Poison

Da Wikipedia.

C'l artìcul chè 'l è scrit in Miranduléś Emiliàn

I Poison tòlt śò in dal 2008, da sinìstra: DeVille, Michaels e Dall


«
Although we both lie close together, we feel miles apart inside, was it something I said or something I did, did my words not come out right, though I tried not to hurt you, though I tried but I guess that’s why they say. Every rose has its thorn just like every night has its dawn.»
(EN)(Every rose has its thorn, 1988)
«
Anc s'a sém dastéś datéś, ad dèntar a s sintém luntàṅ di chilómetar, è'l stâ quèl ch'a-j-ò dit o fat? Al mè paròli eṅ-i minga vgnudi fóra bèṅ? Anc s'a n iva minga pruvâ a n frìr-at, anc s'a-j-ò pruâ a créd ch'a sia par quàl lè ch'a s diś. Tut al róśi i gh'aṅ al sò spini pròpria cum tut al nòt i gh'aṅ al sò albi.»
(MUD)


I Poison (Vlèṅ) i èṅ un grup hard rock americàṅ dla Pennsylvania fundâ in dal 1984. In dla lōr caréra i aṅ vindû sinquànta migliòṅ ad disc a 'l incìrca.

Biugrafìa

Al logo dal grup

I Poison i s mét'n insém in dal 1983 a Mechanicsburg, un pòst davśèṅ a Harrisburg in dla Pennsylvania, cun al nóm ad Paris. I gh fàvan part Bret Michaels a la vóś, Matt Smith a la chitàra, Bobby Dall a 'l bas e Rikki Rockett a la baterìa e i sunàvan 'l hair metal faghénd anc dal cover di Motley Crue, Quiet Riot, Judas Priest, Kiss e Aerosmith. In dal 1985 i sa spòstan a la Los Angeles pascànd al sucès e i càmbian nóm in Poison. In cal méntar al chitàrista, ch'al gh'iva 'd avér fiōl, al mòla 'l grup e al sò pòst a vèṅ tòlt C.C. DeVille. I quàt'r i tac'n a sunàr in un club dla West Hollywood ciamâ Troubadour.

In dal 1986 l'Enigma Records la i mét sóta cuntràt par trénta-mila dòlar. Al 2 'd Agóst al grup al fà gnir fóra Look What the Cat Dragged In (Guardâ cuś 'l à purtâ a cà 'l gat), cun dént'r i sìngui Cry Tough, I Want Action, I Won't Forget You e Talk Dirty to Me, ch'al vénd dū migliòṅ ad còpi. 'L an dòp i rigìstran la cover ad Rock And Roll All Nite di Kiss p'r al film Al di là di tutti i limiti.

CC DeVille tòlt śò in dal 2008

In dal Maǵ dal 1988 'l è la vòlta 'd Open Up and Say...Ahh! (Vrî e dgî...Ahh!), 'l àlbum dal grup ch'l à muciâ più sucès ad tut chi àtar e ch'l à vindû òt migliòṅ ad còpi in tut al mónd. Cal disc chè al gh'à déntar tri di sìngui più cgnusû dal grup cuma Every Rose Has Its Thorn, Nothin' but a Good Time e la cover di Loggins and Messina Your Mama Don't Dance. Anc al lavōr dal 1990, Flesh & Blood (Carna e sangṿ), cuciâ in élt da i braṅ Unskinny Bop, Something to Believe In e Ride The Wind, al vénd bèṅ (da piò ad sèt migliòṅ ad còpi e secónd pòst in dal clasìfichi americàni).

Dòp al disc da 'l viṿ Swallow This Live (Manda śò cal cuncèrt chè ma anc Manda'l śò viṿ) dal 1991, C.C. DeVille al lasa al grup par di mutìṿ suo. Cun al nóṿ Richie Kotzen a la chitàra, i Poison i rigìstran Native Tongue (Léngua natìva) in dal 1993, disc famóś specialmènt p'r al sìngul Stand. Chi lò al rèsta in dal grup sōl par cal lavōr lè. In Crack a Smile...and More! (Próa 'n suriśèṅ...da Piò!) dal 2000 a gh sòna Blues Saraceno, ch'al rivàva da i Kingdom Come, ma 'l véndidi i las'n a deśideràr. Ch'al disc chè al gh'à mis siē an a vgnir fóra parchè Michaels 'l iva fat 'n incidènt grav cun la sò Ferrari, śbragànd-'s i òs a 'l naś, ganàsa, stéran, dida e dènt. La cà discugràfica pò la 'l à lasâ da na banda sarnénd ad dar in past a i fans la racòlta 1986-1996: Poison's Greatest Hits.

In dal 1998 DeVille al tórna in di rang e al grup fà vgnir fóra un secónd disc da 'l viṿ, Power to the People (Putēr a la gint). In dal 2002 a véd la luś Hollyweird e pò in dal 2007 un disc ad cover, Poison'd!.

Al 22 'd Avrìl dal 2010 Bret Michaels al và a 'l uśdàl ad cursa parchè al pardìva dal sangṿ a 'l sarvèl. Malâ da tèmp 'd abêt, dòp soquànt dè ad ricòvar in dua 'l iva pardû la vóś e risćiâ la mòrt, Michaels al s armét, psénd acsè turnàr a far la sò vita ad rocker. Al sò dutōr Joseph Zabramski al fà savér che sōl al 10 o al 20% dla gint ch'la patìs un quèl cum al suo pò la gh la cava a turnàr a pòst.

Cumpunènt

Al cantànt di Poison, Bret Michaels

Quéi 'd adès

  • Bret Michaels - vóś, chitàra (1983-incō)
  • C.C. DeVille - chitàra (1985-1991, 1996-incō)
  • Bobby Dall - bas (1983-incō)
  • Rikki Rockett - baterìa (1983-incō)

Mémbar vèć

  • Matt Smith - chitàra (1983-1985)
  • Richie Kotzen - chitàra (1991-1993)
  • Blues Saraceno - chitàra (1993-1996)

Discugrafìa

Àlbum

  • 1986 - Look What the Cat Dragged in
  • 1988 - Open Up and Say...Ahh!
  • 1990 - Flesh & Blood
  • 1993 - Native Tongue
  • 2000 - Crack a Smile...and More!
  • 2002 - Hollyweird
  • 2007 - Poison'd!

Da 'l Viṿ

  • 1991 - Swallow This Live
  • 2000 - Power to the People
  • 2006 - Great Big Hits Live! Bootleg
  • 2006 - Seven Days Live
  • 2008 - Live, Raw & Uncut

Racòlti

  • 1996 - Poison's Greatest Hits: 1986–1996
  • 2001 - Poison – Rock Champions
  • 2003 - Best of Ballads & Blues
  • 2006 - The Best of Poison: 20 Years of Rock
  • 2010 - Poison - 10 Great Songs
  • 2011 - Double Dose: Ultimate Hits

Culegamènt estéran