Heavy metal

Da Wikipedia.

C'l artìcul chè 'l è scrit in Miranduléś Emiliàn

Gl'Iron Maiden
Gl'AC/DC
La Doro Pesch


«
Between the eyes I hear it screaming and it electrifies your inner feelings, hot shock waves charge the air, all heads are banging, fists pumping everywhere, guitars are cranking. Heavy Metal, Heavy Metal what do you want.»
(EN)(Heavy metal, Judas Priest)
«
In mèś a i òć a 'l sènt sigàr e dar energìa a i tò sentimènt ch'at gh'à dèntar, óndi 'd urt bujénti i càrgan l'ària, tut al tèsti i sa squàsan, pugn stric dapartùt, al chitàri i èṅ drē a preparàr-as. Metàl Pēś, Metàl Pēś csa vō't?»
(MUD)


'L Heavy Metal (a s lèś [ˈhɛvɪ ˈmɛtəl] in ingléś, Metàl Pēś in miranduléś, cgnusû da spés anc sōl cuma „Metal“) 'l è 'n gènar muśicàl ch'al fà part dla mùśica rock o, par dir-la méj, da 'l sò sót-gènar d'l Hard Rock (Rock Dûr). Al gh'à di ritm dimóndi agresìṿ e di sòṅ putènt tirâ fóra dand impurtànsa a 'l amplificasiòṅ e a 'l distursiòṅ dal chitàri lètrichi, di bas e, dal vòlti, anc dla vóś.

Al gh'à abû dimóndi impurtànsa in di an Stanta e Utànta dand vita a dimóndi sót-gènar cuma 'l speed metal, al thrash metal, al power metal, al black metal, al death metal e 'l doom metal.

La prima vòlta ch'a s è druâ al tèrmin Heavy Metal par batśàr un gènar muśicàl 'l è stâ in di prim an Stanta in di giurnài di Stat Unî mént'r i Steppenwolf i 'l aṅ druâ par prim in dal tèst dla sò canta Born to Be Wild. Dimóndi di prim grup ch'i 'l aṅ sunâ, da la fiṅ di an Ssanta andànd avànti, i daśvgnìvan da la sità industriàla ingléśa 'd Birmingham cuma Led Zeppelin, Deep Purple, Blue Cheer, The Move, Blue Öyster Cult, Black Sabbath e i Judas Priest.

In gènar la furmasiòṅ tìpica 'd un grup metal la gh'à dèntar: un baterìsta, un basìsta, un chitarìsta rìtmic, un chitarìsta sulìsta e 'n cantànt. Dal vòlti a gh pōl ès'r anc un tastérista.

Muimènt tìpic d'l Heavy Metal

Durànt i cuncèrt Heavy Metal a sucéd da spés ch'in dal pùblic o fra i sunadōr stés i gh sìan di muimènt o di gèst caraterìstic dal gènar, i più impurtànt i èṅ qvist chè 'd sóta:

  • Air guitar - mimàr al gèst ad sunàr la chitàra;
  • Pogo - saltàr adòs e dar di cuć c'n al spali a la gint darènt;
  • Moshing - praticamènt cumpàgn a 'l pogo ma più rabî;
  • Headbanging - squasàr al cô tgnénd adrē a la mùśica;
  • Còran - gèst 'd amicìsia;
  • Crowd surfing - far-as traśàr insìma a la gint;
  • Stage diving - butàr-as śò da 'l pac finénd in mèś a 'l pùblic;

Culegamènt estéran