Red Hot Chili Peppers

Da Wikipedia.

C'l artìcul chè 'l è scrit in Miranduléś Emiliàn

Al grup tòlt śò durànt al Pinkpop Festival dal 2006


«
What I've got you've got to give it to your mamma, what I've got you've got to give it to your pappa, what I've got you've got to give it to your daughter, you do a little dance and then you drink a little water, what I've got you've got to get it put it in you.»
(EN)(Give It Away, 1991)
«
Qvél ch'a gh'ò at gh'à da dar-'l a tò màdar, qvél ch'a gh'ò at gh'à da dar-'l a tò pàdar, qvél ch'a gh'ò at gh'à da dar-'l a tò surèla, bala p'r un pôc e bév un gós 'd àqua, qvél ch'a gh'ò tó'l e mét-at-al dèntar.»
(MUD)


I Red Hot Chili Peppers i èṅ un grup rock califurgnàṅ mis in pē in dal 1983 a Los Angeles. In dal 2002 i èṅ finî in dla Rock and Roll Hall of Fame.

In dla lōr caréra i aṅ misćiâ soquànt gènar, sovra ad tut funk, rap, hard rock, heavy metal, punk rock e pò alternative rock e pop rock. I èṅ stâ bòṅ ad véndar da piò ad stanta migliòṅ ad disc, vint-a-dū in di Stat Unî.

Biugrafìa

Gl'inìsi

Hillel Slovak
Anthony Kiedis tòlt śò in dal 2003
Chad Smith da drē da la baterìa
Al chitarìsta John Frusciante

Al grup al tōś al via par mèrit ad tri ragàs dla Fairfax High School ad Los Angeles, al basìsta e ex mémbar di Fear Michael "Flea" Balzary, al cantànt Anthony Kiedis e al chitarìsta Hillel Slovak. A chi lōr a s śònta prèst anc al baterìsta Jack Irons. Dòp avér druâ al nóm ad Tony Flow and the Miraculously Majestic Masters of Mayhem, i decìdan ad sarnìr qvél ad Red Hot Chili Peppers e i fìrman un cuntràt cun la EMI par far vgnir fóra in dal 1984 'n àlbum umònim cun Jack Sherman a la chitàra e Cliff Martinez a la baterìa. Al sìngul tirâ fóra da 'd lè 'l è Get Up and Jump méntar p'r al braṅ True Men Don't Kill Coyotes a vèṅ fat sōl al vìddeo. Cal lavōr lè al n vénd minga tant, Sherman al s in và par far pòst incóra a Slovak.

Al secónd disc Freaky Styley a véd la luś al 16 'd Agóst dal 1985 e al misćia méj al funk e al punk cun i sìngui Jungle Man e Hollywood (Africa). Qvést chè al vénd bèṅ abàsta e al grup al pōl partìr p'r un tour in di Stat Unî, in Germâgna e in Inghiltèra.

Cun al tèrs lavōr, The Uplift Mofo Party Plan dal 1987, al grup al fà sèntar, faghénd-as cgnósar cun al sìngul Fight Like a Brave (i àt'r i èṅ Me & My Friends e Behind the Sun). I tèst i èṅ dirèt e spurcaciòṅ: la canta Party on Your Pussy (Fèsta in dla tò pèpa) la gh'à da cambiàr nóm in Special Secret Song Inside. Quànd al ròbi i pàr'n andàr p'r al vèrs giùst, subìt dòp al ritóran da i cuncèrt europèo, al 27 ad Śugn dal 1988 Slovak al vèṅ catâ mòrt par n'uverdóś in dla sò cambra 'd albêrg a Los Angeles. Irons al decìd ad mulàr incòsa p'r andàr a lauràr cun àtar grup cuma i Pearl Jam e gl'Eleven.

