Julia Görges

Da Wikipedia.

C'l artìcul chè 'l è scrit in Miranduléś Emiliàn


La Görges la cur adrē a na bucìna a 'l Roland Garros 2011


La Julia Görges (Bad Oldesloe, 2 ad Nuvémbar dal 1988) l'è na tenìsta tedésca prufesiunìsta da 'l Luj dal 2005. La s è stablìda a Hannover in dal nòrd dla Germâgna.

L'è élta 180 cm e la péśa 70 chilo. La dróa al bras dèstar e la tira 'l arvèrs a dū maṅ. L'à tacâ a śugàr a tènis da pìcula quànd la gh'iva siē an.

L'è stada la nùmar quìndas dal mónd al 3 ad Mars dal 2012 e in dla sò caréra l'à vins dū tìtui WTA (a Bad Gastein 2010 e a Stucàrda 2011) e siē ad qvéi ITF (tut in sla tèra batùda), rivànd par dū vòlti in di utàṿ di Australian Open in dal 2012 e in dal 2013. Par cóntar, l'à pardû tri finàli. In dópi invéci la s è purtàda a cà quàtar tìtui sèmpar cun dal cumpàgni difarénti.

I sò genitōr (Klaus e l’Inge) ad mistēr i lavóran in dal camp dl'asicurasiòṅ. I cantànt ch'i gh piàśan da piò i èṅ Michael Jackson, la Rihanna e i Blue mént'r i sò atōr favurî i èṅ Hugh Grant, la Julia Roberts e la Jennifer Aniston.

A gh piàś magnàr dal bistèchi e guardàr al telenuvéli a la televiśiòṅ.

L'à tòlt ispirasiòṅ da 'l śōg dla śvisra Martina Hingis e al sò śugadōr preferî 'l è Roger Federer.

Caréra

La tedésca tòlta śò durànt gl'Ulimpìadi dal 2012
La Julia prónta a far partìr na śéśula cun 'l arvèrs
La Görges pigàda par rispóndar
La Julia in dal 2012, cun dal śmalt rós in sgl'ungi

Dòp avér vins dū tìtui ITF in d'l Agóst dal 2006, in dal 2007 la pasa 'l qualificasiòṅ a Doha pardénd pò a 'l secónd tùran da la Svetlana Kuznecova, nùmar sinc dal mónd, par 5-7 1-6. In Avrìl la n i pasa minga invéci a Bùdapest e a Varsàvia andànd a cà p'r òpra dla Sabine Lisicki e dla Tamira Paszek. In Maǵ la fà suo un ITF in Turchìa e pò 'n àt'r incóra a Bùcarest in Śugn baténd la Zuzana Kučová e la Dia Evtimova. In Agóst la pasa 'l qualificasiòṅ a Stucólma in dua la riva anc in semifinàl pardénd pò da la Vera Duševina par 4-6 7-5 3-6. La śōga anc a gl'US Open ma lè la céd a la nùmar òṅ dal mónd, la Justine Henin. La sèra 'l an a 'l 131śum pòst.

In dal 2008 la tōś part a 'l turnèo ad Doha par via dna carta salvàdga ma la pèrd subìt da la Karin Knapp par 1-6 4-6. A Memphis la riva in di quàrt baténd la Bethanie Mattek-Sands par 6-4 6-3 ma pò la fà 'l valìś cun l'Ol'ga Govorcova ch'la gh'à la méj sèg par 7-6 6-2. A Berlîṅ la pèrd a 'l prim tùran da la Dinara Safina e pò la n pasa briśa 'l qualificasiòṅ dal Roland Garros pardénd da la Nastas'sja Jakimava. A Wimbledon la fà secónd tùran (2-6 6-7 da la Marina Eraković), méj a Pòrtrōś in dua la riva in semifinàl (3-6 6-2 4-6 da l'Anabel Medina Garrigues). La finìs 'l an śugànd sinc ITF (purtànd a cà dū semifinàli), piasànd-as a 'l 102śum pòst dal ranking.

