Lucie Hradecká
|
C'l artìcul chè 'l è scrit in
Miranduléś |
La Lucie Hradecká (Praga, 21 ad Maǵ dal 1985, a s lèś [ˈlutsɪjɛ ˈɦradɛtskaː]) l'è na tenìsta céca. L'è élta 177 cm e la péśa 72 chilo. La tira drit e arvèrs cun al dū maṅ anc s'al sò bras bòṅ al sarés al dèstar.
Sò pàdar Karel 'l è mìstar ad tènis (prima al fava al cōg), sò màdar Pavla invéci l'è n'infarméra. La gh'à un cunèṅ da cà. L'è bòna ad dascórar in Céc, in Ingléś e in Tedésc, ma sōl un cicinèṅ. I film ch'i piàśan da piò i èṅ Mamma mia e Pretty woman.
In dla sò caréra 'l à vins daśdòt tìtui ITF in singulàr. In dópi, in dua l'è deciśamènt più fòrta, invéci l'à mis in bisàca sédas tìtui WTA e trénta ad qvéi ITF. Sèmp'r in dópi l'à vins al Roland Garros dal 2011 (insém a la Andrea Hlaváčková) e l'è rivàda in finàl a Wimbledon e a gl'US Open in dal 2012, faghénd anc la semifinàl a gl'Australian Open.
P'r al sò paéś l'à vins la mdaja 'd argìnt a gl'Ulimpìadi dal 2012.
Caréra
La céca la taca a śugàr in dal sircùit ITF in dal 2002. In dal 2003 la riva in finàl in qvél ad Pòla e pò la in vins òṅ in Ulànda in Avrìl. In Setémbar la mùcia sù n'atra finàl a Mèstar e al sò secónd tìtul in Śluvàcchia.
In dal 2004 la próa la sò bravitù a Buchèṅ ma l'Amanda Keen la la bat in dla semifinàl dal turnèo. In Mars, Avrìl e Maǵ la vins àtar tri ITF in Cruàsia e pò 'n àt'r incóra in Śugn in Repùblica céca. In Setémbar la pòrta a cà al tìtul ad Durmersheim (Germâgna) e la riva in semifinàl a Bjèla (3-6 2-6 da la Virginie Razzano). La sèra 'l an a 'l 258śum pòst in clasìfica.
A 'l inìsi dal 2005 la céca la riva in finàl in un ITF in Germâgna par pò vins'r-an 'n àtar in Śluvègna. In Luj la Hradecká la vèṅ a Mòdna par śugàr al qualificasiòṅ dal turnèo WTA emigliàṅ ma la và fóra subìt cun l'Ekaterina Bychkova par 3-6 4-6. La céca la n è bòna ad pasàr-i gnanc a Bùdapest, a gl'US Open, a Pòrtrōś e a Filderstadt. In Nuvémbar però la pōl far fèsta listés parchè la vins 'l ITF ad Praga in finàl cóntar l'Agnieszka Radwańska par 4-6 6-1 7-6.
Al sò 2006 al taca a 'l arvèrsa. La Lucie la pasa 'l qualificasiòṅ 'd un turnèo WTA sōl in Luj a Bùdapest, dand la paga a la Zuzana Kučová e a la Michaela Paštiková. A 'l prim tùran la piga incóra l'Agnieszka Radwańska par 4-6 7-6 6-3 ma pò la céd a la Lourdes Domínguez Lino par 6-7 4-6. In Setémbar la pèrd subìt a Pòrtrōś e la finìs la stagiòṅ a 'l nùmar 174 dal mónd. Incóra pèś la gh và in dal 2007 parchè la n cumbìna gnint par tut 'l an (a part un tìtul ITF a Gurìsia) e la cróda acsè śò in fiṅ a la puśisiòṅ 241 dal ranking.
La céca la fà fadìga anc in di prim méś dal 2008. In di ITF ad Minsk e ad Bari la pèrd a 'l secónd tùran da l'Anastasija Pavljučenkova e in semifinàl da l'Arantxa Rus. In Avrìl la s qualìfica p'r al turnèo WTA ad Praga ma la céd subìt par 2-6 3-6 a la nùmar sédas da mónd, la Vera Zvonarëva. Dòp na finàla pardùda in d'l ITF ad Firénse (1-6 3-6 cun la Jelena Dokić), in Istâ la taca a far dabòṅ rivànd in finàl a Bad Gastein (in dua la pèrd da la francéśa Pauline Parmentier par 4-6 4-6) e vinsénd un tìtul ITF in Germâgna. In di ùltim quàtar ITF d'l an però la vins sōl dū incóntar pardénd invéci cun la Stéphanie Foretz Gacon, cun l'Iveta Benešová, cun la Jaroslava Švedova e cun l'Angelique Kerber.
