Cinderella

Da Wikipedia.

C'l artìcul chè 'l è scrit in Miranduléś Emiliàn


«
Don't know what you got till it's gone, don't know what it is, I did so wrong, now I know what I've got, it's just this song and it ain't easy to get back, takes so long. Do you want to see me beggin' baby, can't you give me just one more day, can't you see my heart's been draggin' lately, I've been lookin' for the words to say...»
(EN)(Don't Know What You Got (Till It's Gone), 1988)
«
Ta n sà minga quél ch'at gh'à in fiṅ ch'at n al pèrd, ta n sà minga cuś 'l è, a 'l ò fat mal, adès a sò quél ch'a gh'ò, sól na canta e a n è minga fàcil turnàr indrē, l'è dura. Vō't ved'r-um dmandàr-'l in śnòć amór? Pō't minga dar-um un dè da piò? Ta n véd minga al mè cór ch'l è drē traśàr par tèra in chi dè chè? A sira drē a catàr al paròli da dir...»
(MUD)


I Cinderella i èṅ un grup metal americàṅ, mis insém a Filadèlfia (Pennsylvania) in dal 1982. In dal lór caréra i aṅ muciâ sù 7 disc ad plàtin e 18 migliòṅ ad disc vindû in tut al mónd.

Biugrafìa

I Cinderella dal viṿ in dal New Jersey in d'l Agóst dal 2006

Gl'Inisi (1983-1985)

La stòria di Cinderella la gh'à quèl cumpàgn a la favla ch'la pòrta al sò nóm (in ingléś Cinderella a vól dir Cenerentola). Al tut al taca in di prim an Utànta quand du amìg ad Filadelfia, Tom Keifer (vóś e chitàra) e Eric Brittingham (bas), i mòlan i Saints In Hell par dar vita a un grup nóṿ cun 'l intènt ad scrìvar di pès uriginài. A chi lór i s śònta pò Michael Kelly Smith (chitàra) e Tony Destra (baterìa). Al nóm dal grup al vèṅ sarnî na nòt tulénd ispirasiòṅ da 'n film purnugràfic. I prim braṅ i vènan rigistrâ in dal córs dal 1983 e dal 1984 cuma di demo. Chi pès lè i s pólan càtar in du publicasiòṅ minga uficiàli, Basement Tapes e Fox On The Run, ch'i faṅ védar cuma al sòṅ d'l inìsi al fus dimóndi più gréś e péś ch'in sèguit.

Al sucès (1983-1991)

Al cantànt di Cinderella, Tom Keifer

In dal 1985, durànt un lór spetàcul a 'l Empire Club ad Filadèlfia, cun na furmasiòṅ briśa difinitìva, i vènaṅ duciâ par Jon Bon Jovi, al cantànt dal grup Bon Jovi, ch'l éra entrâ lè par caś par bévar quèl. Culpî p'r al caràtar e la vóś ad Tom Keifer, Jon al fà cgnósar la band a la Polygram. In na nòt, a 'l impruvìś, la vita di Cinderella la cambia.

Dòp avér firmâ un cuntràt cun l'etichéta Mercury Records, Kelly Smith e Destra i làsan al grup (cun 'l apòǵ dla cà discugràfica) par furmàr i Britny Fox insém a Dean Davidson.

Purtòp al pòvar Destra al mōr 'd lì a pòc in 'n incidènt in màchina. Jim Drnec e Jeff LaBar i vènan tòlt al lór pòst.

Cun cla furmasiòṅ lè, i Cinderella i regìstran al prim disc, Night songs (Cansóni dla nòt) in dal 1986, prudót par Andy Johns un tisi ch'l iva laurâ cun i Rolling Stones e i Led Zeppelin. Prima dla fiṅ, a s śònta sèg al talentuóś Fred Coury.

Al logo famóś di Cinderella 'l è mis a punt da la prima mujér ad Keifer, Emily Pember.

I Cinderella i s faṅ nutàr da subìt par mèś dal sò stil a mèś fra quél di AC/DC e quél di Aerosmith, cun di còr ch'i t tóśan e di sòṅ blues. Cun di sìngui ad sucès cuma Shake me, Somebody save me e Nobody's fool, 'l àlbum al sarà disc dòpi ad plàtin in siē méś, vindénd 50mila còpi a la stmana in di sól Stat Unî, rivànd in dla casìfica ad Billboard al tèrs pòst.

In dal 1986 i Cinderella i vaṅ in tour insém a David Lee Roth mèntar 'l an dòp i vèran i cuncèrt par Bon Jovi e i sònan al Monsters of Rock ingléś. Da un cuncèrt 1987 in Giapòṅ a vèṅ tirâ śò al famóś video live Shakes Japan.

