Mona Barthel

Da Wikipedia.

C'l artìcul chè 'l è scrit in Miranduléś Emiliàn

La Mona Barthel


La Mona Barthel (Bad Segeberg, 11 ad Luj dal 1990) l'è na tenìsta tedésca, prufesiunìsta da 'l 2009, ch'la tira 'l arvèrs a dū maṅ. L'è élta 185 cm, la péśa 70 chilo e la stà a Neumünster.

L'è stada bòna ad rivàr a èsar la nùmar vint-a-tri dal mónd al 18 ad Mars dal 2013.

In dla sò caréra l'à vins du tìtui WTA, tut in sal dûr. La Mona la s cata dimóndi bèṅ a Hobart parchè lè l'à vins al sò prim turnèo WTA in dal Śnar dal 2012 baténd in d'l ùlt'm incóntar la Yanina Wickmayer par 6-1 6-2 méntar 'l an dòp la s è cuntintàda ad rivàr in finàl, pardénd da l'Elena Vesnina par 3-6 4-6. Al tìtul più impurtànt ch'l'à purtâ a cà 'l è stâ qvél ad Parì a 'l quèrt dal 2013 in dua l'à fat fóra in finàl la Sara Errani par 7-5 7-6. In di Gran Slam invéci l'è rivàda par na vòlta a 'l tèrs tùran, in di Australian Open dal 2012.

La tedésca l'è stada bòna in dla sò caréra ad dar la paga anc a di atri tenìsti famóśi cuma l'Angelique Kerber, la Jelena Janković, l'Ana Ivanović e la Marion Bartoli.

Caréra

La Mona tòlta śò a Wimbledon in dal 2013
La Barthel insém a la Liga Dekmeijere

La tedésca la taca a pistàr i camp da tènis in dal 2007 in dal sircùit ITF. In dal Luj dal 2008 la śóga al sò primi finàli in dū turnèo da déś-mila dòlar ma la i pèrd. In Setémbar la tōś part a 'l qualificasiòṅ dal WTA ad Stucàrda in dua la bat la Karin Knapp ma pò la pèrd da la parmśàna Alberta Brianti. In dal 2009 la mùcia sù pôc rivànd sōl in semifinàl in un ITF da stantasìnc-mila dòlar in dal Régn Unî.

In dal 2010 la pòrta a cà subìt un ITF da déś-mila dòlar in Śnar e pò òṅ da sinquànta-mila in Bèlgi in Avrìl baténd la Bojana Jovanovski in semifinàl e pò la Rebecca Marino in finàl. La próa a qualificàr-as anc par di turnèo WTA ma la Bovina la s mét in sla sò strada par dū vòlti. In Utóbar la s qualìfica par 'l ITF ad Torhout, al nùmar dū, baténd la Gioia Barbieri e pò la riva in di quàrt in dua la pèrd da la Yanina Wickmayer par 3-6 6-7. Mandànd a cà la Sorana Cîrstea la gh la cava anc, par la prima vòlta, in dal WTA dal Lussembûrgh ma pò la pèrd subìt da l'Aravane Rezaï. La finìs 'l an a 'l nùmar 208 dal mónd.

La taca bèṅ al 2011 vinsénd 'n ITF in Frància e rivànd in finàl in qvél ad Sutton (3-6 6-1 2-6 da la Kristina Mladenovic). In Avrìl la pasa 'l qualificasiòṅ a Marbella mandànd a cà l'Anna Floris, l'Aleksandra Panova e la Maria Elena Camerin. A 'l prim tùran la fà sudàr la nùmar quatórdas dal mónd, la rusa Svetlana Kuznecova, purtànd-la a 'l tèrs sét. Finalmènt la tedésca la vins 'n incóntar in dal sircùit prinsipàl e la 'l fà a 'l Roland Garros cóntar la Sybille Bammer par pò pèrdar da l'Anastasija Pavljučenkova par 0-6 6-7. La pasa 'l qualificasiòṅ anc a Cupenàghen rivànd pò in semifinàl baténd via via l'Alexa Glatch 6-2 7-5, la Barbora Záhlavová-Strýcová 7-6 6-4 e la Bethanie Mattek-Sands 1-6 6-3 6-4. A 'l ùltim la lasa strada a la śugadōra ad cà, e nùmar òṅ dal mónd, la Caroline Wozniacki. In Agóst, baténd la Camila Giorgi 6-1 6-1, la riva in finàl in d'l ITF dal Bronx ma lè la patìs un 6-7 3-6 da l'Andrea Hlaváčková. Dòp un secónd tùran a gl'US Open (4-6 5-7 da la Chanelle Scheepers), la tedésca la pòrta a cà 'l ITF da sinquànta-mila dòlar ad Mèstar (7-5 6-2 a la Garbiñe Muguruza Blanco) e anc qvél ad stantasìnc-mila dòlar ad Shrewsbury (6-0 6-3 a l'Heather Watson). A la fiṅ d'l an la riva a la 67śma puśisiòṅ.