In dal 2009 la và fóra subìt a gl'Australian Open paténd un 5-7 3-6 da l'Ana Ivanović mént'r a Miami la riva a 'l secónd tùran (4-6 2-6 da la Jie Zheng). In Śugn, baténd la Sara Errani 6-4 5-7 7-5, la riva in di utàṿ in sl'èrba ad Birmingham ma pò la pèrd da l'Urszula Radwańska par 6-7 3-6. Dòp al prim tùran ad Wimbledon (4-6 6-7 da la Jelena Janković), la tedésca la vins 'l ITF ad Biarritz da sènt-mila dòlar baténd, fra gl'atri, la Nastassja Burnett, la Lucie Hradecká e la Kacjaryna Dzehalevič in finàl. In Istâ la Görges la n pasa minga al prim tùran di US Open parchè la pèrd 3-6 2-6 da la rusa Svetlana Kuznecova. A Quebec city la riva invéci in di quàrt (3-6 2-6 da la Lucie Šafářová).

In dal 2010, dòp soquànt prim e secónd tùran, la tōś part a la stagiòṅ di turnèo americàṅ in primavéra. A Indian Wells la bat la Lucie Šafářová par pò pèrdar da la Yanina Wickmayer, a Miami e a Ponte Vedra beach la mandà a cà l'Ayumi Morita e la Barbora Záhlavová-Strýcová par pò far lē al valìś cun l'Elena Vesnina a 'l secónd tùran. A Charleston la céd lutànd a la Bethanie Mattek-Sands. A Straśbûrg la bat la Maria Elena Camerin 5-7 7-5 6-1 e la Sybille Bammer 6-1 7-6 prima ad pèrdar in di quàrt da la Marija Šarapova par 6-7 1-6. In Luj la vins incóra al tìtul ITF ad Biarritz prima ad pèrdar in dla semifinàl ad Palèrum da la Flavia Pennetta par 0-6 4-6. La stmana dòp la Julia la vins al sò prim tìtul WTA a Bad Gastein baténd l'Alizé Cornet in semifinàl e la śvisra Timea Bacsinszky in finàl, tuti e dū par 6-1 6-4. In Agóst la riva in di quàrt a Cupenàghen (6-3 0-6 6-7 da la (Caroline Wozniacki) par pò far secónd tùran a gl'US Open cóntar la Yanina Wickmayer. A Quebec city la vèṅ mandàda a cà a 'l secónd tùrand da la Bethanie Mattek-Sands cun al puntéǵ ad 1-6 4-6. A Tokyo la fà la vóś grôsa cun la Dinara Safina e cun la Samantha Stosur ma pò la dvénta 'n pulśèṅ cun la Coco Vandeweghe ch'la la sćiànca 6-3 6-0. In Utóbar la dà la paga 6-2 6-1 a la Petra Kvitová a Linz ma l'Ana Ivanović la la mét pò in riga in di quàrt par 7-6 6-2. La stmana dòp la sa spòsta in Lussembûrg par śugàr un turnèo WTA in sal dûr. Chè la bat la Mandy Minella 6-4 6-3, la Carla Suárez Navarro 6-2 6-1, l'Ana Ivanović 6-3 6-1 e l'Angelique Kerber 6-4 3-6 6-1. In finàl la tedésca la céd però a la tarantìna Roberta Vinci par 3-6 4-6 ma in tut al manéri la fà sù dū-śènt punt bòṅ par la sò clasìfica ch'a la fiṅ d'l an la riva a èsar la nùmar quarànta dal mónd.

La taca bèṅ al 2011 cun la semifinàl a Auckland e 'l tèrs tùran a gl'Australian Open (6-4 4-6 4-6 da la Marija Šarapova). In Avrìl la riva in di quàrt anc a Charleston ma la pèrd da l'Elena Vesnina par 6-2 2-6 2-6. In cà sua, a Stucàrda, la Görges la i fà fóra tuti par vìnsar al sò prim Premier. La taca cun la Michaëlla Krajicek sćiancàda par 6-3 6-1 e pò la s imprufìta dal bandòṅ dla Viktoryja Azaranka ch'la gh dà a muć dòp avér purtâ a cà al prim sét 6-4. In di quàrt la bat la Sabine Lisicki 6-4 6-4 e pò la gh'à la méj anc su la Samantha Stosur par 6-4 3-6 7-5. In finàl la mét a pòst anc la Caroline Wozniacki, nùmar òṅ dal mónd, par 7-6 6-3. A Madrid la Julia la cuntìnua a la stésa manéra, avénd-ag la méj su la Kaia Kanepi 6-7 6-1 6-4, su la Dinara Safina 6-4 4-6 6-4, incóra su la Caroline Wozniacki 6-4 1-6 6-3 e su l'Anastasija Pavljučenkova par 6-4 6-2. In semifinàl la pésca però na Viktoryja Azaranka armìsa dal tut ch'la la bat 6-4 6-2. Cun i nuvsènt-vint punt mis in bisàca in di dū turnèo, la Julia la śōga a 'l Roland Garros da nùmar daśdòt dal mónd. Dòp avér batû la Mathilde Johansson e la Lucie Šafářová, la sò strada la s férma a 'l tèrs tùran ad òpra dla Marion Bartoli par 6-3 2-6 4-6. Dòp un tèrs tùran anc a Wimbledon (4-6 6-1 3-6 da la Dominika Cibulková), la pèrd subìt a Bad Gastein, a Stanford, a Carlsbad e a Cincinnati. Sōl a Turònt la vins 'n incóntar cun la Jelena Janković par pò pèrdar da la Serena Williams 1-6 6-7. A gl'US Open e a Tokyo la riva in di utàṿ, méj a Seùl in du la riva in di quàrt. La finìs 'l an cun la semifinàl in Lussembûrg pardùda cun la Viktoryja Azaranka 3-6 3-6.