In dal Favràr dal 2009 la céca la s pòrta a cà al tìtul ITF dla Franca Cuntèa ad Belfort, 6-3 6-2 in finàl cun la Vesna Dolonc e anc qvél ad Midland (Stat Unî) cóntar l'Eleni Daniilidou. In Avrìl la và a śugàr in Maròc a Fès rivànd in di quàrt (4-6 2-6 da la Melinda Czink). A Staśbûrg la riva in finàl ma la la pèrd par 6-7 1-6 cun la śugadōra ad cà, l'Aravane Rezaï. A Wimbledon la fà sudàr a 'l prim tùran l'Ana Ivanović ch'la gh'à la méj sèg sōl par 5-7 6-2 8-6. In Luj la pèrd in di quàrt ad Praga da la Sybille Bammer. A la fiṅ dal méś la và in Turchìa par tōr part a 'l turnèo WTA da 220.000 dòlar 'd Ìstanbul. Chè la riva incóra na vòlta in finàl (baténd anc al tedéschi Julia Görges e Andrea Petković) ma lè la vèṅ sćiancàda par 0-6 1-6 da la rusa Vera Duševina. La stagiòṅ in sal cimènt nord-americàṅ la và invéci dimóndi mâl, difàti la n pasa briśa 'l qualificasiòṅ a Turònt (4-6 2-6 da la Roberta Vinci) e a New Haven (1-6 3-6 da la Cvetana Pironkova). A gl'US Open (in dua la gh'à di punt asè) la và a cà subìt paténd un 4-6 5-7 da l'Elena Vesnina ma anc a Shrewsbury (ITF ingléś da 75.000 dòlar) e a Linz la n vins gnanc na partìda, andànd sóta cun la nùmar 529 dal mónd Mona Barthel e cun la ruména Ioana Raluca Olaru. La finìs 'l an cun un secónd tùran in Lussembûrgh (5-7 6-3 2-6 da la Daniela Hantuchová) e cun i quàrt e gl'utàṿ in di ITF francéś ad Poitiers (6-7 3-6 da la Jelena Dokić) e ad Nantes (4-6 5-7 da l'Elena Bovina).
In dal 2010 la Lucie la fà 'l valìś subìt a Brisbane e a Melbourne. In d'l ITF ad Midland la pèrd in finàl da la scuséśa Elena Baltača par 7-5 2-6 3-6. A Acapûlc, Monterrey, Indian Wells, Miami, Barcelóna e Fès la và fóra subìt e cuma s'a n fus minga abàsta la gh śònta in cal méntar anc dū scòpli in Fed Cup cun la Flavia Pennetta e la Sara Errani. La tórna a vìnsar in d'l ITF ad Praga in dua la bat in semifinàl la Corinna Dentoni 6-3 6-3 e in finàl l'Ajla Tomljanović 6-1 7-6. In dla capitàla céca la gh śōga anc al turnèo WTA in Luj in dua la riva in semifinal cun l'Ágnes Szávay ma l'ungheréśa la la bat in dū sét. A Bad Gastein l'è invéci l'austrìaca Yvonne Meusburger a dar-ag un daspiaśēr a 'l secónd tùran. In Agóst la pasa 'l qualificasiòṅ a Montreal pigànd 6-4 7-5 l'Alizé Cornet ma la céd a 'l prim tùran a l'Ekaterina Makarova par 0-6 4-6, stés quèl anc in di US Open cun la Petra Kvitová ch'la vins sèg cun al puntéǵ ad 6-4 7-5. Dòp na finàla ITF pardùda a Mèstar, la Lucie la fà prim tùran in Lussembûrgh (2-6 3-6 da la Kirsten Flipkens) ma in Nuvémbar la fà suo al tìtul ITF ad Nantes srand acsè la stagiòṅ a la puśisiòṅ 111 dal mónd.
