Doro Pesch

Da Wikipedia.
C'l artìcul chè 'l è scrit in Miranduléś Emiliàn


«
All we are, we are, we are all, all we need. Now we're stronger, we no longer want you bringin' us down, we've got the magic so we're gonna spread the magic around, yeah!»
(EN)(All we are, 1987)
«
Tut nuàtar a sém, a sém, a sém tut, tut quél ch'a s vól. Adès a sém più fòrt, a n vlém piò che ta s but śò, a gh'ém la magìa dònchina a la stramném chè 'd intóran, sè!»
(MUD)
La Doro Pesch in dal 2006. Da nutàr al tésć in mèś a 'l gambi


Doro Pesch (Düsseldorf, 3 ad Śugn dal 1964, Dorothee 'l è 'l sò nóm véra) l'è na cantànta heavy metal tedésca ch'l'à cantâ prima in dal grup di Warlock (in fiṅ a 'l 1988) e pò in dal sò grup Doro.

Biugrafìa

L'infànsia

Fióla 'd un camiunìsta, che da pìcula al la purtàva sèg in di viàś ad lavór, quànd la gh'à séd'ś an la s mala ad tuberculóśi in di palmòṅ e la finìs in fin 'd vita, pasànd 'n an a 'l uśdàr, ma la scampa e la decìd ad métar sù un grup rock. Prima la fà sù un grup ciamâ Snakebite e pò, in dal 1983, i Warlock cun tant ad cuntràt discugràfic: par Doro la taca la sò caréra ad cantànta.

I an cun i Warlock

In di prim méś dal 1984 i Warlock i faṅ gnir fóra al lór prim disc, Burning The Witches (Dand fóg al strìi). 'L àlbum al s vèra cun òṅ di bràṅ più bèi, Signs of Satan (un tìtul ad mòda in chi an lè) e al và avànti a la stésa manéra, cun al rock rabî ad After the Bomb, Dark Fade, Homicide Rocker e Metal Race e la title-track stésa.

«
The demon takes the body of the bloodless gal, outside she's looking pretty, inside a beast of hell. That's what you are callin', a hellcat or a witch and only if she's burning the demon will die. Burning the witches, the evil cries, by burning the witches the demon dies.»
(EN)(Burning the witches, 1984)
«
Al dèmon al tóś al còrp dla baghéta sensa sangṿ, da fóra la par bèla, da dèntar l'è na bestiàsa d'l Inféran. Quést chè 'l é quél ch'at sē drē a ciamàr, una cun al diav'l adòs o na strìa e sól s'la ciàpa fóg al dèmon al murirà. Dand fóg al strìi, al mal al siga, dand fóg al strìi al dèmon al mór.»
(MUD)
Na Doro 'n pôc daspatnàda durànt na canta

In dal 1985 i pàsan a la cà discugràfica Phonogram e i faṅ gnir fóra Hellbound, un disc dimónd dur cun i braṅ Out Of Control, Earthshaker Rock, All night e Hellbound dégn ad nòta.

'L an dòp l'è la vòlta ad True as steel (Vér cum 'l asèri) e i Warlock i tóśan al vól: Mr.Gold, Speed of sound e Fight For Rock i èṅ di braṅ ch'i śbràgan incòsa!

«
See the master of evil, diamonds in his eyes, fingertips like a needle stab you from behind. He´ll pay and price to buy your heart and soul, he makes a deal with heaven, all he wants is your life. No mercy for Mr.Gold.»
(EN)(Mr.Gold, 1985)
«
Dà 'n òć al sgnór dal mâl, di diamànt in di sò òć, al tóc dal sò dida al par na gùcia insfilsàda da drē. 'L à pagâ al prèsi par cumpràr-'t al cór e l'anma, lò al fà un pat cun al cēl, tut quél ch'al vōl 'l è la tò vita. Minga avér cumpasiòṅ p'r al sgnór Òr.»
(MUD)

Al grup al vèṅ ciamâ par sunàr al "Monsters of Rock" a Donington in Gran Bretàggna e Doro l'è la prima dóna dla stòria a muntàr sù a cal palc lè.