I prim sucès

In d'l Agóst dal 1989 al grup, cun i mémbar nóṿ Chad Smith a la baterìa e John Frusciante a la chitàra, i faṅ catàr in di negòsi Mother's Milk ch'a gh la cava a tucàr la puśisiòṅ nùmar 52 in dla clasìfica americàna dla Billboard, anc par via ad sìngui ad sucès cuma Knock Me Down, scrita p'r arcurdàr al pòvar Hillel Slovak, e Higher Ground, cover ad Stevie Wonder. Qvést chè 'l è 'l ùltim lavōr cun la EMI parchè la banda in dal 1990 la sarnìs la Warner Bros. Records.

«
If you see me getting mighty, if you see me getting high, knock me down, I'm not bigger than life, I'm tired of being untouchable, I'm not above the love, I'm part of you and you're part of me, why did you go away, too late to tell you how i feel, I want you back but i get real, can you hear my falling tears making rain where you lay.»
(EN)(Knock Me Down, 1989)
«
S'at véd ch'a sòṅ drē a dvintàr arugànt, s'at véd ch'a sòṅ drē a far-um, dà-'m śò, a n sòṅ minga più impurtànt dla vita, a sòṅ stuf 'd èsar intucàbil, a n sòṅ minga ad sōvar 'd 'l amōr, mè a sòṅ part ad tè e tè part ad mè, parchè sē't andâ via? Adès 'l è tròp tard par dir-at qvél ch'a gh'ò dèntar, a t vój indrē ma a sò cum i vàn'n i quèi, pó't sintìr al mè làgarmi ch'i càscan śò dvintànd pióva in du at pòns tè?»
(MUD)

Cun al prudutōr Rick Rubin al grup al dà vita in dal 1991 a 'l sò disc più vindû (da piò ad quìndas migliòṅ ad còpi) e ad sucès, Blood Sugar Sex Magik (Sangṿ, Sùcar, Sès, Incantéśum). 'L àlbum, vgnû fóra al 24 ad Setémbar dal 1991 dòp un lavōr ad siē méś, 'l è dimóndi lung, durànd stànta-quàtar minùt in tut cun darsèt pès, e 'l è impinî ad sìngui fra i più cgnusû dal grup cuma Under the Bridge, Suck My Kiss, Breaking the Girl ma, sōv'r ad tut, Give It Away, vinsidōr 'd un Grammy in dal 1993.

«
Sometimes I feel like I don't have a partner, sometimes I feel like my only friend is the city I live in, the city of angels, lonely as I am, together we cry.»
(EN)(Under The Bridge, 1991)
«
Dal vòlti a m sènt cuma s'a n gh'is mia na cumpàgna, dal vòlti a m sènt cuma s'l ùnic amìg ch'a gh'ò al fus la sità in du a viṿ, la sità di àngil, da par lē cuma mè, insém a pianśém.»
(MUD)

One Hot Minute e Californication

In dal Maǵ dal 1992 Frusciante, cun di prubléma 'd eruìna e cun i sò cumpàgn, al lasa 'l grup durànt la tapa giapunéśa dal tour. Cun al rimpiàs Arik Marshall i sònan a Lollapalooza ma pò in dal 1993 i Red Hot Chili Peppers i tōśan prima Jesse Tobias di califurgnàṅ Mother Tongue e pò 'l èx di Jane's Addiction, Dave Navarro.

In dal 1994 i sònan a Woodstock vistî cun dal tuti ad metàl impinìdi ad lampadìni. 'L an dòp al grup al regìstra al sèst disc in studi, One Hot Minute, vindû a partìr da 'l 12 ad Setémbar. Al lavōr, ch'al misćia insém funk e rock ma anc dal metal, al vénd bèṅ abàsta, sinc migliòṅ ad còpi, cun sinc sìngui: Warped, My Friends, Aeroplane, Shallow Be Thy Game e Coffee Shop. La canta finàla, Transcending, l'è dedicàda a 'l atōr mòrt śóvan River Phoenix, vèć amìg dal grup.

