Polona Hercog

Da Wikipedia.

C'l artìcul chè 'l è scrit in Miranduléś Emiliàn



La Polona Hercog (Màribor, 20 ad Śnar dal 1991) l'è na tenìsta śluvéna ch'l'è stada la nùmar trénta-sinc dal mónd in singulàr al 12 ad Setémbar dal 2011. L'è élta 182 cm e la péśa 70 chilo. L'è prufesiunìsta da 'l Setémbar dal 2006. La dróa al bras dèstar e la tira 'l arvèrs a dū maṅ.

A gh piàś dimóndi magnàr al sushi e scultàr la mùśica rock e pop. A quatórd'ś an la s è stablìda in Itâglia par 'n an e mèś p'r imparàr a śugàr méj a tènis. L'à acsè anc imparâ a dascórar bèṅ in Itagliàn, óltar ch'in Ingléś e in Śluvèṅ.

In dla sò caréra l'à vins dū turnèo WTA, sèmp'r in Śvèsia a Båstad, e śugâ dū finàli, pardénd-i a Acapûlc e a Palèrum, sèmp'r in sla tèra rósa ch'l è 'l camp in du lē la s cata méj. L'à inóltar mis in dal bisachèṅ anc déś tìtui ITF.

Caréra

La Polona la taca a pistàr i camp ad tènis in dal 2006 in dua la riva in di quàrt in d'l ITF ad Róma (Canottieri 4) pardénd da l'Alizé Cornet e a 'l tèrs tùran dal qualificasiòṅ in dal turnèo WTA ad cà sua a Pòrtrōś in dua la céd in dū sét a la Tamira Paszek. In dal 2007 la vins dū tìtui ITF e la tōś part, cun na carta salvàdga, a 'l turnèo ad Pòrtrōś in dua la fà sudàr l'Elena Vesnina prima ad cédar sèg par 3-6 7-6 4-6. In dal 2008 la vins subìt dū ITF in Favràr a Majòrca. In Maǵ la s qualìfica p'r al WTA 'd Ìstanbul ma la céd a 'l prim tùran a la bùlgara Cvetana Pironkova par 4-6 5-7.

La Polona impgnàda in di US Open dal 2010
La śluvéna durànt 'n incónt'r ad Fed Cup cun la Germàgna
La Hercog tòlta śò in dal 2012 a Wimbledon

In dal 2009, dòp na semifinàl in d'l ITF ad Cali e dòp avér pardû subìt da la Camila Giorgi in d'l ITF ad sinquànta-mila dòlar ad Latìna in Mars, la riva in di utàṿ a Marbella baténd la Stéphanie Cohen-Aloro ma ciapànd-i pò da la Sara Errani ch'la la spedìs a cà cun un 6-0 7-6 in sal cupét. La stmana dòp la vins 'n àtar ITF a Sivitavècia in finàl cóntar l'Andrea Petković. A Fès la bat, dòp dū scunfìti sèg in dal 2008, la Roberta Vinci e acsè la riva par la prima vòlta in di quàrt 'd un turnèo WTA ma la pèrd da l'Alisa Klejbanova par 3-6 4-6. Cun la rusa la règla pò i cònt a 'l prim tùran dal Roland Garros (6-2 4-6 6-1 al puntéǵ) ma a 'l secónd tùran la cata 'l us sarâ da la padròna ad cà, la francéśa Aravane Rezaï. La Hercog la s cava però la vója, in dal mèś dal turnèo pariśèṅ, ad far suo àtar dū turnèo ITF da sinquànta-mila dòlar ch'i la cùcian a 'l 113śum pòst in clasìfica. In Luj la s in mét in bisàca 'n àtar da sènt-mila dòlar a Cùneo (6-1 6-2 in finàl a la Varvara Lepchenko) ma pò a Praga e a Pòrtrōś la pèrd a 'l secónd tùran prima da la milanéśa Francesca Schiavone e pò a 'l prim tùran da la parmśàna Alberta Brianti. La sèra 'l an in Lussembûrgh vinsénd cun la Maria Elena Camerin e pardénd da la Sabine Lisicki.

Dòp la semifinàl d'l an prima, la Polona la vins in dal Favràr dal 2010 al turnèo ITF ad Cali baténd in finàl par 6-4 5-7 6-2 la padròna 'd cà, la Mariana Duque Mariño. A la fiṅ dal méś a Acapûlc la bat la Carla Suárez Navarro in semifinàl par 6-3 7-5 e acsè la śōga la sò prima finàla in un turnèo WTA ma la pèrd in tri sét da la Venus Williams. Dòp soquànt turnèo andâ mâl, la riva a 'l tèrs tùr'n a 'l Roland Garros in Maǵ dand la paga a la Lucie Šafářová 6-1 6-2 ma pò la fà sù tri śōg e pò basta cun la Flavia Pennetta. In Istâ la riva in di quàrt a Bùdapest, Praga e a Cupenàghen faghénd méj a Pòrtrōś in dua la pèrd in semifinàl cun l'Anna Čakvetadze par 6-0 2-6 2-6. La finìs 'l an pardénd in di quàrt in Lussembûrgh cun l'Angelique Kerber 4-6 2-6.