In dal 2012, dòp un secónd tùran a Aukland in dua la pèrd in tri sét da la Sabine Lisicki, la s mét in bisàca al sò prim tìtul WTA a Hobart. La 'l fà da qualificàda e baténd l'Angelique Kerber in semifinàl e la Yanina Wickmayer in finàl. A gl'Australian Open la pasa dū tùran e pò la và a cà cun la Viktoryja Azaranka par 2-6 4-6. A Parì a 'l quèrt la patìs la vindéta dla Wickmayer ch'la la bat in di quàrt par 6-4 6-7 6-3 ma la tedésca la gh la cava a rivàr in dal primi quarànta dal mónd. A Doha in Favràr la ciàpa la paga da l'Azaranka 1-6 0-6 e in Dubai la n pasa minga 'l qualificasiòṅ (4-6 4-6 da la Petra Martić). In Mars l'Azaranka la fà tris sèg a 'l secónd tùran mént'r a Miami la bat nét la Jelena Janković par 6-0 6-3 prima ad far la fritàda cun la Makarova ch'la la mét sóta par 6-2 6-4. In Avrìl la pèrd in di quàrt a Cupenàghen e a Stucàrda, chè incóra par maṅ dl'Azaranka. In Maǵ e Avrìl la śōga da schiva vinsénd sōl cun la Julia Görges e pardénd cun la Caroline Wozniacki, l'Aleksandra Panova, la Lauren Davis, l'Andrea Hlaváčková, la Chanelle Scheepers e la Vera Zvonarëva. La tórna a vìnsar a Båstad (tri incóntar) ma pò la céd in semifinàl a la Polona Hercog. Da lè a la fiṅ d'l an la cata sù pôc, giùst na semifinàl a Quebec City in dua la pèrd 6-7 6-7 da la Kirsten Flipkens.

La taca bèṅ al 2013 rivànd in semifinàl a Auckland (4-6 6-1 6-7 da la Yanina Wickmayer) e in finàl a Hobart (3-6 4-6 da l'Elena Vesnina). A surpréśa la và fóra subìt a gl'Australian Open ma a Parì a 'l quèrt la fà suo al turnèo baténd in d'l órdan l'Urszula Radwańska 7-6 6-0, la Roberta Vinci 4-6 6-1 6-3, la Marion Bartoli 7-6 6-4, la Kristina Mladenovic 6-1 6-4 e la Sara Errani in finàl par 7-5 7-6. A Doha e a Indian Wells la riva in di utàṿ pardénd da la Caroline Wozniacki e da la Samantha Stosur ma almànc la s cava la sudisfasiòṅ ad dar la paga a l'Angelique Kerber par 6-1 6-2 e a l'Ana Ivanović par 6-1 3-6 6-0. Chè la Mona la pèrd di cólp miténd in fila sinc scunfìti una a drē a cl'atra, a Miami, Charleston, Stucàrda, Madrid e Roland Garros. A Birmingham, dasfrutànd un bye e baténd la Vesna Dolonc, la riva in di utàṿ in dua la céd fàcil a la Madison Keys 3-6 2-6. La và avànti acsè cun sōl di prim e di secónd tùran in fiṅ in Agóst in dua la bat la Lucie Šafářová e la Marija Kirilenko a Cincinnati prima 'd arénd'r-as a la Serena Williams par 4-6 1-6. La finìs però dimóndi mâl la stagiòṅ vinsénd 'n incóntar sōl su siē.

Culegamènt estéran