Blink 182

Da Wikipedia.

C'l artìcul chè 'l è scrit in Miranduléś Emiliàn


«
I never thought I'd die alone, I laughed the loudest who'd have known? I trace the cord back to the wall, no wonder it was never plugged in at all, I took my time, I hurried up, the choice was mine I didn't think enough, I'm too depressed to go on, you'll be sorry when I'm gone. I never conquered, rarely came, 16 just held such better days, days when I still felt alive.»
(EN)(Adam's song, 1999)
«
A n arév mai pinsâ ad murìr da par mè, a ridéva fòrt, chi psiva savér-al? A-j-ò tgnû a drē a 'l câv lung a 'l mur, 'l éra ciàr ch'al n fus briśa culegâ, a m sòṅ tòlt al mè tèmp, a m sòṅ daspgnâ in présia, la sièlta la gh'iva da èsar mia, a n gh'ò mia pinsâ asè, a sira tròp vilî p'r andàr avànti, at sarà daspiaśùda quànd a n gh sarò piò. A n ò mai fat na cunquìsta, a sòṅ gnû minga da spés. A séd'ś an a-j-ò visû i dè più bèi, dè in dua a m sintìva incóra viṿ.»
(MUD)
Tom e Travis i sònan p'r i marinàr americàṅ in Bahrain in dal 2003


I Blink 182 i èṅ un grup punk califurgnàṅ mis in pē in dal 1992 a Poway, in di dintóran ad San Diego, da Tom DeLonge (vóś e chitàra), Mark Hoppus (vóś e bas) e Scott Raynor (baterìa). Al sufìs 182 'l è stâ śuntâ in fónd par réndar difarènt al nóm dal grup rispèt a quél irlandéś di Blink ch'al gh'éra bèla.

La banda 'l à fat sù in tut siē àlbum da studi, na racòlta, un disc da 'l viṿ, quàtar demo e vint-i-òṅ sìngui, p'r un tutàl ad vint migliòṅ ad disc vindû.

Dòp quat'r an ad férum (i s éran mulâ dand vita a di prugèt da par lōr cuma Angels & Airwaves e +44), i èṅ turnâ insém in dal 2009.

Biugrafìa

Al grup al fà gnir fóra al prim disc Cheshire Cat in dal 1994 par la Grilled Cheese Records dòp soquànt demo rigistrâ in di an precedènt. Al disc (cun dènt'r i sìngui M+M's e Wasting Time) al n vénd mia dimóndi foravìa ch'in Austràglia. Par cal mutìṿ lè a la MCA Records a gh vèṅ in mènt ad mét'r-i sóta cuntràt p'r al disc dal 1996 Dude Ranch e la fà bèṅ parchè al vénd un migliòṅ e mèś ad còpi cun i braṅ ad sucès Josie e Dammit. Dū an dòp però Scott al lasa al grup. 'L è Travis Barker a tōr a 'l sò pòst.

In dal 1999 'l è la vòlta 'd Enema of the State, un disc ch'al mùcia sù un sucès clamuróś vindénd quìndas migliòṅ ad còpi. In cupertìna a s véd na foto dl'atōra dal póran Janine Lindemulder méntar l'è drē a mét'r-as un para ad guànt ad quéi druâ da i dutōr p'r insfilsàr un dî in dal cûl a i pasiènt. I sìngui tirâ fóra da cal lavōr chè i èṅ dvintâ di clàsic dal grup: What's My Age Again?, All the Small Things e Adam's Song.

Da sinìstra: Tom, Mark e Travis

In dal 2000 a véd la luś al disc da 'l viṿ The Mark, Tom and Travis Show (The Enema Strikes Back!) cun dèntar al sìngul Man Overboard. 'L an dòp al grup al fà catàr in di negòsi 'l àlbum Take Off Your Pants and Jacket, un tìtul dimóndi birichèṅ parchè da 'd là da 'l significâ leteràl (Tir-at via al braghi e al giachét) al fà gnir in mènt anc 'n àtar quèl (Tir-at via al braghi e fat na pugnéta) parchè la paròla Jacket la s lèś cumpàgn a Jack it.

Cal lavōr chè 'l è gnû fóra in tri versiòṅ difarénti, una rósa (quéla d'l aparéć) cun da piò i braṅ Time to Break Up e Mother's Day, una śala (quéla dal braghi) cun i braṅ What Went Wrong? e Fuck a Dog e una vérda (quéla dal giachét) cun i braṅ Don't Tell Me It's Over e When You Fucked Grandpa. Trédas invéci i èṅ al canti fisi, cun i sìngui First Date, The Rock Show e Stay Together for the Kids.

Al ròbi i càmbian un pôc cun al disc umònim dal 2003 parchè al stîl al s fà più madûr cuma in di sìngui Feeling This, Down, Always e al lènt I Miss You. La canta All of This invéci la véd la culaburasiòṅ ad Robert Smith di The Cure.

Dòp na racòlta (Greatest Hits dal 2005 cun dèntar la cover Another Girl Another Planet di The Only Ones) e un buś ad quàt'r an, al grup al tórna in dal 2011 cun al disc Neighborhoods.

Cumpunènt

Al grup tòlt śò durànt un cuncèrt dal 2011
Al grup di Blink-182 tòlt śò a Southside in dal 2012

'd adès

  • Tom DeLonge - vóś, chitàra
  • Mark Hoppus - vóś, bas
  • Travis Barker - baterìa

quéi vèć

  • Scott Raynor - baterìa

Discugrafìa

In studi

  • 1994 - Cheshire Cat
  • 1997 - Dude Ranch
  • 1999 - Enema of the State
  • 2001 - Take Off Your Pants and Jacket
  • 2003 - Blink-182
  • 2011 - Neighborhoods
  • 2016 - California
  • 2019 - Nine

Da 'l Viṿ

  • 2000 - The Mark, Tom and Travis Show (The Enema Strikes Back!)

Racòlti

  • 2005 - Greatest Hits

EP

  • 2012 - Dogs Eating Dogs

Demo

  • 1992 - Flyswatter
  • 1993 - Demo 2
  • 1993 - Buddha
  • 1998 - Enema of the State Demo

Culegamènt estéran