Caroline Wozniacki

Da Wikipedia.
C'l artìcul chè 'l è scrit in Miranduléś Emiliàn
La Wozniacki tòlta śò durànt i WTA Championship dal 2011
La danéśa la s impéggna durànt 'n alenamènt


La Caroline Wozniacki (Udénse, 11 ad Luj dal 1990, a s lèś /kɑːo.liːnə ʋʌsni'ɑɡ̊i/ in Danéś e /voʑˈɲatski/ in Pulàc) l'è na tenìsta danéśa nada da di genitōr pulàc, Piotr, sugadōr ad balòṅ (anc sò fradèl Patrik 'l è 'n prufesiunìsta ad cal sport lè in Danimàrca), e l’Anna, sugadōra ad volèy par la sò nasiunàla.

L'è élta 177 cm e la péśa 58 chilo. Al sò scutmàj l'è Pushniacki (da 'l vèr'b ingléś to Push ch'al vōl dir Spìnśar) parchè al sò śōg al fà afidamènt a butàr da ch'l'atra banda la bucìna, faghénd pôc śbali piutòst che tiràr di vinsènt.

A la danéśa i gh piàśan dimóndi i lìbar 'd Harry Potter.

L'è stada la nùmar òṅ dal mónd ('l 11 'd Utóbar dal 2010) sénsa però mai vìnsar gnanc un turnèo ad qvéi dal Gran Slam.

In dla sò caréra, tacàda fra i prufesiunìsta in dal Luj dal 2005, l'à vins vint tìtui WTA cun anc na finàla a gl'US OPEN dal 2009.

Caréra

Dòp avér tacâ a śugàr in dal 2005, la Caroline la pòrta a cà i prim riśultâ impurtànt in dal 2007 quànd la riva in di quàrt ad Tokyo in dua la pèrd da la Venus Williams. In dal 2008 la fà 'l bòt dabòṅ vinsénd tri turnèo dvintànd la nùmar trédas dal mónd.

La fà incóra méj in dal 2009 quànd la vins tri tìtui, rivànd anc in finàl a gl'US OPEN (pardénd da la Kim Clijsters par 5-7 3-6) e in àtar quàtar turnèo (Memphis batùda par la Viktoryja Azaranka 1-6 3-6, Charleston batùda par la Sabine Lisicki 2-6 4-6, Madrid pardénd 2-6 4-6 da la Dinara Safina e Båstad misa sóta 5-7 4-6 da la María José Martínez Sánchez).

Prim piàṅ dla Caroline

In dal 2010 la riva in di utàṿ di Australian Open e pò in finàl a Indian Wells in dua la pèrd da la sèrba Jelena Janković par 2-6 4-6. A 'l Roland Garros la céd in di quàrt a la Francesca Schiavone e pò la vèṅ asfaltàda da la Petra Kvitová 6-0 6-2 a 'l quàrt tùran ad Wimbledon. A la fiṅ d'l an la pèrd i WTA Championships ad Doha in finàl da la Kim Clijsters, ma cun i punt muciâ sù cun al vìnsiti in siē turnèo (cóntar aversàri cuma la Vera Zvonarëva, la Nadia Petrova e l'Elena Dement'eva) la dvénta la nùmar òṅ dal mónd.

La Caroline la taca la stagiòṅ 2011 a gl'Australian Open in dua, pasâ facilmènt i prim tùran, la vèṅ mandàda pò a cà da la Na Li. In dla mità ad Favràr la pèrd la sò prima puśisiòṅ a vantàś dla Kim Clijsters ma 'l è 'n àtim parchè pò la vins fàcil al turnèo dal Dubai cóntar la Svetlana Kuznecova par 6–1, 6–3 e la tórna acsè a 'l sò pòst. Al 26 ad Favràr la fà sù di àtar punt pēś cun la finàla ad Doha pardùda da la Vera Zvonarëva par 4-6 4-6. La pòrta anc a cà in Mars al turnèo 'd Indian Wells baténd la francéśa Marion Bartoli cun al puntéǵ ad 6-1 2-6 6-3 e in Avrìl qvél ad Charleston miténd sóta l'Elena Vesnina. In séguit però la mùcia sù pôc: a Turònt la pèrd a 'l secónd tùran da la Roberta Vinci mént'r a gl'US Open l'è la Serena Williams a dar-ag la paga in semifinàl. La sèra 'l an incóra a 'l prim pòst dal ranking dòp che la Flavia Pennetta la s tōś la sudisfasiòṅ ad bat'r-la in di quàrt ad Pechîṅ.

In dal 2012 la lasa, dòp quatórdas méś, al prim pòst dla clasìfica dal fémni pardénd a Sydney par maṅ dl'Agnieszka Radwańska e pò a gl'Australian Open da la Kim Clijsters in di quàrt. A Miami la bat la Serena Williams ma la pèrd in semifinàl da la Marija Šarapova. La stmana dòp la próa a vìnsar a cà sua a Cupenàghen ma la pèrd la finàla 4-6 4-6 da la tedésca Angelique Kerber. A Mósca la gh la cava a purtàr-'s a cà al sò vintéśum tìtul baténd la Samantha Stosur par 6-2, 4-6, 7-5. In séguit la śōga atri dū finàli ma la i pèrd: al 4 ad Nuvémbar dal 2012 a Sòfia la céd a la Nadia Petrova 2-6 1-6 mént'r al 17 ad Mars dal 2013 a Indian Wells la magna la pólvra p'r òpra dla rusa Marija Šarapova ch'la la bat 6-2 6-2.

Finàli in di Gran Slam

Turnéo An Vins/Pardû Aversàri in finàl Puntéǵ
US Open 2009 P Kim Clijsters 5-7, 3-6

Culegamènt estéran