H.I.M.

Da Wikipedia.
C'l artìcul chè 'l è scrit in Miranduléś Emiliàn


«
We are so young, our lives have just begun but already we're considering escape from this world. And we've waited for so long for this moment to come, we're so anxious to be together, together in death. Won't you die tonight for love, baby join me in death.»
(EN)(Join me in death, 1999)
«
Nuàtar a sém acsè śóvan, la nòstra vita l'è péna tacàda ma a-j-ém bèla pinsâ ad scapàr via da cal mónd chè. A-j-ém spitâ un muć ch'a rivìs cal mumènt chè, acsè śmanióś 'd èsar insém in dla mòrt, in dla mòrt. Murirés-at 'sta nòt p'r amór? Pìcula, vîṅ mèg in dla mòrt.»
(MUD)
Gl'HIM a 'l Provinssirock dal 1999: da sinìstra Mige, Ville, Gas, Juska e Linde


Gl' H.I.M. (, acrònim par schèrs ad His Infernal Majesty, Sò Maestà Infernàla) i èṅ un grup gothic metal finlandéś, fundâ in dal 1991 da 'l cantànt Ville Valo (prima al fava al casēr in dal negòsi ad śavài p'r al sès ad sò pàdar), da 'l chitarìsta Lily Lazer (Mikko Lindström) e da 'l basìsta Mige Amour (Mikko Paananen). I tèst dal sò cansòṅ, in gènar, i dascóran 'd amór e ad mòrt.

Al sìmbul dal grup 'l è 'l heartagram, ugnòṅ 'd un cór e 'n pentàcul arbaltâ, mis dèntar in un sérć p'r indicàr al fat che 'l amór 'l è dâ da 'l misćiùs (al sérć) dal bèṅ (al cór) e dal mal (al pentàcul), sentimènt che, a dita ad Ville Valo al sarés, a gh'è al caś, «minga la ròba più impurtànta ma 'l ùnic mutìṿ parchè la matìna a m léva da lèt».

Biugrafìa

Gl'inìsi

'L heartagram

La banda la fà gnir fóra al sò prim lavōr, 'n EP cun quàtar braṅ ciamâ 666 Ways To Love: Prologue vindû sōl in mila còpi, in dal 1996 cun in dla cupertìna al grugn ad la màdar ad Ville Valo, Anita. I s faṅ cgnósar par mèrit dla cover ad Chris Isaak Wicked Game.

In dal Nuvémbar dal 1997 l'è la vòlta dal prim àlbum, Greatest Love Songs Vol.666, dimóndi pupulàr in di paéś scandinàṿ (in dua 'l è gnû fóra in Nuvémbar mèntar in Germâgna sōl in dal Śnar dal 1998). Al 666 'l è al nùmar dal Diàvul ma 'l è stâ druâ in manéra funsiunàla par cuntrastàr, cum a sucéd da spés cun lì lōr, la paròla love (amór).

Al disc al gh'à dèntar gl'hit Your Sweet Six Six Six e al lènt sìmbul When Love And Death Embrace (c'n al bas ch'al carésa al tastéri mèntar al chitàri péśi i sònan lénti), la mulàda lè cun un taj It's All Tears e soquànt braṅ doom cuma la For You ch'la vèra al disc o la ślada Our Diabolikal Rapture. In śònta a 'l pes 'd Isaak a s cata anc n'atra cover, la Don't Fear The Reaper di Blue Öyster Cult cun un duét a dū vóś, masć e fémna (ad l'atōra Sanna-June Hyde), misćiâ dimóndi bèṅ.

