Lucie Šafářová

Da Wikipedia.

C'l artìcul chè 'l è scrit in Miranduléś Emiliàn


La Šafářová tòlta śò in dal 2012
La céca a 'l servìsi durànt gl'Australian Open dal 2011


La Lucie Šafářová (Brno, 4 ad Favràr dal 1987, a s lèś [ˈlutsɪjɛ ˈʃafaːr̝ovaː]) l'è na tenìsta céca, vinsidōra dal Fed Cup dal 2011 e 2012, prufesiunìsta da 'l 2002. L'è élta 177 cm, la péśa 62 chilo e l'è bòna ad dascórar in Céc, Tedésc e Ingléś.

In dla sò caréra 'l à vins quàtar turnèo WTA in tut (su ùndas finàli) e siē ad qvéi d'l ITF. A gh piàś śugàr dimóndi in sla tèra batùda in dua la pōl druàr al sò drit in topspin cumpàgn ad qvél ad Rafael Nadal.

In di turnèo dal Gran Slam l'è rivàda na vòlta in di quàrt: l'è sucès a gl'Australian Open dal 2007 quànd l'à batû subìt la parmśàna Alberta Brianti e la milanéśa Francesca Schiavone e pò la francésa Amélie Mauresmo in di utàṿ.

Caréra

In dal 2004 la śōga in dal sircùit ITF e l'è bòna ad purtàr-'s a cà qvéi ad Bêrgum (da pardénta furtunàda, dand la paga in finàl a l'Iva Majoli par 3-6 7-6 6-1) e ad Bastad (in dua la fà fóra, fra gl'atri, la Mandy Minella e la Shahar Peer). La próa anc a pasàr al qualificasiòṅ a gl'US Open ma la và fóra a 'l secónd tùran p'r òpra dla Roberta Vinci.

In dal 2005 la taca a vìnsar anc in di turnèo dla WTA. Al prim ad Maǵ la fà sua la finàla in sla tèra d'l Estoril (pasànd p'r al qualificasiòṅ) baténd la cinéśa Na Li par 6–7 6–4 6–3. In Śugn la riva in fónd anc a 's-Hertogenbosch ma la pèrd da la Klára Zakopalová par 6–3 2–6 2–6 dòp avér mandâ a cà la Dinara Safina. Dòp cla finàl chè śugàda in sl'èrba, la vins al tìtul ad Forest Hills in sal cimènt dand la paga a la Sania Mirza par 3–6 7–5 6–4. Fra 'l sò vitmi, anc la mudnéśa Antonella Serra Zanetti, in alóra nùmar stanta dal mónd. La finìs 'l an śugànd 'l ITF ad Poitiers: dòp avér batû la Stéphanie Cohen-Aloro e la Galina Voskoboeva, la pèrd in dla semifinàl da l'èstuna Maret Ani.

Al 2006 al s vèra dimóndi bèṅ par lē parchè la vins al sò tèrs tìtul WTA in Austràglia: a Gold Coast la bat prima la Dinara Safina e pò la Flavia Pennetta par 6-3 6-4. Dòp soquànt prim e secónd tùran, la tórna a far la vōś grôsa in Avrìl a Amelia Island in dua la pèrd in semifinàl da la Nadia Petrova. L'è incóra la rusa a far-la fóra a Charleston la stmana dòp. A gl'US Open l'è bòna ad dar la paga a 'l prim tùran a la Samantha Stosur ma 'l è 'n fōg ad paja parchè la mét in fila sōl di prim e di secónd tùran da lè a la fiṅ d'l an.

A gl'Australian Open dal 2007 la riva in di utàṿ dòp avér batû la nùmar tri dal mónd Amélie Mauresmo. Anc a Parì a 'l quèrt la s fà valér parchè la bat prima la nùmar sinc dal ranking, la Svetlana Kuznecova, e pò la nùmar dū Justine Henin prima ad cédar in finàl a la Nadia Petrova, la sò bistiàsa négra, par 6-4 1-6 4-6. In sla tèra d'l Estoril la céd a la Viktoryja Azaranka 4-6 0-6 in semifinàl mént'r a gl'US Open l'è la Marion Bartoli ch'la la manda a cà a 'l tèrs tùran. A la fiṅ d'l an la śgranfgna al sò best ranking, al nùmar vint-a-dū.

Al sò 2008 l'è da mét'r-'s al maṅ in di cavìi in fiṅ a rivàr in Agóst in dua la vins a Forest Hills baténd la cinéśa Shuai Peng par 6-4 6-2. A Tokyo invéci la và fóra subìt p'r òpra dla Kaia Kanepi. In Utóbar la śōga dū ITF ma la pèrd sèmpar da la rusa Anastasija Pavljučenkova.