In dal 1987 a véd la luś al quàrt e ùltim àlbum di Warlock, al più bèl ad tut a dita ad mólt: Triumph and Agony (Triùnf e lantcór), rigistrâ a New York. Dèntar a cal lavór chè i s càtan di clàsic dal grup cuma All we are, I rule the ruins, East meets west, Für Immer (cantàda in tedésc, a vól dir Par sèmpar) e la catìva Touch of evil in dua Doro la canta in na manéra dimóndi rabìda e a par ch'la gh'àppia al diav'l adòs. Sèmpar in c'l an lè, i Warlock i vâṅ in tour insém a D.I.O. in Europa e cun i Megadeth in di Stat Unî.

«
There's a fever floatin' round my brain, so many things I can't explain, you'd better listen, better get it into your head, no regrets for anything I've said, alles klar, bad is good, I'm gonna tell you till it's understood. There's a touch of evil - in my mind, there's a touch of evil - in these eyes.»
(EN)(Touch of evil, 1987)
«
A gh'è na févra ch'la prila in dal mè sarvèl, tròpi ròbi ch'a n gh la cav minga a cuntàr, a sarév méj ch'at scultìs, at cunvèṅ ficàr-'t al in tèsta, gnanc na scuśa par quél ch'a-j-ò dit, tut ciàr, al catìṿ 'l è bòṅ, a t al dirò in fiṅ ch'a ta n al capìs minga. A gh'è un tóc dal mâl - in dla mè tèsta, a gh'è un tóc dal mâl - in chi òć chè.»
(MUD)

In dal 1988 Doro Pesch la cambia la furmasiòṅ di Warlock (cun i nóṿ chitarìsta Jon Devin e baterìsta Bobby Rondinelli) e la taca a lauràr al nóṿ disc. Par di prubléma legài la gh'à da cambiàr al nóm dal grup (da Warlock a Doro) parchè i dirìt i éran dal vèć manager.

In dla lór caréra ad quàt'r an, Doro Pesch insém a i Warlock i aṅ muciâ sù quàtar disc, un live in VHS, Metal Racer, e dimóndi cuncèrt dal viṿ, òṅ anc cun i Judas Priest, al spetaculàr Fuel for Life Tour.

I an c'n i Doro

La Doro da 'l viṿ a Tolmin in dal Luj dal 2007

In dal 1989 Doro la sa spòsta in di Stat Unî e la sfruta la prudusiòṅ rica dla Vertigo par dar vita a Force Majeure (un tìtul in francéś ch'al vól dir Fòrsa più granda), un bèl disc ch'al sòna cum al precedènt cun al clàsic Hard times, la cover parfèta ad A whiter shade of pale di Procol Harum (tut i du sìngui par MTV), al lènt ch'al tóś al cór Beyond the Trees, al rock da cuncèrt Save my soul e la rabìda World gone wild. Al disc al finìs cun un braṅ pìcul ch'al dura sól 36 secónd, Bis aufs blut (Fiṅ a sangvinàr), cantâ a capèla in dla sò lingua, in du la fà védar quant al pōl èsar muśicàl e bèl anc al tedésc.

«
Fallin' like stones over and over, falling alone hold on hold on, love will save my soul someday, love will save my soul someday, take me away, take me so far away.»
(EN)(Save my soul, 1989)
«
Rutulànd śò cuma prédi sèmpar da piò, cascànd śò da par tè tin-at tin-at, 'l amór al salvarà la mè anma un dè, 'l amór al salvarà la mè anma un dè, pòrt-um via, pòrt-um via luntàṅ da 'd chè.»
(MUD)

In dal 1990 Doro la s fà prudùrar par Gene Simmons di Kiss e la regìstra al disc Doro cun di sunadōr tut nóṿ ad paca, in mèś a i quài a gh'è anc Tommy Thayer che soquànt an dòp al turà 'l pòst 'd Ace Frehley in di Kiss.

Al prim sìngul Unholy love, ch'al s vèra c'n un gir ad bas, al gh'à un vìddeo girâ a 'l Yosemite Park in di Stat Unî, al secónd sìngul 'l è 'n lènt, Rare diamond. Faghénd al ròbi curti a s pōl dir ch'l è 'n pas indrē in cunfrònt a i sò lavōr 'd prima. I mèritan 'd èsar tgnû a mènt i braṅ Something wicked this way comes e la cover di Kiss Only You, cantàda a la sò manéra, trata da 'l àlbum dasfurtunâ Music from the Elder.