«
Somebody save me, I lost my job, they kicked me out of my tree, somebody save me save me. Everybody's got opinions but nobody's got the answers and that shit you ate for breakfast, well it'll only give you cancer...»
(EN)(Somebody save me, 1986)
«
Qualchidòṅ al véggna a salvàr-um, a-j-ò pardû al lavór, i m aṅ casâ fóra da 'l mè àlbar, qualchidòṅ al m salvi, al m salvi. Tut i dìśan la sua, ma ninsòṅ al gh'à al rispòsti e chi pét ch'a î magnâ par clasiòṅ, beh i v purtaràṅ sōl al càncar.»
(MUD)

In dal 1988 a vèṅ fóra al secónd disc, Long cold winter (Lung e fréd invèran) in du a s pól védar l'anma blues dal grup misćiàda a 'l hard rock dal disc ad debùt. I sìngui Don't know what you got (Till it's gone) e Coming home i faṅ ad c'l àlbum chè al più gròs sucès cumerciàl di Cinderella (6 migliòṅ ad còpi vindùdi), sucès cunfirmâ pò in pîṅ dal tour mundiàl umònim ch'al gh'iva bèṅ 254 show. In dal 1989 i sònan a 'l Moscow Music Peace Festival insém a Skid Row, Bon Jovi, Mötley Crüe, Gorky Park, Ozzy Osbourne e Scorpions.

«
I'm coming home where your love tonight can shine on me, I'm coming home where your lovin' arms can set me free...»
(EN)(Coming home, 1988)
«
A sòṅ drē a turnàr a cà in dua stasìra al tò amór al pól splénd'r-um in sima, a sòṅ drē a turnàr a cà in dua i tò bras acsè dóls i pólan rend'r-um lìbar...»
(MUD)

'L elemènt blues al crés incóra da piò in di sò disc in dal 1990 quand i Cinderella i faṅ gnir fóra Heartbreak Station (Stasiòṅ di crepacór) cun di ciàr riferimènt a 'l country e a 'l rhythm & blues. 'L àlbum al subìs dimóndi crìtichi e al vénd da méno ad chi àtar du. I sìngui Shelter me, The more things change e Heartbreak station i n gh'aṅ pròpria gnint 'd hard rock.

«
Waiting at the station, tears filling up my eyes, sometimes the pain you hide burns like a fire inside, look out my window, sometimes it's hard to see, the things you want in life, come and go so easily. She took the last train out of my heart ooo, ooo, she took the last train and now I think I'll make a brand new start, she took the last train out of my heart. Watching the days go by, thinking 'bout the plans we made, the days turn into years, funny how they fade away, sometimes I think of those days, sometimes I just hide away, waiting on that 9:20 train, waiting on a memory...»
(EN)(Heartbreak station, 1990)
«
Spitànd a la stasiòṅ, al làgarmi i vènan śò da i mè òć, dal vòlti al dulór ch'at sènt al bruśa cum un fóg dèntar, guardànd fóra da la mè fnèstra, dal vòlti i èṅ duri da védar al ròbi ch'at vō in dla vita, vnir e 'ndar acsè facilmènt. Lì lē l'à tòlt 'l ùltim trēn fóra dal mè cór, ooo, ooo, lē l'à tòlt 'l ùltim trēn e adès a pèns a tacàr quèl ad nóṿ, lē l'à tòlt 'l ùltim trēn fóra dal mè cór. Guardànd i dè ch'i èṅ pasâ, pinsànd a i prugèt ch'a-j-ém fat, i dè i dvèntan di an, i bèi mumènt i èṅ andâ via, dal vòlti a pèns a chi dè lè, dal vòlti a scap via e basta, spitànd al trēn ad nóṿ óri e vint, spitànd in di arcòrd...»
(MUD)

La criśi (1992-1996)

I Cinderella dal viṿ

A taca un perìud difìcil par lór, Fred Coury al mòla la cumpagnìa in dal 1993 e al sò pòst al vèṅ tòlt da Kevin Valentine ch'l iva sunâ in soquànt braṅ dal disc Revenge di Kiss dal 1992.

In śònta a tut quést, Tom Keifer al taca ad avér di prubléma a la vóś e 'l è custrét a far-as upràr soquànti vòlti. Al tour umònim al gh'iva da rivàr anc in Itâglia a Milàn ma par cólpa dla Guèra dal Gólf in Iraq la data dal nòstri bandi la vèṅ scanślàda.

