Magdaléna Rybáriková

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


La Magdaléna tòlta śò méntar la tira 'n servìsi a'l Roland Garros 2013


La Magdaléna Rybáriková (Bratiślàva, 4 'd Utóbar dal 1988) l'è na tenìsta śluvàca prufesiunìsta da 'l 2005. L'è élta 180 cm e la péśa 65 chilo.

A gh piàś dimóndi śugàr in sl'èrba e in sal cimènt. La dróa al bras dèstar e la tira 'l arvèrs a dū maṅ. Al film ch'a gh piàś da piò 'l è Pretty Woman. I quèi ch'la magna più luntéra i èṅ la pizza e al pui. La gh'à sèmpar sèg 'n ursét śugàtul ch'a sò dita al al gh pòrta bòṅ.

Al 22 ad Luj dal 2013 l'è rivàda a èsar la nùmar trénta-nóṿ dal mónd.

In dla sò caréra l'à vins quàtar tìtui WTA e sinc ad qvéi d'l ITF.

Caréra

La śluvàca la taca bèṅ al sò mistēr ad tenìsta in dal 2004 quànd la śōga tri turnèo ITF purtànd a cà un quàrt e dū semifinàli. In dal 2005 la in śōga dū in Egìt vinsénd-an òṅ. In Agóst la riva in finàl in qvél ad vinsinc-mila dòlar 'd Hechingen ma la pèrd par 4-6 3-6 da la Kirsten Flipkens. La gh và méj a Mèstar in Setémbar parchè là l'è bòna ad mét'r-as in bisàca 'n àtar tìtul.

In dal 2006 la riva in semifinàl a Cavriōl (2-6 7-6 3-6 da la Lucie Hradecká). In Maǵ la śōga i sò prim turnèo WTA a Praga (in dua da carta salvàdga la pèrd in di quàrt da la Shuai Peng par 5-7 4-6) e a Ìstanbul, in dua la bat in dal qualificasiòṅ l'Agnieszka Radwańska e la Sara Errani par pò pèrdar subìt da la Mashona Washington par 6-7 7-6 3-6.

In dal 2007 la fà sōl dū prim tùran in dal sircùit WTA méntar in qvél ITF la pèrd par tri vòlti cun la Petra Kvitová, dū vòlti in finàl e na vòlta in semifinàl. In dal 2008, dòp avér fat sù dū tìtui ITF in Mars e Avrìl, la riva a 'l secónd tùr'n a Praga (bandòṅ cun la Vera Zvonarëva), a 'l Roland Garros (0-6 1-6 da la Dinara Safina) e a Barcelóna (6-7 0-6 da la Stéphanie Cohen-Aloro). In Agóst la riva a 'l tèrs tùran a gl'US Open ma pò la céd par 6-7 4-6 a la śvisra Patty Schnyder. In Utóbar la gh'à da dar-ag sù a Taškent cun la Sorana Cîrstea in semifinàl. La finìs 'l an a la puśisiòṅ sinquànt'òt dal mónd.

In dal 2009 a Hobart la bat la Kateryna Bondarenko 4-6 7-6 6-1, la Flavia Pennetta, nùmar trédas dal mónd, 7-5 6-3 e la Melinda Czink 6-0 1-6 7-6 prima ad far sù baràca e buratèṅ in semifinàl cun l'Iveta Benešová par 1-6 3-6. A Pattaya City la manda a cà la Caroline Wozniacki in di quàrt par 6-4 6-1 par pò lasàr-'g al péni cun la Sania Mirza 4-6 7-5 1-6. Dòp 'n inìsi acsè a pâr ch'la strada par lē la vaga a la basa ma a n è briśa acsè parchè in di nóṿ turnèo a vgnir la vins sōl quàtar partìdi. Al ròbi i càmbian par lē, e dimóndi, in sl'èrba ingléśa ad Birmingham in dua la vins al sò prim tìtul WTA in finàl cóntar la Na Li par 6-0 7-6. A Wimbledon invéci la patìs subìt un 3-6 2-6 da la Roberta Vinci. In séguit la śluvàca la riva in di quàrt a Bad Gastein (4-6 4-6 da l'Ioana Raluca Olaru), a New Haven (2-6 2-6 da la Flavia Pennetta), a Seùl (3-6 3-6 da l'Anabel Medina Garrigues) e a Tokyo (3-6 1-6 da l'Agnieszka Radwańska), cun in mèś un tèrs tùran a gl'US Open pardû cun la Venus Williams par 2-6 5-7.