Al sò 2012 al partìs cun un secónd tùran a Auckland (2-6 3-6 da l'Angelique Kerber), un prim tùran a Sydney (1-6 1-3 bandòṅ cun la Jelena Janković) e gl'utàṿ a gl'Australian Open (1-6 1-6 cóntar l'Agnieszka Radwańska). A Parì a 'l quèrt la pèrd in di quàrt da la Klára Zakopalová in tri sét, mént'r a Doha la và a cà cun la Varvara Lepchenko dòp avér batû la Nastas'sja Jakimava. In Favràr l'è bòna ad rivàr in finàl dand la paga a la Svetlana Kuznecova 2-6 7-6 6-4, a la Casey Dellacqua 6-0 6-2, a la Daniela Hantuchová 4-6 6-3 6-4 e a la Caroline Wozniacki 7-6 7-5. La tedésca la céd sōl a l'Agnieszka Radwańska par 5-7 4-6. A Indian Wells (esénd tèsta ad série nùmar quìndas) la riva in di utàṿ, farmàda incóra par la Viktoryja Azaranka 3-6 1-6. A Barcelóna a taca par lē la stagiòṅ in sla tèra batùta. In di quàrt la pèrd da la Sara Errani par 2-6 3-6. A Stucàrda la n è minga bòna ad ripétar al riśultâ d'l an pasâ parchè, dòp avér vins cun l'Anastasija Pavljučenkova par 5-7 6-3 6-4, la pèrd da la Samantha Stosur cun al puntéǵ ad 2-6 6-2 3-6. A Madrid la và fóra subìt cun la Mona Barthel mént'r a Róma, a 'l Roland Garros e a Wimbledon la riva a 'l tèrs tùran pardénd pò cun l'Angelique Kerber, l'Arantxa Rus e l'Ana Ivanović. In Aṿtòṅ la cata sù dū scunfìti da la Marion Bartoli a Tokyo e a Pechîn in di prim tùran. La fà méj in Utóbar a Linz in dua la bat in semifinàl la Kirsten Flipkens prima ad cédar in finàl a la Viktoryja Azaranka par 3-6 4-6.

In dal 2013 la riva incóra a gl'utàṿ a Melbourne in dua la lasa strada a la Na Li par 6-7 1-6. In Dubai la và fóra subìt cóntar la Sara Errani mént'r a Indian Wells la fà tèrs tùran (1-6 2-6 da la Nadia Petrova). A Charleston la bat la Julija Putinceva par 6-2 6-3 e l'Ol'ga Govorcova par 6-2 0-6 6-3 ma pò la pèrd cun la śvisra Stefanie Vögele in tri sét. A Stucàrda la s imprufìta dal bandòṅ p'r al cagaròt dla Kirsten Flipkens a 'l prim tùran (in tut al manéri la tedésca l'éra avànti sèg par 6-2 2-1) ma pò la pèrd p'r al śbrag dla scùfia cun la Petra Kvitová, 6-2 6-7 2-6. A Róma la céd par la quìnta vòlta ad fila (dòp al bandòṅ dla bielurùsa a Stucàrda in dal 2011) a la Viktoryja Azaranka par 2-6 0-6 a 'l secónd tùran. A Nurimbèrga la pèrd in di utàṿ da l'Andrea Petković, pò finalìsta. A Wimbledon invéci la và fóra subìt par 4-6 7-6 5-7 cun la nùmar 117 dal mónd, la culumbiàna Mariana Duque Mariño.

Culegamènt estéran