La céca la taca la stagiòṅ 2011 pasànd al qualificasiòṅ a Brisbane spedénd a cà la Petra Martić, la Sorana Cîrstea e la Christina McHale ma pò la gh'à da pigàr-as a la Samantha Stosur par 6-7 1-6. Anc a Sydney la fà al parcōrs cumpàgn e anc 'sta vòlta la fà 'l valìś subìt cun la Flavia Pennetta cun al puntéǵ ad 4-6 3-6. Dòp 'n àtar prim tùran a gl'Australian Open (4-6 5-7 da la parmśàna Alberta Brianti), la Lucie la s mét in bisàca al tìtul ITF ad Midland da sènt-mila dòlar baténd in dla sò strada la Jamie Hampton, l'Anna Tatishvili, la Sabine Lisicki, la Ksenija Pervak e l'Irina Falconi. A Memphis la vèṅ batùda in semifinàl par la Magdaléna Rybáriková 2-6 6-4 4-6 mént'r a Monterrey, Indian Wells e a Miami la fà secónd tùran, pardénd via via cun la Ksenija Pervak 2-6 7-6 3-6, cun la Shuai Peng 3-6 6-4 5-7 e cun la Viktoryja Azaranka 5-7 6-4 0-6. A Barcelóna la và dimóndi davśèṅ a vìns'r al sò prim turnèo WTA: dòp avér batû l'Iveta Benešová, la Gisela Dulko, l'Estrella Cabeza Candela e la Sara Errani, la Hradecká la pèrd in d'l ùlt'm incóntar da la Roberta Vinci par 6-4 2-6 2-6. In Maǵ la vins al tìtul ITF ad Praga avénd-ag la méj su la Paula Ormaechea par 4-6 6-3 6-2. A Straśbûrg la céd in di quàrt a la còrsa Marion Bartoli mént'r a 'l Roland Garros la fà secónd tùran cun l'Andrea Petković. Quànd a pâr ch'l'àppia tòlt al via, la Hradecká la s inciòld'incóra, cun i prim tùran a Wimbledon, Bùdapest, Bad Gastein, Carlsbad, Turònt, Cincinnati, New Haven, US Open e Pechîn. Finalmènt la tórna a vìnsar in dal turnèo dal Lussembûrg in dua la riva in di quàrt baténd la Daniela Hantuchová e l'Alexandra Cadanțu prima ad lasàr strada a la Monica Niculescu par 4-6 4-6. La finìs 'l an a 'l nùmar 51 dal mónd, dòp avér pardû a 'l prim tùran d'l ITF ad Poitiers da la Nastassja Burnett.
In dal 2012 la s fà nutàr cun i quàrt a Auckland (2-6 3-6 da la Jie Zheng) e la semifinàl a Madrid in dua l'è bòna ad far fóra, pasànd anc p'r al qualificasiòṅ, la Shuai Peng 6-4 5-7 6-4, la Petra Kvitová 6-4 6-3, l'Ekaterina Makarova 6-2 7-6 e la Samantha Stosur 7-6 7-6 prima ad cédar a la Serena Williams par 6-7 0-6. A 'l Roland Garros e a Wimbledon la pèrd subìt da 'l tedéschi Julia Görges e Angelique Kerber. In Setémbar a Quebec City la gh'à n'atra ucaśiòṅ par mét'r-as in bisàca al sò prim tìtul WTA (baténd però sōl na carta salvàdga e tri qualificàdi) ma la s la fà scapàr via pardénd 1-6 5-7 da la Kirsten Flipkens. La finìs la stagiòṅ pardénd in di utàṿ a Linz da la Sofia Arvidsson e in di quàrt, incóra da la Monica Niculescu, in Lussembûrg.
La taca al 2013 incruśànd l'Anastasija Pavljučenkova a Brisbane e pardénd-ag par 3-6 6-3 3-6. A gl'Australian Open la bat la Kiki Bertens 6-2 7-6 ma pò la céd a l'Angelique Kerber, nùmar sinc dal mónd, par 3-6 1-6. Dòp tri prim tùran e na scunfìta subìt in dal qualificasiòṅ ad Madrid a òpra dla Julija Putinceva, la riva in finàl a Straśbûrg baténd la Flavia Pennetta 1-6 6-3 6-1 ma pò la la pèrd, par la sèsta vòlta su siē, cun la padròna ad cà, l'Alizé Cornet, cun al puntéǵ ad 6-7 0-6. A Wimbledon la và a cà a 'l prim tùran sóta i cólp dla Karin Knapp e la fà cumpàgn anc a Bùdapest cun l'Annika Beck dòp avér dasfrutâ un bye.