La Doro la fà i còr'n a Wacken in dal 2014
«
Only you are the manchild, you are the light and you are the way, I can't believe this is is true, why do I listen to you, if I am all that you say why am I still so afraid. only you! Only you! Only you! In every age, in every time, a hero is born as if by a grand design.»
(EN)(Only You, 1990)
«
Sōl tè 't sē 'l óm-putèṅ, tè 't sē la luś e la via, a n pòs minga crédar ch'a sia véra, parcòsa sòṅ-j-a drē a scultàr-at? S'a sòṅ tut qvél ch'at dì parcòsa gh'ò-j-a paùra incóra? Sōl tè! Sōl tè! Sōl tè! In tut i tèmp, in tut i mumènt, a nas 'n eróe cuma s'a tgnis a drē a 'n diségn misterióś.»
(MUD)

In dal 1991 Doro la fà vgnir fóra na racòlta di sò braṅ più famóś, suo e di Warlock, fra i quài i s càtan Für Immer e na East Meets West sunàda da 'l viṿ.

«
Keine macht, wird uns jemals trennen, werde wie ein tier drum kämpfen, du lernst mich kennen. Denn freunde gehn mir über alles, immer, ich werde immer für dich sein, für immer. Deep inside my heart, für immer, deep inside my heart, für immer, deep inside my heart, see you and me.»
(DE)(Für Immer, 1987)
«
Mai al purà divid'r-as, al lutarà cuma un tambùr animàl, i rivaràṅ a cgnós'r-um. Parchè i mè amìg i pàsan davànt a tut, sèmpar, a gh sarò sèmpar par tè, par sèmpar. Dal fónd dal mè cór, par sèmpar, dènt'r al mè cór, a vdiv mè e tè.»
(MUD)

Sèmpar in dal 1991 a vèṅ fóra al tèrs àlbum di Doro, rigistrâ a Nashville, True At Heart (Vér al cór), un disc dimóndi persunàl, difarènt ad quéi vèć di Warlock, cun di lènt chi dascóran ad lē e di sò sintimènt, cuma Even Angels Cry, Fall For Me Again, I'll Make It on My Own, I Know You By Heart. I n màncan briśa i braṅ più dur cuma Cool Love, You Gonna Break My Heart e Hear Me. Dascórs a part par la cansòṅ The Fortuneteller in dua Doro la rècita un tèst in ingléś (ma sèmpar cun al sò marcâ acènt tedésc) sénsa cantàr-al, a part al riturnél ch'al prénd dimóndi.

«
You look at me filled with sadness in your eyes but this should come as no surprise, it's what I have to do. Was never right 'cause someone else belongs to you, I'll say good-bye, it's what I have to do. Yeah my heart may break, that's the only chance for me to take and if tears should fall they will wash away and hurt me no more, I'll make it on my own. Don't search for me, don't try to call, don't try to take me back, it's time I move on.»
(EN)(I'll make it on my own, 1991)
«
Ta m guàrd pîṅ ad dispiaśér in di tò òć ma quést al gh'iva da sucédar e al n è mia na surpréśa, 'l è quél ch'a gh'iva da far. A n è mai stâ giùst parchè qualchidùna la stava tèg, a t dirò ciào, 'l è quél ch'a gh'ò da far. Sè, al mè cór al prév śbragàr-as, quésta chè l'è la sóla ròba ch'a pòs far e se dal làgarmi i gnaràṅ śò i lavaràṅ via tut e a n patirò piò, al farò par cònt mio. Minga pascàr-um, minga pruàr a ciamàr, minga sercàr ad far-um turnàr indrē, 'l è gnû al mumènt 'd andàr via.»
(MUD)
La Doro da 'l viṿ a 'l Classic Rock Festival 'd Ambûrg in dal 2007

Dòp avér pasâ tut al 1992 a far di cuncèrt sunànd in Germàgna, in dal 1993 la tóś sèg Johnny Dee a la baterìa e i chitarìsta Joe Taylor (ex ad Lita Ford) e Jimmy di Lella e la fà gnir fóra Angels Never Die (I Àngil i n móran mai), un disć da i stìi misć cun di braṅ rock dur (Eye on you), soquànt melòdic (Bad blood) e di lènt (So alone together, Don't go e Enough for you). 'L ùltim braṅ, sunâ al piaṅ, 'l è na bèla cansòṅ in tedésc Alles ist gut (Tut 'l è bèṅ).