In dal 1994 al grup al regìstra al disc Still climbing (Incóra in salìda), un diśàstar in fat ad vénditi (al tóca sól al 178° pòst in dla Billboard 200). La cà discugràfica Mercury la gh dà al bènservî e MTV la n traśmét minga i sò vìddeo parchè l'aria l'è cambiàda e la gint adès la vól al grunge. I pàsan in secónd piâṅ i braṅ Hard to find the words (un lènd didicâ a sò màdar) e i sìngui Hot & bothered ('l ùnic pès cun Coury a la baterìa), Freewheelin, Bad attitude shuffle e When it all comes down.

A i Cinderella a n gh rèsta da far àtar che mulàr-as.

«
And mama I know there's been times when I didn't always understand, by and by we do some growing up and it makes just a little more sense, but sometimes it's hard to find the words, but I'll do the best I can, thank you for the love mama, it's what made this boy a man, yea...»
(EN)(Hard to find the words, 1994)
«
E mama al sò ch'a gh'è stâ dal vòlti ch'a n capìva mai, pian piaṅ dvintànd un pò più grand al ròbi i tacàvan a muciàr sù dal sèns, ma dal vòlti l'è dura catàr al paròli, ma a farò al méj ch'a pòs, a t ringàsi par 'l amór ch'at m à dat mama, 'l è quél ch'l à fat dvintàr cal baghét chè 'n óm, sè...»
(MUD)

La riugnòṅ (1997-incō)

Jeff LaBar e Tom Keifer a Madrid 2011

In dal 1997, in ucaśiòṅ dla publicasiòṅ dla racòlta Once upon a... (Na vòlta a...), al grup al s riunìs incóra cun la furmasiòṅ uriginàla par far di cuncèrt. Da 'n live tgnû a 'l Keyclub 'd Hollywood d'l Utóbar dal 1998 a viṅ fat un disc gnû fóra 'l an dòp e dimóndi fat bèṅ, Live at the Key Club.

In dal 1998 i Cinderella i fìrman un cuntràt cun la Portrait Records (Sony) par far gnir fóra 3 àlbum. A sintìr quél ch'l à dit Keifer in n'intervìsta a Slamrocks fata in dl'Istâ dal 2000, i demo d'l àlbum i èṅ prònt ma la Sony la n i vól minga rigistràr. La band la và acsè drit p'r i avucàt.

In di an sucesìṿ i Cinderella i faṅ gnir fóra sól di disc dal viṿ o dal racòlti.

'L 11 ad Śugn dal 2008, quand 'l éra prònt a partìr p'r un tour, Keifer al pèrd a 'l impruvìś la vóś par na pèrdida ad sangṿ a la còrda vucàla ad sinìstra.

Risòlt al prubléma, i Cinderella i tàcan incóra a far di cuncèrt p'r al mónd.

Al 13 ad Śugn dal 2011 i aṅ sunâ dal nòstri bandi a Bulógna cantànd braṅ di prim tri disc e lasànd fóra quèi ad Still Climbing. Keifer 'l à tòlt fóra anc un saxòfun durànt la canta Shelter me.

Furmasiòṅ

I Cinderella dal viṿ a Bulógna al 13 ad Śugn dal 2011

Quéla 'd adès

Ex-cumpunènt

  • Michael Kelly Smith
  • Tony Destra
  • Jim Drnec
  • Jody Cortez
  • Kevin Valentine

Discugrafìa

Album in studi

  • 1986 - Night Songs
  • 1988 - Long Cold Winter
  • 1990 - Heartbreak Station
  • 1994 - Still Climbing

Album dal viṿ

  • 1988 - Live
  • 1991 - Live Train to Heartbreak Station
  • 1999 - Live at the Key Club
  • 2004 - In Concert
  • 2004 - Live from the Gypsy Road
  • 2006 - Extended Versions
  • 2006 - Gypsy Road: Live
  • 2009 - Authorized Bootleg: Live at the Tokyo Dome - Tokyo, Japan Dec. 31 1990
  • 2009 - Live at the Mohegan Sun

Racòlti

  • 1997 - Once Upon A...
  • 1998 - Bad Attitude: 1986-1994
  • 2000 - 20th Century Masters - The Millennium Collection: The Best of Cinderella
  • 2001 - The Collection
  • 2002 - Winning Combinations
  • 2004 - 20th Century Masters: The Best of Cinderella
  • 2005 - Rocked, Wired & Bluesed
  • 2006 - Gold

Videugrafìa

  • Night Songs The Videos
  • Shakes Japan
  • Tales from the Gypsy Road
  • Heartbreak Station Video Collection
  • Looking Back the Video Collection
  • 20th Century Masters: The DVD Collection
  • Rocked, Wired & Bluesed: The Greatest Video Hits
  • In Concert
  • In Concert: Remastered Edition

Culegamènt estéran