A 'l inìsi dal 2011 la mùcia sù sōl di prim e di secónd tùran. La gh'à da spetàr al turnèo ad Monterrey par far méj. Baténd l'Angelique Kerber 6-3 6-3, la Barbora Záhlavová-Strýcová 6-4 6-7 6-2 e l'Ol'ga Govorcova 4-6 6-3 6-3 la riva in semifinàl ma chè la pèrd par 3-6 2-6 cun la nùmar siē dal mónd, la Jelena Janković. A Róma la pasa 'l qualificasiòṅ ma la s férma in di utàṿ cun la Samantha Stosur. In Luj la s mét in bisàca al sò prim tìtul WTA a Båstad pigànd in finàl la Johanna Larsson par 6-4 7-5. La śluvéna la rìsćia ad far-an sù 'n àtar subìt dòp a Palèrum in dua la bat tri itagliàni (Karin Knapp, Alberta Brianti e Flavia Pennetta) e na céca (Klára Zakopalová) ma minga l'Anabel Medina Garrigues in finàl (3-6 2-6 al puntéǵ). A gl'US Open la manda subìt a cà la Bethanie Mattek-Sands ma a 'l secónd tùran la i ciàpa da la Nadia Petrova, vinsidōra sèg par 6-2 6-4. In Setémbar a Seùl la bat la Zuzana Kucová 6-0 6-2, la Carla Suárez Navarro 6-3 7-5 e la Dominika Cibulková 6-3 6-1 ma pò la i bèca da la Galina Voskoboeva ch'la léva la crésta sèg par vinsénd fàcil 6-1 6-4. Dòp un prim tùran vinsènt cun la Laura Robson a Pechîn, la pèrd i sò ùltim tri incóntar dla stagiòṅ cun la Viktoryja Azaranka in Cina, cun la Sara Errani a Linz e cun la Dominika Cibulková a Mósca.

In dal 2012 i prim tùr'n i cuntìnuan a Brisbane (1-6 1-4 bandòṅ cun l'Anastasija Pavljučenkova), a Sydney (3-6 3-6 cun la Marion Bartoli), a Melbourne (3-6 6-7 cun la Julia Görges), a Parì a 'l quèrt (2-6 2-6 da la Chanelle Scheepers), a Doha (0-6 4-6 cun la Cvetana Pironkova), in Dubai (6-1 5-7 6-7 cun la Daniela Hantuchová) e a Indian Wells (0-6 1-6 cun la Jamie Hampton). In mèś anc dū scòpli c'n al Giapòṅ in Fed Cup. La Polona la taca a vìnsar a Miami, in dua la riva a 'l secónd tùran, ma incóra da piò in sla tèra vérda ad Charleston in dua la manda a cà la Kimiko Date, la Varvara Lepchenko, la Marion Bartoli e la Nadia Petrova ma in semifinàl la finìs stlada 0-6 0-6 da la Lucie Šafářová. La śluvéna la vins pò sōl 'n incóntar in di siē turnèo a vgnir ma pò in Śvèsia l'ardópia 'l tìtul d'l an prima baténd a Båstad l'Aleksandra Panova, la Julia Görges, la Cvetana Pironkova, la Mona Barthel e la Mathilde Johansson in finàl par 0-6 6-4 7-5. A Dallas la và fóra a 'l secónd tùran cun la Roberta Vinci, pèś a gl'US Open in dua la céd subìt in dū sét a la Petra Kvitová. In Aṿtòṅ a Pechîn la śōga cun tri rusi ad fila. Cun l'Anastasija Pavljučenkova e cun l'Ekaterina Makarova la gh và bèṅ, cun la Marija Šarapova nò.

In dal 2014, dòp un prim tùr'n a gl'Australian Open (4-6 1-6 da la Varvara Lepchenko), l'è custréta a farmàr-as par quàtar méś crudànd śò in clasìfica a la puśisiòṅ 133 dal mónd. Par tiràr-as sù la śōga 'n ITF da vintsìnc-mila dòlar a Màribor e l'al vins. In Śugn la riva in di quàrt a Nurimbèrga pardénd in tri sét da la Lucie Šafářová. A Palèrum la và fóra a 'l secónd tùran cóntar la Roberta Vinci ma prima la fà in tèmp a far par tri vòlti ad fila al gèst dl'umbrèla a 'n giùdas 'd lìnéa ch'al gh'iva ciamâ un fal ad pē durànt un sò servìsi. La śluvéna la mét i quèi in para vinsénd la stmana dòp 'l ITF 'd Olomouc da sènt-mila dòlar sćiancànd tut chi atri pardénd sōl quatórdas śōg in sinc partìdi, l'ultma cun la Katarzyna Piter in finàl. In Agóst la và a śugàr in di Stat Unî ma la cumbìna pôc là, secónd tùr'n a Cincinnati (4-6 7-5 4-6 da la Sara Errani) e prim tùr'n a New Haven (1-6 1-3 bandòṅ cun l'Alexandra Mueller, carta salvàdga nùmar 462 dal mónd) e a gl'US Open (2-6 4-6 da l'Ekaterina Makarova). A Quebec City la fà fóra la tèsta 'd série nùmar òṅ dal tablòṅ, la Kirsten Flipkens, ma pò la gh'à da far al valìś in di quàrt cun la Christina McHale par 6-1 6-7 3-6. A Pechîn, da qualificàda, la bat la Mónica Puig par 6-1 6-4 e pò anc l'Ana Ivanović par 6-4 6-4 prima ad patìr na scòpla da l'Agnieszka Radwańska par 0-6 2-6. A Uśàka in Utóbar la s imprufìta dal bandòṅ dla Sabine Lisicki par rivàr sénsa sudàr in di quàrt ma chè la patìs un 6-7 6-2 1-6 da la śugadōra 'd cà, la Kurumi Nara.

Culegamènt estéran