«
All our times have come here but now they're gone, the Seasons don't fear the Reaper, nor do the wind, the sun or the rain, oh, we can be like they are, come on baby, don't fear the Reaper baby, take my hand, don't fear the Reaper, we'll be able to fly, don't fear the Reaper baby, I'm your man.»
(EN)(Don't Fear The Reaper, 1997)
«
I nòstar dè i èṅ rivâ tut chè ma adès i èṅ andâ via, al stagiòṅ i n gh'aṅ briśa paùra dal Mśōr, gnanc al vènt, al sōl o la pióva, oh, a psrésan èsar cuma qui lè, andém pìcula, briśa avér paùra dal Mśōr, tó la mè maṅ, mia avér paùra dal Mśōr, a gh'la cavarém a vulàr, minga avér paùra dal Mśōr, teśòr a sòṅ al tò óm.»
(MUD)

Al sucès

Gl'HIM tòlt śò a Milàṅ in dal 2005

In dal 1999 i tàcan a far-as cgnósar in tut l'Europa (prim pòst in Germâgna) par via d'l àlbum Razorblade Romance (Rumanticìśum da laméti), specialmènt par la canta Join Me in Death (sincsènt-mila còpi vindùdi in dal marcâ tedésc in dū méś), druàda in dla culóna sunóra dal film Il tredicesimo piano dirèt par Josef Rusnak. Right Here in my Arms (dura e sunàda a la śvélta), Poison Girl e l'alśéra Gone With the Sin i èṅ i àtar sìngui mèntar dégni ad nòta i èṅ almànc I love you (prelude to tragedy), la rabìda Razorblade kiss, la bonus track dl'edisiòṅ americàna Sigillum diaboli e l'acùstica One last time.

Al disc gh'iva da ciamàr-as Slippery When Dead in unōr di Bon Jovi e dal sò Slippery When Wet. Gl'HIM i gh'aṅ abû di prubléma a far gnir fóra c'l àlbum chè in di Stat Unî parchè là a gh'éra bèla un grup cun cal nóm lè. Prima 'd avér-la abùda vinsa (armeténd-ag dimóndi bèsi), i finlandéś i èṅ stâ custrét a véndar mila còpi ad Razorblade Romance sóta 'l nóm ad H.E.R. (, acrònim ad Her Evil Royalty, Catìṿ dirìt 'd autór ad lē).

«
I love your skin oh so white, I love your touch cold as ice and I love every single tear you cry, I just love the way you're losing your life. My baby, how beautiful you are, my darling, completely torn apart, you're gone with the sin.»
(EN)(Gone with the sin, 1999)
«
L'a m piàś la tò pèla acsè śbiàvda, 'l a m piàś al tò tóc fréd cum al giàs e i m piàśan tut al làgarmi ch'at piànś, semplicemènt l'a m piàś la manéra ch'at drōṿ par pèrdar la vita. Amór, cum at sē bèla, teśòr mio, dasfàta dal tut, ta t sē pardùda in dla pcâ.»
(MUD)
Gl'HIM a Los Angeles in d'l Avrìl dal 2010

Al tèrs àlbum dal grup 'l è d'l Agóst dal 2001 e al s ciàma Deep Shadows and Brilliant Highlights (Òri grandi e luśór brilànt). 'L è stâ fat cun Janne Puurtinen a 'l tastéri e al gh'à dèntar quàtar sìngui, Pretending, In Joy And Sorrow, Heartache Every Moment e Close To The Flame, e anc la cover dal braṅ dance ad Benjo James Please Don't Let it Go.

Al disc al s piàsa incóra na vòlta a 'l prim pòst dla clasìfica dal sò paéś, ròba ch'la n sa vdiva da i tèmp di Hanoi Rocks in di an Utànta. Anc in Germâgna al disc al và fòrt (secónd pòst) ment'r al sìngul Pretending al riva a la dècima puśisiòṅ.

«
In joy and sorrow my home's in your arms, in a world so hollow, it's breaking my heart.»
(EN)(In joy and sorrow, 2001)
«
In dla cuntintésa e in dal dulōr la mè cà l'è in di tò bras, in un mónd acsè vōd, al mè cór 'l è drē a carpàr.»
(MUD)

In Avrìl dal 2003 al quàrt lavōr dal grup scandinàṿ, Love Metal (al nóm dal gènar muśicàl ch'i s éran dâ), al cuntìnua la stada dal sucès, cun tri sìngui sparâ bèṅ, Buried Alive By Love, The Funeral of Hearts e The Sacrament.

