Dominika Cibulková

Da Wikipedia.

C'l artìcul chè 'l è scrit in Miranduléś Emiliàn


La Cibulková tòlta śò durànt i BNP Paribas Open dal 2013
Un sò drit rabî tirâ a Carlsbad in dal 2013


La Dominika Cibulková (Bratiślàva, 6 ad Maǵ dal 1989) l'è na tenìsta śluvàca prufesiunìsta da 'l 2005. L'è élta 160 cm, la péśa 58 chilo e la stà a Bratiślàva. A gh piàś dimóndi śugàr in sla tèra rósa e in sal sintètic e la śōga 'l arvèrs a dū maṅ.

In dla sò caréra l'à vins tri tìtui WTA in tut. In di turnèo dal Gran Slam l'è stada bòna ad rivàr in finàl a gl'Australian Open in dal 2014, in semifinàl a 'l Roland Garros in dal 2009, e in di quàrt a Wimbledon (2011) e a gl'US Open (2010).

L'è la murōśa dal tenìsta austrìac Jürgen Melzer dòp ès'r-as misa p'r un pôc anc cun al francéś Gaël Monfils. La gh'à un cagnulèṅ ch'al s ciàma Pupi e la gh'à 'n débul p'r al burséti.

Caréra

In dal 2008 la riva in finàl in sla tèra vérda 'd Amelia Island pardénd però da la rusa Marija Šarapova cun al puntéǵ ad 7-6, 6-3. La śluvàca la s tōś però l'arvìnsida sèg 'l an dòp a 'l Roland Garros quànd in di quàrt la la spasa via par 6-0, 6-2 dòp avér abû anc sinc match point in sal 6-0, 5-0. In semifinàl però la pèrd da la rusa Dinara Safina.

In dal 2010 la céd in di quàrt a la Kirsten Flipkens in d'l UNICEF Open e a la Caroline Wozniacki a gl'US Open dòp avér batû la Svetlana Kuznecova.

La vins al sò prim turnèo al 23 'd Utóbar dal 2011 a Mósca baténd in sal cimènt a 'l quèrt l'èstuna Kaia Kanepi par 3-6 7-6 7-5 dòp avér pardû la stmana prima la finàla ad Linz da la Petra Kvitová par 4–6 1–6.

In dal 2012 la céd a la Sara Errani al tìtul ad Barcelóna par 2-6 2-6 ma la gh la cava listés a purtàr a cà quèl in d'l an a Carlsbad (Stat Unî) quànd la dà la paga a la Marion Bartoli 6–1 7–5.

La taca dimóndi bèṅ al 2013 cun la finàla ad Sydney (11 ad Śnar), in dua l'è bòna ad bàtar la Petra Kvitová, la Sara Errani e l'Angelique Kerber, ma la la pèrd cóntar l'Agnieszka Radwańska a n cavànd-gh-la a far suo gnanc un śōg. A 'l quàrt tùran ad Miami la fà sudàr dimóndi la Serena Williams pardénd sèg sōl par 2-6 6-4 6-2. La śluvàca la cata incóra l'americàna in di utàṿ a Róma ma 'sta vòlta la ciàpa n'imbarcàda finénd par pèrdar par 0-6 1-6. In sl'èrba la riva a 'l tèrs tùran a 'S-Hertogenbosch e a Wimbledon pardénd da la Garbiñe Muguruza Blanco par 4-6 4-6 e da la Roberta Vinci par 4-6 4-6. La Dominika la fà méj in dal cimènt americàṅ ad Stanford in dua la bat prima l'Urszula Radwańska e pò anc sò surèla Agnieszka in finàl par 3-6 6-4 6-4. A Turònt la riva invéci in di quàrt cun la Na Li ma almànc l'è bòna ad far fóra l'Angelique Kerber e la Roberta Vinci. Dòp tri prim tùr'n ad fila, a Tokyo la cata incóra al surèli Radwańska in sla sò strada: dòp avér batû l'Urszula la pèrd in di utàṿ cun l'Agnieszka.

In dal 2014 la taca faghénd i quàrt a Brisbane (3-6 3-6 da la Serena Williams) e prim tùr'n a Sydney (6-7 5-7 da l'Angelique Kerber). A Melbourne la i sćiànca tuti par rivàr in finàl, pardénd sōl un sét lung la via. La Cibulková la manda a cà in d'l órdan la Francesca Schiavone 6-3 6-4, la Stefanie Vögele 6-0 6-1, la Carla Suárez Navarro 6-1 6-0, la Marija Šarapova 3-6 6-4 6-1, la Simona Halep 6-3 6-0 e l'Agnieszka Radwańska 6-1 6-2. Dòp un prim sét dimóndi lutâ, la céd pò in finàl cun la cinéśa Na Li par 6-7 0-6.

Finàli in di Gran Slam

Turnéo An Vins/Pardû Aversàri in finàl Puntéǵ
Australian Open 2014 P Na Li 6-7 0-6

Culegamènt estéran