Carla Suárez Navarro
|
C'l artìcul chè 'l è scrit in
Miranduléś |
La Carla Suárez Navarro (Las Pàlmas ad Gran Canària, 3 ad Setémbar dal 1988) l'è na tenìsta spagnōla prufesiunìsta da 'l 2003 ch'l'è stada la nùmar daśnóṿ dal mónd 'l 8 'd Avrìl dal 2013.
L'è élta 162 cm e al péśa 62 chilo. Al sò alenadōr 'l è Xavier Budo insém a Marc Casabo e lē l'è andàda a star a Barcelóna par tgnir a drē a gl'alenamènt.
Al cólp ch'a gh piàś da piò 'l è 'l arvèrs incruśâ che lē la tira cun na maṅ sōla. Al sò film preferî 'l è Pearl Harbor.
In dla sò caréra l'à mis in bisàca siē tìtui ITF in tut e l'è rivàda in di quàrt a 'l Roland Garros in dal 2008 e a gl'Australian Open in dal 2009.
Caréra
La taca a śugàr in dal sircùit WTA in dal 2007 pasànd al qualificasiòṅ a Esturìl e US Open. In dal 2008 la riva par la prima vòlta in dal primi sinquànta dal mónd.
La canària l'à śugâ sinc finàli ad turnèo WTA (tuti in sla tèra) ma la i à pardùdi tuti. In dal 2009 e in dal 2010 a Marbella l'è stada batùda prima da la Jelena Janković 3-6 6-3 3-6 e pò da la Flavia Pennetta 2-6 6-4 3-6. A Esturìl l'è rivàda in fónd in dal 2012 e in dal 2013 lasànd pò strada a la Kaia Kanepi 6-3 6-7 4-6 e a l'Anastasija Pavljučenkova 5-7 2-6. A Acapûlc invéci l'è stada la Sara Errani a dar-'g un daspiaśēr, baténd-la par 6-0 6-4.