«
Your tomb is where your heart is, I should have told her but within me hid a secret so terrible. To cry is to know that you're alive but my river of tears has run dry, I never wanted to fool you, no, but a cold heart is a dead heart and it feels like I’ve been buried alive by love.»
(EN)(Buried alive by love, 2003)
«
La tò tómba l'è in du 'l è al tò cór, a gh'arév abû da dir-gh-al ma dèntar ad mè a lōg un segrét acsè spavintóś. Piànśar 'l è savér ch'at sē viva, ma al mè fiùm ad làgarmi al s è sugâ, a n ò mai vlû inganàr-at, no, ma un cór fréd 'l è un cór mòrt e a pâr ch'al sia stâ saplî viṿ da 'l amór.»
(MUD)
Al grup da 'l viṿ in dal 2007

In dal 2004 al grup al fà gnir fóra la sò prima racòlta And Love Said No, E 'l amōr al diś ad nò) ch'la mét insém i prim quatórdas sìngui e dū braṅ nóṿ ad paca, la cover ad Neil Diamond Solitary Man (sìngul vindû bèṅ in Finlàndia, secónd, e in dal Régn Unî, nôn), sunàda a la manéra metal (pès fat anc da di àt'r artìsta cuma Chris Isaak e 'l nòstar Gianni Morandi c'n al tìtul ad Se perdo anche te), e And Love Said No (sèmpar secónda puśisiòṅ in dal sò paéś).

In dal 2005 Ville Valo al dà la vóś, insém a 'n àtar finlandéś Lauri Ylonen di The Rasmus, a 'l grup di Apocalyptica p'r al sìngul Bittersweet e pò in Setémbar al fà vgnir fóra al sò prim disc par la major Warner Music, Dark Light (Luś scura), al sò lavōr più cumerciàl e curâ fiṅ a cal punt lè. Cuciâ sù p'r al sìngul Wings Of A Butterfly (Vampire Heart 'l è pò al secónd), 'l àlbum al gh la cava a finìr in di prim vint pòst dla clasìfica di Stat Unî vindénd là da piò ad sincsènt-mila còpi.

Gl'HIM i s faṅ un nóm anc dal nòstri bandi. Sèmpar in c'l an lè i sònan a 'l Download Festival insém a i Black Sabbath e i Velvet Revolver.

«
Heaven ablaze in our eyes, we're standing still in time, the blood on our hands is the wine, we offer as sacrifice. Come on and show them your love, rip out the wings of a butterfly, for your soul, my love.»
(EN)(Wings of a butterfly, 2005)
«
Paradìś in vampi in di nòst'r òć, a sém in pē férum in dal tèmp, al sangṿ in sal nòstri maṅ 'l è vèṅ ch'a śibém in sacrifìsi. Vîṅ chè e fém véd'r-ag al tò amór, sćianchém gl'ali dna parpàja, par la tò anma, amór.»
(MUD)

La Madurasiòṅ

Prim piàṅ ad Ville Valo

Al 17 ad Setémbar dal 2007 a vîṅ fóra in Itàglia Venus Doom al secónd lavōr dal grup par la Warner (paragunâ, a dita ad Valo, a 'l Master of Puppets di Metallica e a i lavōr di Black Sabbath), rigistrâ in di studi dla Finnvox sóta la diresiòṅ ad Tim Palmer (ch'l iva laurâ cun Ozzy Osbourne). La cupertìna la nas da un quàdar d'l artìsta David Harouni cumprâ dal cantànt a New Orleans.