Prim piàṅ dla Lucie
Òṅ di sò drit

La taca al 2009 baténd in cà sua a Brisbane la Samantha Stosur prima ad patìr na scunfìta da la Viktoryja Azaranka in di quàrt par 6-7 4-6. A gl'Australian Open la pèrd da la Marion Bartoli a 'l tèrs tùran mént'r a Memphis la bat la Melanie South e la Vania King prima ad lasàr strada a la tedésca Sabine Lisicki in di quàrt. A Acapûlc la pèrd subìt da la Roberta Vinci. A Barcelóna la cata atri dū itagliàni: a 'l secónd tùran la bat la Sara Errani ma pò la céd a la Francesca Schiavone. A Turònt l'è custréta a pasàr p'r al qualificasiòṅ ma pò l'è bòna ad far fóra la Kaia Kanepi, l'Ana Ivanović e la Jie Zheng prima ad stablìr-as cónt'r al giaròṅ Serena Williams in di quàrt. A Quebec City la riva in finàl dòp un muć ad tèmp ma la la pèrd cóntar la Melinda Czink par 6-4 3-6 5-7. A Tokyo la s cava la vója ad bàt'r incóra l'Ana Ivanović prima ad lasàr-'g al péni cóntar la Viktoryja Azaranka. Anc a Linz e a Mósca la fà pôca strada andànd a cà prèst cóntar l'Agnieszka Radwańska e la Jelena Janković.

In dal 2010 a Brisbane la mòla in di quàrt un 6-0 in dal secónd sét a la Kim Clijsters ma pò la và a pèrdar listés 'l incóntar. A Parì in Favràr la mét in riga la Francesca Schiavone e la Flavia Pennetta par pò pèrdar la finàl cóntar la rusa Elena Dement'eva par 7-6 1-6 4-6. A Stucàrda la bat la nùmar dū dal mónd Caroline Wozniacki mént'r a Róma la fà fóra la nùmar nóṿ Agnieszka Radwańska prima ad pèrdar da la María José Martínez Sánchez (pò finalìsta) in di quàrt. A Madrid la fà magnàr la pólvra anc a 'l rusi Marija Šarapova e Nadia Petrova. In s'l èrba invéci la fà più fadìga andànd fóra a 'l secónd tùran a Eastbourne (da la Kim Clijsters) e a 'l prim tùran a Wimbledon (pardénd da la śluvàca Dominika Cibulková).

In dal 2011 la bat l'Agnieszka Radwańska subìt a Doha par pò pèrdar dòp da la Flavia Pennetta in tri sét. La stmana dòp la riva in finàl a Kuala Lumpur baténd la Dinara Safina e la Marion Bartoli ma pò la pèrd da la Jelena Dokić par 6-2 6-7 4-6. A Madrid la riva in di quàrt, méj a Cupenàghen anc s'al tìtul l'al pòrta a cà la Caroline Wozniacki (nùmar òṅ dal mónd) par 6-1 6-4. A Turònt la cata incóra la Serena Williams in di quàrt e anc 'sta vòlta par lē a n gh'è gnint da far anc s'la gh la cava a vìns'r un sét sèg (al prim). In Utóbar la pèrd dū semifinàl: a Linz cóntar la Dominika Cibulková e a Mósca cóntar la Kaia Kanepi. A la fiṅ d'l an la pèrd i sò dū singulàr ad Fed Cup cónt'r al rusi Svetlana Kuznecova e Anastasija Pavljučenkova.

La taca mâl al 2012, sōl in Favràr a Doha la fà sù di riśultâ bèi baténd la Caroline Wozniacki e la Svetlana Kuznecova prima ad lasàr strada a la Marion Bartoli in di quàrt e pò anc a Indian Wells al méś dòp. In sla tèra vérda ad Charleston la riva in finàl ma la vèṅ asfaltàda 6-0 6-1 da la Serena Williams. A Montreal in Agóst la bat la Samantha Stosur e la Roberta Vinci ma 'l incòntar ad semifinàl cun la Na Li al scapa via par 6-3 3-6 5-7. A New Haven la pèrd in di quàrt da la Petra Kvitová, a gl'US Open a 'l tèrs tùran da la Nadia Petrova. A la fiṅ d'l an la vins la Fed Cup cóntar la Sèrbia: lē l'è bòna ad spasàr via prima l'Ana Ivanović 6-4 6-3 e pò anc la Jelena Janković par 6-1 6-1.

In dal 2013 la fà sù sōl di prim e di secónd tùran. La gh'à da rivàr a Charleston prima ad vìnsar dū partìdi ad fila ma in di quàrt la pèrd da la Serena Williams par 4-6 1-6. In Avrìl la śōga a Palèrum la semifinàl ad Fed Cup par la Céchia cóntar l'Itâglia ma la pèrd i sò dū singulàr, al prim cóntar la Sara Errani par 4-6 2-6 e al secónd cóntar la Roberta Vinci par 3-6 7-6 3-6.

Culegamènt estéran