśum pòst dla Silvia Farina Elia. Al 17 ad Setémbar la vins par l'Itâglia la Fed Cup a Charleroi, in cà dla Justine Henin e dla Kirsten Flipkens.

Dòp avér vins al sò prim tìtul in dal 2007 (a Bad Gastein cóntar l'Yvonne Meusburger par 6-1 6-4), in dal 2009 la taca a far dabòṅ. A Wimbledon la riva in di quàrt, pardénd da la rusa Elena Dement'eva, ma cavànd-gh-la a far fóra 'n òs dûr cuma la Marion Bartoli, chè finalìsta in dal 2007. A gl'US Open la pèrd a 'l tèrs tùran da la bielurùsa Viktoryja Azaranka (in alóra nùmar nóṿ dal mónd) ma in Utóbar la riva in finàl a Uśàka (pardénd da la Samantha Stosur) e la stmana dòp la s pòrta a cà al tìtul ad Mósca, 6-3 6-0 a l'Olga Govorcova. In Nuvémbar pò a riva anc na secónda Fed Cup, 4-0 cóntar i Stat Unî a Réś ad Calàbria. In dla squàdra itagliàna i gh'éran sèg anc la Flavia Pennetta, la Sara Errani e la Roberta Vinci. Chi lē la śugarà pò la finàla ad Barcelóna in d'l Avrìl d'l an dòp cóntar la milanéśa, pardénd-la cun al puntéǵ ad 6–1 6–1. In dal turnèo Francesca la mét in riga anc atri dū itagliàni: la parmśàna Alberta Brianti e la Tathiana Garbin.

Cla vìnsita lè la dimóstra ch'la Schiavone la gh'è in sla tèra rósa. Ma a Róma e a Madrid la n al fà minga védar, pardénd in di prim tùran prima da la María José Martínez Sánchez e pò da la Venus Williams in tri sét. A 'l Roland Garros però la śōga a di livèi élt, tacànd cun al bàtar facilmènt tri pès da nuànta cuma la Na Li 6-4 6-2, la Marija Kirilenko 6-4 6-4 e la nùmar tri dal mónd Caroline Wozniacki 6-2 6-3. In semifinàl la cata l'Elena Dement'eva. Dòp avér pardû al prim sét a 'l tie break, la rusa la gh dà sù e par la milanéśa a s vèra la pòrta dla sò prima finàla in un turnèo dal Gran Slam. La s para in frònt l'austragliàna Samantha Stosur, ch'l'iva péna fat fóra la Serena Williams, ma par lē a n gh'è gnint da far: a vins la Schiavone par 6-4 7-6. In dl'éra Open a n éra mai sucès che na śugadōra fóra da 'l primi déś la vinsìs a Parì. A trént'an sunâ, secónda tenìsta più vècia a far-al, la Francesca la dvénta la nùmar siē dal mónd.

L'istâ par lē l'è però 'n diśàstar: la và fóra subìt in sl'èrba 'd Eastbourne e ad Wimbledon e in di secónd tùran a Istanbul e a Cincinnati. A Montreal la vins dū partìdi, cóntar l'Ekaterina Makarova e cóntar na Dinara Safina crudàda śò dimóndi in cal méntar, ma pò la pèrd da la Caroline Wozniacki ch'la gh dà indrē al 6-2 6-3 patî a Parì. In Setémbar la nùmar tri dal seeding, l'americàna Venus Williams, la la para via da 'l turnèo di US Open in di quàrt par 7-6 6-4, faghénd-ag mandàr śò l'utàva scunfìta sèg in òt incóntar śugâ: la più vècia dal Williams l'è pròpria la sò bistiàsa négra. In Utóbar Francesca la gh la cava a śugàr al Masters e pò la finìs l'an pardénd la sò partìda dla finàl ad Fed Cup cóntar la Melanie Oudin ma l'Itâglia la bat listés i Stat Unî purtànd-'s a cà al sò tèrs tìtul.