Al sèst àlbum dla banda la gh'à di tèst più madûr, pîṅ ad pueśìa e magòṅ (The Kiss of Dawn l'è stada scrita p'r arcurdàr 'n amìg ch'al s éra tòlt la vita e la cumplèsa Sleepwalking Past Hope la gh'à di riferimènt a 'l Infér'n ad Dante Alighieri, durànd da piò ad déś mìnut, na ròba mai vista p'r al grup finlandéś). Al chitàri i èṅ sèmpar in prim piaṅ e Valo al dróa tut al nòti ch'al pōl far, anc dimóndi basi. I sìngui i èṅ The Kiss of Dawn e Bleed Well mènt'r al braṅ Passion's Killing Floor 'l è stâ sarnî par la culóna sunóra dal film Transformers ad Michael Bay.

In di Stat Unî al fà subìt al sò ingrès in clasìfica al dudicèśum pòst cun 38.000 còpi mèntar 'l è prim in Finlàndia, tèrs in Germâgna e trentunéśum in dal Régn Unî.

«
My hell begins from the 10th and descends to the circle, six hundred threescore and six and from there I crawl beneath Lucifer's claws just for one last kiss.»
(EN)(Sleepwalking past hope, 2007)
«
Al mè Inféran al taca dal dècim sérć e al và śò para, siē sènt ssanta e siē e da lè a traś par tèra sóta al śgranfgni ad Lucìfar sōl par 'n ùltim baśèṅ.»
(MUD)

'L òt ad Mars dal 2008 al grup al sòna dal nòstri bandi a Nunàntla, in dal mudnéś, e anc a Milàn e Firénse.

Al 14 ad Favràr dal 2010, antisipâ dal sìngul Heartkiller ch'al s psiva dascargàr da dū méś dal sit ad Myspace dal grup, a véd la luś al sètim lavōr in studi, Screamworks: Love in Theory and Practice, Chapters 1–13 (Lavōr da sîg: Amór a paròli e fat dabòṅ, capìtui da 'l òṅ a 'l trédas), un disc rigistrâ a Los Angeles e prudót par Matt Squire. Un secónd sìngul 'l è stâ fat al 29 ad Mars dal 2010 e 'l è la canta Scared to Death. Invéci la cansòṅ Disarm Me (With Your Loneliness) l'éra stada fata p'r al disc Dark Light ma pò 'l éra stâ decìś ad lasàr-la fóra parchè la gh'intràva pôc cun al rèst dal lavōr.

«
Ave Maria we've tried, Ave Maria we've cried, Ave Maria we've died. Lift the lid off your heart's casket in the arms of rain, drift along this river of sadness 'til we feel no pain.»
(EN)(In the arms of rain, 2010)
«
Ave Maria a gh'ém pruâ, Ave Maria a-j-ém pianśû, Ave Maria s sém mòrt. Tira sù al quèrć dal scrign dal tò cór in di bras dla pióva, nuàtar a 'ndarém a 'l lârg lung cal fiùm chè ad tristésa, in fîṅ chè a n sentirém più dal dulōr.»
(MUD)

A dita dal cantànt (intervìsta a Kerrang!) 'l àlbum 'l à tòlt la sò ispirasiòṅ da la relasiòṅ cun la sò dóna ch'l'éra finìda mâl in cal mèntar: «'L è un diàri sunôr ad cal lavōr lè. 'L àlbum al dascór anc di dū aspèt, in sla carta e dabòṅ, dal relasiòṅ amuróśi ch'i èṅ un prubléma ch'al n s pōl briśa risòlvar. Screamworks 'l è un sîg primàri e liberatòri, un dî mèdi tirâ sù, un “Ma andâ a ciapàr-'l in dal cûl”, mè a vój far cum a m pâr a mè».

Al disc 'l è andâ bèṅ, cum al sòlit, in Finlàndia (secónd) e Germâgna (quàrt), ma anc in Braśìl (prim) e Grécia (secónd), méno in Itâglia (sōl 68śum).

Na versiòṅ rimixàda dal disc cun déś braṅ déntar, SWRMXS, l'è gnuda fóra in dal Dicémbar dal 2010.

Cun un cumunicàt dal 28 ad Mars dal 2011, in sal sò sit, gl'HIM i dìśan ch'i ś divìdan da la sò cà discugràfica dòp siē an.

