Irina-Camelia Begu

Da Wikipedia.
Jump to navigation Jump to search
C'l artìcul chè 'l è scrit in Miranduléś Emiliàn


L’Irina-Camelia Begu (Bùcarest, 26 'd Agóst dal 1990) l'è na tenìsta ruména.

La ruména tòlta śò in dal 2015 a Wimbledon

L'è élta 181 cm e la péśa 67 chilo. La dróa al bras dèstar e la tira 'l arvèrs a dū maṅ. In dla sò caréra, in dal sircùit WTA, l'à vins dū tìtui in singulàr e quàt'r in dópi ólt'r a ùndas in qvél ITF. Al 12 'd Utóbar dal 2015 l'è rivàda a èsar la nùmar vint-sinc dal mónd.

Caréra

La ruména la śōga i sò prim incónt'r in dal sircùit ITF in dal 2005 vinsénd al sò prim turnèo dū an dòp. In dal 2009 la śōga 'l qualificasiòṅ in soquànt turnèo dal sircùit prinsipàł pardénd a 'l prim tùr'n a Bùdapest cun la Shahar Pe'er.

In dal 2011 la vins 'l turnèo ITF da sènt-mila dòlar ad Cali baténd la spagnōla Laura Pous Tió pò in Avrìl la riva in finàl in d'l international ad Marbella baténd lung la via l'Alberta Brianti, l'Estrella Cabeza Candela, la Klára Koukalová e la Svetlana Kuznecova prima 'd pèrdar cun la Viktoryja Azaranka par 3-6 2-6. In Śugn la fà sudàr la Flavia Pennetta a Wimbledon pardénd-ag sōl par 6-7 6-4 2-6. A Bùdapest la pèrd in finàl da cl'atra salintìna, la Roberta Vinci, par 4-6 6-1 4-6. In Luj la s mét in bisàca 'l ITF da sènt-mila dòlar ad cà baténd incóra la Laura Pous Tió. In Agóst la riva in semifinàl a Dallas in dua la ciàpa na scòpla da la Sabine Lisicki ch'la vins sèg par 6-0 6-1. La finìs 'l an in dal primi quàranta dal mónd.

L'Irina-Camelia a 'l servìsi
Un sò arvèrs

In dal 2012 la riva in semifinàl a Acapûlc ma la s férma cun la Flavia Pennetta. A Barcelóna la fà prim tùran cun la Sara Errani (6-7 4-7 al puntéǵ) e la fà cumpàgn anc a Bùdapest cun l'Alberta Brianti, a Madrid cun la Marija Šarapova e a Straśbûrg cun la Su-Wei Hsieh. A 'S-Hertogenbosch la pèrd al sò incóntar dal secónd tùran cun la Francesca Schiavone par 2-6 6-2 6-7 quànd l'éra avànti 6-0 in dal tie-break. A Palèrum l'incróśa incóra l'Errani in semifinàl e la gh céd par 4-6 1-6. A gl'Ulimpìadi ad Lóndra la pòrta via 'n set a la Viktoryja Azaranka pò la bat la Caroline Wozniacki a gl'US Open par 6-2 6-2. In Setémbar la vins al sò prim tìtul WTA a Taškent baténd in finàl la qualificàda Donna Vekić. Al méś dòp, baténd la Kiki Bertens e la Bethanie Mattek-Sands, la riva in semifinàl anc a Linz ma la pèrd fàcil da la nùmar òṅ dal mónd, la Viktoryja Azaranka, par 2-6 1-6.

In dal 2013 i riśultâ i n rìvan briśa parchè la Begu la mùcia sù sōl di prim e di secónd tùran in fiṅ in Setémbar quand la pèrd in di quàrt a Seùl da l'Anastasija Pavljučenkova par 2-6 2-6. La ruména la cróda śò in clasìfica a la 124śma puśisiòṅ dal ranking.

In dal Mars dal 2014 la vins dū tìtui ITF ad fila in Braśìl, baténd sèmpar l'Aleksandra Panova. La fà bèṅ anc a Esturìl in dua la bat la Kaia Kanepi e la Timea Bacsinszky prima 'd céd'r a la Carla Suárez Navarro in semifinàl. In Luj a riva 'n àtar tìtul ITF da sènt-mila dòlar e la Begu la s tira sù in clasìfica, specialmènt a la fiṅ d'l an cun la finàl Premier ad Mósca (4-6 7-5 1-6 da l'Anastasija Pavljučenkova), turnèo in du la bat almànc la Donna Vekić, l'Ekaterina Makarova, la Cvetana Pironkova e la Lucie Šafářová.

In dal 2015 la riva a gl'utàṿ di Australian Open (1-6 7-5 2-6 da l'Eugenie Bouchard) faghénd la surpréśa a 'l prim tùr'n in dua la fà fóra l'Angelique Kerber vinsidōra dal tìtul 'l an dòp. A Rio de Janeiro la bat la Bethanie Mattek-Sands e la Julia Glushko prima 'd cédar par 3-6 6-4 2-6 a l'Anna Karolína Schmiedlová. Su la tèra vérda 'd Charleston la pèrd in di quàrt da la Kerber par 6-7 6-7, pò la fà cumpàgn anc in dal Premier Mandatory ad Madrid cun la Petra Kvitová. A Róma la Begu la bat incóra la Kerber prima 'd andàr a cà cun la Viktoryja Azaranka in di utàṿ. In Luj la s férma a 'l tèrs tùr'n a Wimbledon incruśànd la Marija Šarapova. In Setémbar a riva par lē al sò secónd tìtul iternational a Seùl (6-3 6-1 a la qualificàda Aljaksandra Sasnovič).

In dal 2016 la fà gl'utàṿ a Miami (3-6 1-6 da la Madison Keys) e quàrt a Charleston (2-6 3-6 da l'Angelique Kerber). Anc a Madrid la gh la cava a rivàr in di quàrt faghénd fóra l'Eugenie Bouchard, la Garbiñe Muguruza Blanco e la Christina McHale prima 'd cédar in tri set, ma dand un bagel, a la Simona Halep.

Culegamènt estéran