In dal 2011, dòp avér batû a fadìga la rusa Svetlana Kuznecova 6-4 1-6 16-14, la riva par la prima vòlta in caréra in di quàrt di Australian Open ma la pèrd cun la danéśa Caroline Wozniacki par 6-3 3-6 3-6. Cun i punt purtâ a cà la dvénta la nùmar quàtar dal mónd, faghénd cumpàgn a Adriano Panatta. Al 2 ad Śugn la riva incóra in finàl a 'l Roland Garros, baténd la śugadōra ad cà Marion Bartoli par 6-3 6-3, ma la cinéśa Na Li, mandàda a cà fàcil 'l an prima, 'sta vòlta la gh fà magnàr la pólvra, vinsénd 6-4 7-6. La Francesca la strabùca in śò in clasìfica, turnànd a 'l sètim pòst. La luś la sa śmòrsa par lē: in 'n an la milanéśa la cata sù di prim e di secónd tùran in gir, purtànd a cà sōl al turnèo ad Straśbûrg cun un 6-4 6-4 a la francéśa Alizé Cornet. Quànd a 'l Roland Garros dal 2012 la pèrd a 'l tèrs tùran da l'americàna Varvara Lepchenko par 3-6 6-3 8-6, al sò pòst in clasìfica l'è al 27śum.

Francesca la s vòlta indrē dand n'uciàda a l'Azaranka

A Wimbledon la riva in di utàṿ faghénd sudàr, ma pardénd listés, la campiunésa d'l an prima Petra Kvitová par 4-6 7-5 6-1. 'L è un fōg ad paja parchè prima la pèrd a 'l prim tùran a Cincinnati da la Camila Giorgi par 1-6 3-6 e pò la và fóra subìt a gl'US Open, batùda da la śōvna Sloane Stephens par 3-6 4-6. In Setémbar la bat a Tokyo la Jaroslava Švedova 4-6 7-6 6-4 ma 'l è 'l ùlt'm incóntar vins in d'l an par lē parchè pò la cata sù sōl quàtar scunfìti da la Samantha Stosur, da la Na Li, da l'Ol'ga Pučkova e da l'Urszula Radwańska.

Al mumènt négar par lē al cuntìnua anc in dal 2013 cun àtar quàtar prim tùran ad fila: Hobart (6-2 3-6 6-7 da la Kirsten Flipkens), Australian Open (4-6 6-2 2-6 da la Petra Kvitová), Parì (6-7 2-6 da la Caroline Garcia) e Doha (6-7 3-6 da la Marion Bartoli). La riva in di quàrt a Acapûlc e la pèrd da la canària Carla Suárez Navarro. In di Stat Unî a Indian Wells e a Miami la mùcia sù dū secónd tùran, a n psénd far gnint cóntar la Marija Šarapova e l'Angelique Kerber. Anc a Charleston la pèrd mâl (6-3 4-6 6-7 da la Silvia Soler Espinosa) ma pò la tórna a vìns'r un tìtul WTA a Marrakesh dand la paga in finàl a la galisiàna Lourdes Domínguez Lino 6-1 6-3. Dòp tri turnèo da daśmindgàr a Esturìl, Madrid e Róma, la Francesca la tórna a far la vōś grôsa a 'l Roland Garros in dua la bat prima la Melinda Czink e la Kirsten Flipkens e pò la scanśèla da 'l camp la Marion Bartoli par 6-2 6-1. In di utàṿ però l'incrósa la Viktoryja Azaranka e la gh pèrd par 3-6 0-6, da 'l tri para in dal prim sét. Dòp i quàrt a Birmingham (7-6 4-6 6-7 da la Daniela Hantuchová, pò vinsidōra dal tìtul) e i prim tùran a 'S-Hertogenbosch e a Wimbledon, la milanéśa la śōga in Luj i turnèo americàṅ ad Stanford e ad Carlsbad andànd fóra a 'l secónd tùran ad òpra da 'l numri òṅ di tablòṅ, l'Agnieszka Radwańska e la Viktoryja Azaranka.

Finàli in di Gran Slam

Turnéo An Vins/Pardû Aversàri in finàl Puntéǵ
Roland Garros 2010 V Samantha Stosur 6–4, 7–6
Roland Garros 2011 P Na Li 4–6, 6–7

Culegamènt estéran