«
I'm a little pea, I love the sky and the trees, I'm a teeny tiny little ant, checking out this and that, I am nothing so you have nothing to hide, and I'm a pacifist so I can fuck your shit up, oh yeah I'm small, fuck you asshole, you homophobic redneck dick, you're big and tough and macho, you can kick my ass, so fucking what.»
(EN)(Pea, 1995)
«
A sòṅ n'arvèa pìcula, i m piàś'n al cēl e gl'àlbar, a sòṅ na furmighìna ch'la tasta qvést chè e quàl lè, a n sòṅ gnint dònca ta n gh'à gnint da lugàr, e a sòṅ un paśifìsta acsè a pòs ruinàr-at la vita, sè a sòṅ pìcul, và a dar via al cûl tè omofòbic còl rós dal cas, at sē grôs e fòrt e masć, ta m pó śbragàr al cûl, cas m in fréga.»
(MUD)

Mémbar

Qvéi 'd adès

Qvéi vèć

Discugrafìa

I Red Hot Chili Peppers da 'l viṿ a Turònt in dal 2006

Àlbum

  • The Red Hot Chili Peppers 1984
  • Freaky Styley 1985
  • The Uplift Mofo Party Plan 1987
  • Mother's Milk 1989
  • Blood Sugar Sex Magik 1991
  • One Hot Minute 1995
  • Californication 1999
  • By the Way 2002
  • Stadium Arcadium 2006
  • I'm with You 2011
  • The Getaway 2016
  • Unlimited Love 2022
  • Return of the Dream Canteen 2022

da 'l Viṿ

  • Live in Hyde Park 2004
  • 2011 Live EP 2012

Racòlti

  • What Hits!? 1992
  • Out in L.A. 1994
  • Live Rare Remix Box 1994
  • The Plasma Shaft 1994
  • Greatest Hits - Ten Best Series 1994
  • The Best Of - Ten Best Series 1997
  • Under the Covers: Essential Red Hot Chili Peppers 1998
  • The Greatest 1998
  • Greatest Hits 2003
  • Rock & Roll Hall Of Fame Covers EP 2012

Sìngui

  • Get Up and Jump 1984
  • Jungle Man 1985
  • Hollywood (Africa) 1985
  • Fight Like a Brave 1987
  • Knock Me Down 1989
  • Higher Ground 1989
  • Taste the Pain 1990
  • Show Me Your Soul 1990
  • Give It Away 1991
  • Under the Bridge 1991
  • Suck My Kiss 1992
  • Breaking the Girl 1992
  • Behind the Sun 1992
  • If You Have to Ask 1993
  • Soul to Squeeze 1993
  • Warped 1995
  • My Friends 1995
  • Aeroplane 1996
  • Coffee Shop 1996
  • Shallow Be Thy Game 1996
  • Love Rollercoaster 1997
  • Scar Tissue 1999
  • Around the World 1999
  • Otherside 2000
  • Californication 2000
  • Road Trippin' 2000
  • By the Way 2002
  • The Zephyr Song 2002
  • Can't Stop 2003
  • Dosed 2003
  • Universally Speaking 2003
  • Fortune Faded 2003
  • Dani California 2006
  • Tell Me Baby 2006
  • Snow (Hey Oh) 2006
  • Desecration Smile 2007
  • Hump de Bump 2007
  • The Adventures of Rain Dance Maggie 2011
  • Monarchy of Roses 2011
  • Look Around 2012
  • Brendan's Death Song 2012

Videugrafìa

  • 1988 - Red Hot Skate Rock
  • 1989 - Positive Mental Octopus
  • 1990 - Psychedelic Sexfunk Live from Heaven
  • 1991 - Funky Monks
  • 2001 - Off the Map
  • 2002 - By the Way
  • 2003 - Greatest Hits and Videos
  • 2003 - Live at Slane Castle

Culegamènt estéran