La śluvàca la strica i làbar méntar la tira 'n arvèrs

In dal 2010 la Magdaléna la fà un pas a 'l indrē rivànd in di quàrt sōl a Kuala Lumpur (0-6 3-6 da l'Elena Dement'eva). In Aṿtòṅ l'è custréta a śugàr soquànt turnèo ITF in dua la riva in finàl a Ningbo (al nùmar dū) cun l'Alberta Brianti, in semifinàl a Tokyo (al nùmar tri) cun la Jill Craybas e in di quàrt a Poitiers cun la Petra Kvitová.

In dal 2011, da nùmar sènt-sinc dal mónd, la vins al sò secónd turnèo WTA a Memphis baténd la Rebecca Marino par 6-2 bandòṅ. In d'l ITF ad Nassau da sènt-mila dòlar l'è pigàda par 6-1 7-5 da la Nastas'sja Jakimava in semifinàl. Dòp quàtar scunfìti ad fila cóntar la Petra Kvitová, la Rybáriková la bat finalmènt la céca in dla finàla dal turnèo ITF ad Praga (al nùmar dū) par 6-3 6-4. In Śugn la fà i quàrt a Birmingham cun la Sabine Lisicki e pò la riva in finàl a Cantón in Setémbar in dua la pèrd par 2-6 2-6 cun la Chanelle Scheepers.

In dal 2012 la pèrd tut i punt ad Memphis parchè la và fóra subìt cun la Jamie Hampton par 6-7 0-6 ma la stmana dòp la riva in di quàrt a Acapûlc in dua la patìs un pēś 1-6 2-6 da l'Irina-Camelia Begu ma almànc la pòrta a cà stanta punt bòṅ par la sò clasìfica. La riva in di quàrt anc a Baku in Luj (6-3 3-6 4-6 da la Julia Cohen). A la fiṅ dal méś la tōś part a 'l turnèo ad Washington. In dla capitàla di Stat Unî la Magdaléna la fà fóra una a drē a cl'atra la Chanelle Scheepers 6-2 6-1, l'Eleni Daniilidou 6-3 7-5, la Jana Čepelová 6-2 6-4, la Sloane Stephens 6-3 6-3 e l'Anastasija Pavljučenkova 6-1 6-1, miténd-'s in bisàca al sò tèrs tìtul WTA dla caréra. A gl'US Open però l'è custréta a śugàr listés al qualificasiòṅ, pasànd-li, e dòp la pèrd al sò incóntar ad secónd tùran cun la Jie Zheng par 3-6 1-6. La sèra 'l an da nùmar ssanta-dū dal ranking.

La Rybáriková cun in maṅ la cópa vinsa a Birmingham in dal 2009

Dòp dū prim tùran a 'l inìsi dal 2013 in Austràglia, la śluvàca la riva a 'l secónd tùran a Parì a 'l quèrt (0-4 bandòṅ cun la Sara Errani), in semifinàl a Memphis (5-7 5-7 da la Sabine Lisicki), in di quàrt a Flurianòpulis (4-6 0-6 da la Venus Williams) e a 'l tèrs tùran a Indian Wells e a Miami in dua la pèrd da la Garbiñe Muguruza Blanco 4-6 0-6 e da l'Agnieszka Radwańska 6-7 6-2 3-6. Dòp tri prim tùr'n in sla tèra rósa a Madrid, Róma e Bruxelles, la Magdaléna la fà patìr dimóndi la Svetlana Kuznecova a 'l Roland Garros prima ad pèrdar sèg in dal secónd tùran par 6-1 2-6 2-6. A Birmingham la s fà strada mandànd a cà subìt la Melanie South, finìda in cal méntar in daśgràsia, par 6-4 6-2 e la Mathilde Johansson par 7-5 6-7 6-4. In di utàṿ a dar-'g al pòst l'è la Kirsten Flipkens (nùmar vint dal mónd) par 6-7 2-6 e pò anc la Madison Keys la gh'à da pigàr-as sèg cun al puntéǵ ad 3-6 0-6. La Rybáriková la céd pò in semifinàl a la śōvna Donna Vekić par 6-7 6-1 3-6. In Agóst la śluvàca la s mét incóra in bisàca al tìtul ad Washington dand la paga a la Christina McHale 2-6 6-4 6-2, a la Jana Čepelová 7-5 5-7 7-5, a l'Angelique Kerber 7-6 3-6 6-3, a l'Ekaterina Makarova 6-2 6-0 e a l'Andrea Petković 6-4 7-6.

Culegamènt estéran