Furmasiòṅ

Al leader di HIM, Ville Valo

Quéla 'd adès

  • Ville Valo (Ville Hermanni Valo) - vóś (1995 - incō)
  • Lily Lazer (Mikko Lindstrom) - chitàra e vóś (1995 - incō)
  • Mige Amour (Mikko Paananen) - bas (1995 - incō)
  • Emerson Burton (Janne Purtinnen) - tastéri (2000 - incō)
  • Gas Lipstick (Mika Kristian Karppinen) - baterìa (1999 - incō)

Ex cumpunènt

  • Antto Melasniemi - tastéri (1995 - 1998)
  • Zoltan Pluto (Juska Salminen) - tastéri (1998 - 2000)
  • Juhana Rantala - baterìa (1995 - 1999)

Discugrafìa

Àlbum

  • Greatest Love Songs Vol. 666 (1997)
  • Razorblade Romance (2000)
  • Deep Shadows and Brilliant Highlights (2001)
  • Love Metal (2003)
  • Dark Light (2005)
  • Venus Doom (2007)
  • Screamworks: Love in Theory and Practice (2010)

EP e Démo

  • Witches and Others Night Fears (1992, démo)
  • This is Only the Beginning (1995, démo)
  • 666 Ways to Love: Prologue (1996, EP)

da 'l Viṿ

  • Digital Versatile Doom - Live at Orpheoum Theathre (2008)

Racòlti

  • The Single Collection (2002, box)
  • And Love Said No - The Greatest Hits 1997-2004 (2004)
  • Uneasy Listening Vol.1 (2006)
  • Uneasy Listening Vol.2 (2007)
  • SWRMXS (2010)

Sìngui

  • 1996 Wicked Game
  • 1997 When Love and Death Embrace
  • 1998 Your Sweet 666
  • 1999 Join Me
  • 2000 Right Here in my Arms
  • 2000 Poison Girl
  • 2000 Gone With the Sin
  • 2001 Pretending
  • 2001 In Joy and Sorrow
  • 2002 Heartache Every Moment
  • 2002 Close to the Flame
  • 2003 The Funeral of Hearts
  • 2003 Buried Alive by Love
  • 2003 The Sacrament
  • 2004 Solitary Man
  • 2004 And Love Said No
  • 2005 Bittersweet (Apocalyptica feat. Ville Valo)
  • 2005 Wings of a Butterfly
  • 2005 Vampire Heart
  • 2006 In Joy and Sorrow / Pretending
  • 2006 Killing Loneliness
  • 2007 Kiss of Dawn
  • 2007 Bleed Well
  • 2009 Heartkiller
  • 2010 Like St.Valentine
  • 2010 Scared To Death

Vìddeo

Videoclip

  • Wicked Game (1996, prima versiòṅ)
  • Wicked Game (1998, secónda versiòṅ)
  • When Love and Death Embrace (1999)
  • Join Me in Death (1999, prima versiòṅ)
  • Right Here in My Arms (2000)
  • Poison Girl (2000)
  • Gone With the Sin (2000)
  • Join Me in Death (2000, secónda versiòṅ)
  • Wicked Game (2000, tèrsa versiòṅ)
  • Pretending (2001)
  • In Joy and Sorrow (2001)
  • Heartache Every Moment (2001)
  • Close to the Flame (2002)
  • The Funeral of Hearts (2003)
  • Buried Alive By Love (2003)
  • The Sacrament (2004)
  • Solitary Man (2004)
  • And Love Said No (2004)
  • Wings of a Butterfly (2005)
  • Killing Loneliness (2005, prima versiòṅ)
  • Killing Loneliness (2006, secónda versiòṅ)
  • The Kiss of Dawn (2007)
  • Bleed Well (2007)
  • Heartkiller (2010)
  • Scared to Death (2010)

DVD

  • The Video Collection: 1997-2003 (2004)
  • Love Metal Archives Vol. I (2005)
  • Digital Versatile Doom (2008)

Culegamènt estéran