Yanina Wickmayer

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


La Yanina tòlta śò a Wimbledon in dal 2014


La Yanina Wickmayer (Lier, 20 'd Utóbar dal 1989) l'è na tenìsta bélga prufesiunìsta da 'l 2004. Al sò ranking più bèl 'l è 'l nùmar dódas, tucâ al 19 'd Avrìl dal 2010. La dróa al bras dèstar e la tira 'l arvèrs a dū maṅ. L'è élta 185 cm e la péśa 68 chilo.

La stà a Hasselt, in dal Fiàndri, e la dascór tri léngui, 'l Ulandéś, al Francéś e 'l Ingléś.

In dla sò caréra l'à purtâ a cà tri tìtui WTA in singulàr e déś ad qvéi ITF.

Caréra

Dòp soquànt incóntar śugâ in dal 2004 e in dal 2005, la taca 'l 2006 rivànd in finàł in d'l ITF 'd Edinbûrg che però la pèrd dòp avér dâ 'n 6-0 in dal prim set a la Mari Andersson. In Agóst la s mét in bisàca 'l tìtul ad Koksijde e pò la fà àtar tant a la fiṅ d'l an a Florianópulis e a Córdoba.

In dal 2007 la vins 'n ITF ad vintsìnc-mila dòlar a Les Contamines-Montjoie. Dòp la semifinàł a Makinohara, la vins daśnóṿ di vint incónt'r a vgnir, śugànd quàtar finàł ITF ad fila e vinsénd-an tri. La bélga la pasa acsè da la puśisiòṅ 534 dal 2006 a 'l nùmar 221.

In dal 2008 la pèrd dū finàł ITF in Ìndia e in Spaggna, pò però la s mét in bisàca 'l tìtul 'd Indian Harbour Beach baténd la Bethanie Mattek-Sands par 6-4 7-6. In Śugn la riva in finàł anc in dal turnèo WTA ad Birmingham baténd lung la via la Casey Dellacqua, la Melanie South e la Bethanie Mattek-Sands ma a 'l ùltim la pèrd par 6-7 6-3 6-7 cun la Kateryna Bondarenko. In Setémbar la patìs dū scunfìti da la Kaia Kanepi ch'la la manda a cà in di quàrt ad Seùl e in di utàṿ a Tokyo.

La Wickmayer in dal 2010 a Stucàrda
Un cōlp a 'l vōl dla bélga

La bélga la gh'à 'n brut inìsi 'd stagiòṅ in dal 2009 pardénd tri incónt'r ad fila, 'l ùltim cun l'Alberta Brianti a gl'Australian Open. La s tira sù cun dū finàł ITF (tìtul a Surprise) e c'n al sò prim tìtul WTA a Esturìl in dua la bat la Petra Kvitová, l'Ol'ga Govorcova, la Sorana Cîrstea, la Shahar Peer e l'Ekaterina Makarova. In Maǵ a riva 'n atra finàł in d'l ITF ad Saint-Gaudens ma la Yanina la la pèrd cun la Nastas'sja Jakimava. In sl'èrba la riva in di quàrt a Birmingham (1-6 6-2 3-6 da la Marija Šarapova) e in finàł a 'S-Hertogenbosch (3-6 5-7 da la Tamarine Tanasugarn). A Los Angeles, a Cincinnati e a New Haven la gh'à da pigàr-as a 'l rusi Vera Zvonarëva, Elena Dement'eva e Svetlana Kuznecova. A gl'US Open la mét in riga la Virginie Razzano par 6-4 6-3, la Shuai Peng par 2-6 6-1 6-4, la Sara Errani par 6-3 6-4, la Petra Kvitová par 4-6 6-4 7-5 e la Kateryna Bondarenko par 7-5 6-4 e acsè la riva in semifinàł in dua la pèrd da la Caroline Wozniacki par 3-6 3-6. In Utóbar la vins al sò secónd tìtul WTA a Linz dand la paga a la Sara Errani, a la Flavia Pennetta e a la Petra Kvitová. Anc in Lussembûrgh la Wickmayer la fà bèṅ baténd l'Alizé Cornet e la Kirsten Flipkens prima 'd cédar a la śvisra Timea Bacsinszky in semifinàł par 6-3 2-6 5-7.

La Wickmayer la cuntìnua a la granda anc a 'l inìsi dal 2010 parchè la vins subìt al turnèo 'd Auckland dand un 6-3 6-2 a la Flavia Pennetta. La tenìsta ad Brìndaś la gh pèrd incóra anc a gl'Australian Open acsè cuma la Sara Errani, sōl la Justine Henin l'è bòna ad farmàr la sò cursa in di utàṿ par 7-6 1-6 6-3. Dòp dū bruti scunfìti a 'l prim tùran cun la Petra Martić a Parì a 'l quèrt e cun la Shahar Peer a Dubai, la bélga la riva in di utàṿ a Indian Wells e in di quàrt a Miami faghénd acsè al sò best ranking dla sò caréra (nùmar 12). A Róma però a riva na pagàda per 2-6 0-6 cun la Jelena Janković in di utàṿ e n'atra incóra a 'l prim tùr'n 'd Eastbourne (1-6 1-6 da la Kim Clijsters). A Wimbledon la fà tèrs tùran cun la Vera Zvonarëva, pò la fà i quàrt a Stanford (5-7 6-3 3-6 da la Samantha Stosur) e a Cincinnati (5-7 6-3 1-6 da l'Anastasija Pavljučenkova). In Setémbar la riva in di utàṿ a gl'US Open in dua la s férma cun la Kaia Kanepi dòp avér-ag mulâ un 6-0 in dal prim set. In di quàtar turnèo WTA finài la và sèmpar fóra a 'l prim tùran ma almànc in mèś la s pòrta a cà 'n ITF bélga cóntar la Simona Halep batùda 6-3 6-2.

