Anastasija Pavljučenkova

Da Wikipedia.
C'l artìcul chè 'l è scrit in Miranduléś Emiliàn


La Pavljučenkova a 'l servìsi in dal 2011


L’Anastasija Sergeevna Pavljučenkova (Samara, 3 ad Luj dal 1991, ciamàda in Rus Анастасия Сергеевна Павлюченкова, a s lèś [ɑnɑstɑˈsijə.pɑvlʉˈt͡ɕɛnkova]) l'è na tenìsta rusa, prufesiunìsta da 'l Dicémbar dal 2005, ch'l'è stada la nùmar trédas dal mónd al 4 'd Luj dal 2011. L'è élta 177 cm e la péśa 72 chilo.

L'è bòna ad dascórar in Rus, Ingléś e Francés. A gh piàś al karaoke, balàr, véd'r i amìg, scultàr la mùśica, far dal còmpri e durmìr.

In dla sò caréra l'à vins sinc tìtui WTA in singulàr (par tri vòlti qvél ad Monterrey) e quàt'r in dópi.

Caréra

La riva par la prima vòlta in dal primi sènt dal mónd in dal 2008 anc par via dal vìnsiti in quàtar turnèo ITF. In dal 2009 a Indian Wells la bat la nùmar tri dal mónd Jelena Janković e pò anc l'Agnieszka Radwańska prima ad pèrdar da l'Ana Ivanović in semifinàl.

In dal 2010 la vins dū tìtui: a Monterrey baténd la Daniela Hantuchová par 1–6 6–1 6–0 e a Istànbul cóntar l'Elena Vesnina par 5–7 7–5 6–4 (l'éra sóta 5–7 0–4). A 'l Roland Garros la pasa dū tùran prima 'd pèrdar da la Serena Williams cun al puntéǵ ad 1-6 6-1 2-6 mént'r a gl'US Open la pèrd a 'l quàrt tùran 3-6 0-6 da la Francesca Schiavone. Anc par via di quàrt tucâ a Brisbane, Duabi, Ponte Vedra Beach (in dua la céd a la Caroline Wozniacki), Pòrtrōś e a la semifinàl ad Cincinnati, la gh la cava a dvintàr una dal primi vint in clasìfica.

Un drit dl'Anastasija a gl'US Open dal 2010

In dal 2011 la riva a èsar la nùmar trédas dal mónd e la vins incóra a Monterrey (baténd la Jelena Janković) par pò rivàr in di quàrt a 'l Roland Garros (in dua la pèrd da la Francesca Schiavone) e a gl'US Open. A Miami la riva a 'l quàr tùran ma la pèrd in tri sét da la Viktoryja Azaranka. A Wimbledon la n gh và minga tant bèṅ parchè la và fóra a 'l secónd tùran p'r òpra dla Nadia Petrova. In dla Baku Cup la pèrd in di quàrt da la Galina Voskoboeva par 6-7 6-3 6-4 faghénd durànt la partìda un quèl cuma vint-sèt fai dópi.

In dal 2012 la riva in finàl a Washington pardénd da la Magdaléna Rybáriková ma la finìs 'l an a 'l 35śum pòst. In dal 2013 la pèrd la finàl ad Brisbane cóntar la Serena Williams ma la pòrta a cà incóra na vòlta al turnèo ad Monterrey baténd la tedésca Angelique Kerber par 4–6 6–2 6–4 e pò anc qvél 'd Esturìl (7-5 6-2 a la Carla Suárez Navarro).

Culegamènt estéran