A 'l inìsi dal 2011 la tōś part a 'l turnèo 'd Auckland. Chè la bat la Dinara Safina 6-3 6-7 6-1, la Sabine Lisicki 6-2 3-6 6-2, la Simona Halep 6-0 6-2 e la Shuai Peng 3-6 7-6 7-5 ma la céd in finàł a l'ungheréśa Greta Arn par 3-6 3-6. A Parì a 'l quèrt la fà fóra l'Elena Vesnina e la Klára Koukalová prima 'd pèrd'r in di quàrt da la Petra Kvitová par 7-5 3-6 6-7. In Mars la riva in semifinàł a Indian Wells ma la gh'à da pigàr-as a la francéśa Marion Bartoli mént'r in Avrìl la fà i quàrt a Charleston (6-4 4-6 4-6 da la Caroline Wozniacki). In Maǵ a Róma la bat l'Angelique Kerber e l'Ana Ivanović, pò la cata incóra la danéśa ch'la vins sèg in dū set. A 'S-Hertogenbosch la s férma in di quàrt cun la Roberta Vinci mént'r a Wimbledon la riva invéci in di utàṿ (0-6 2-6 da la Petra Kvitová).

La Yanina in dal 2011

In dal 2012, dòp un 6-4 1-6 1-6 patî par la Sara Errani a Auckland, la Yanina la riva in finàł a Hobart ma la la pèrd cun la Mona Barthel par 1-6 2-6. A Parì a 'l quèrt la vèṅ batùda da l'Angelique Kerber in semifinàł mént'r a Doha l'è la Viktoryja Azaranka a farmàr-la in di quàrt. A Miami la Wickmayer la bat la Kim Clijsters e la riva in di utàṿ in dua la céd a la Caroline Wozniacki. In Avrìl e in Maǵ la vins sōl tri incóntar su nóṿ ma pò la riva in finàł a Bad Gastein in dua la pèrd da l'Alizé Cornet par 5-7 6-7. A Wimbledon la pasa dū tùran cun la Svetlana Kuznecova e cun la Galina Voskoboeva prima ad lasàr strada a la Tamira Paszek par 6-2 6-7 5-7. A Stanford la bèca la Coco Vandeweghe, pardènta furtunàda, in semifinàł e la gh lasa 'l péni. Da lè in avànti la mùcia sù sōl di prim e di secónd tùran e la sèra 'l an a la puśisiòṅ nùmar vint-a-tri dal mónd.

In dal 2013 la riva incóra na vòlta in finàł a Auckland baténd via via la Magdaléna Rybáriková par 7-6 6-2, la Romina Oprandi par 6-3 6-0, la Kirsten Flipkens par 6-3 6-4 e la Mona Barthel par 6-4 1-6 7-6. A 'l ùltim la pèrd però 'l tìtul cun l'Agnieszka Radwańska ch'la vins 6-4 6-4. A gl'Australian Open la bélga la riva a 'l tèrs tùran cun la Marija Kirilenko, stés riśultâ anc a Indian Wells in dua la patìs un 6-1 7-6 da l'Angelique Kerber. A Doha e a Stucàrda la và fóra subìt cun la Roberta Vinci e cun la Bethanie Mattek-Sands, méj a Eastbourne in dua la riva almànc in semifinàł baténd la Christina McHale, la Petra Kvitová e la Marija Kirilenko prima 'd èsar schisàda par 6-2 6-0 da l'Elena Vesnina. Dòp soquànt prim e secónd tùran, la riva incóra in semifinàł a Nanchîṅ e vinsénd a Taipèi, dū turnèo WTA minōr da sentvintsìnc-mila dòlar.

In dal 2014, dòp dū secónd tùr'n a Hobart (1-4 bandòṅ cun la Garbiñe Muguruza Blanco) e a gl'Australian Open (1-6 1-6 da l'Alison Riske) la bélga la riva in di quàrt a Doha in dua però la pèrd fàcil da l'Agnieszka Radwańska par 2-6 1-6. A Esturìl la vèṅ sćiancàda par la Roberta Vinci c'n al puntéǵ ad 0-6 2-6 mént'r a Wimbledon la bat la Samantha Stosur ma minga la qualificàda Ana Konjuh. A Cincinnati la và fóra subìt cun la Sara Errani dòp na partìda tiràda finìda 7-5 3-6 7-6 par la rumagnōla. Anc a gl'US Open la fà prim tùran cun la śvisra Belinda Bencic.

In dal 2015 la pèrd subìt cun la carta salvàdga Taylor Townsend a Auckland mént'r a Sydney la n s qualifìca gnanc.

Culegamènt estéran