In dal 1995 a vèṅ fat gnir fóra 'l ùltim disc par la Polygram, Machine II Machine (Da màchina a màchina), un disc piutòst elètric e cun di campiunamènt ma minga mâl, pîṅ ad tèst sensuài. Tie me up, i sìngui Ceremony e In Freiheit Stirbt Mein Herz in tedésc (a vól dir Al mè cór al mór lìbar), al lènt Desperately e Like Whiskey Straight i èṅ i braṅ più bèi.

«
Be my mirror where I'm free to let go, tie me up and make me scream out loud, tie me up and tie me down, tie me up, tie me inside out just turn me on and come around. In danger, in hunger, in something like a cage we heat it up, warm bleeding, soft screaming.»
(EN)(Tie me up, 1995)
«
Fà in manéra 'd èsar al mè spèć in du a pòs lasàr-um andàr, tin-um sòdi e fà-m sigàr fòrt, tin-um sòdi e mòl-um, tin-um sòdi, squàs-um, pril-um e fà-m gnir chè 'd intóran. In dal perìcul, in dla fam, in quèl cum la gàbia, nuàtar a 'l scaldém par bèṅ, sangṿinamènt bujènt, sigamènt mòrbid.»
(MUD)

Subìt dòp a vèṅ fóra na versiòṅ dal disc cun i braṅ rimixâ, Machine II Machine - Electric Club Mixes. A la fiṅ d'l an a partìs al tour e Doro la cata anc al tèmp ad far na pìcula part in un film p'r la televiśiòṅ tedésca Verbotene Liebe (Amór pruibî).

In di an sucèsiṿ, Doro la s tóś na pàusa e acsè i vénan fóra dal racòlti par masàr al tèmp. La prima a védar la luś 'l è A Whiter Shade of Pale e pò 'l è al tùran 'd Earthshaker Rock, ad Best of Doro e ad The Ballads.

Finalmènt in dal Maǵ dal 1998 a s pōl catàr in di negòsi un disc nóṿ dla front-woman ad Dusseldorf: Love Me In Black (Ama-m in négar). La sò cà discugràfica, la Warner Bros, la gh dmanda ad tinśar-s i cavìi ad négar, par far na surpréśa a i fans, ma lē la diś ad nò. 'L àlbum al gh'à 'l apòǵ di sò sustenidór e anc dal bèli recensiòṅ par via ad canti dégni ad nòta cuma Do you like it?, Love me In black, Pain, Terrorvision, Poison arrow e Barracuda.

«
Are you ready for me, do you love me in black, I'll will push you away then make you come back, I can make you feel love, I can be so detached, do you really want me, do you love me in black? When I first met you I thought there was a mistake, how could you want me, you made such easy prey, didn't they teach you loving is nothing but pain, what do you see when you look in my eyes, a sea of blue, a place where your heart could lie, where it could drown, where it will never survive.»
(EN)(Love me In black, 1998)
«
Sē't prònt par me? M vō't bèṅ in négar? A t mandarò via pò a t farò turnàr indrē, a t pòs far sintìr d'l amór, a pòs èsar acsè dastacàda, m vō't dabòṅ? M vō't bèṅ in négar? Quànd a s sém incuntrâ la prima vòlta a pinsàva ch'a gh fus un śbali, cuma psiv-at vlér-um? A sira 'n ubietìṿ acsè fàcil, t an-i minga insgnâ ch'l amór 'l è sól un patimènt? Cuśa véd-at guardànd in di mè òć? Un mar ad vilimènt, un pòst in du al cór al prév dir dal buśìi, angàr e minga scampàr gnanc na vòlta.»
(MUD)
La Doro tòlta śò durànt al cuncèrt 'd Helmond in d'l Avrìl dal 2006

Par védar 'n àt'r àlbum a gh'è da spetàr du an: Calling The Wild (Ciamànd al salvàdag) a véd la luś in dal Setémbar dal 2000 in du versiòṅ, una européa e una americàna. Al disc 'l è dignitóś, specialmènt in di braṅ Kiss me like a cobra, in dla ballad Give me a reason, in dal cover Love Me Forever (di Motorhead e che chè la la canta insém a Lemmy Kilmister stés) e White wedding ad Billy Idol (dura asè ch'la par gnuda fóra da la péna 'd H.I.M.), la cansòṅ pîna ad meludìa Who you love e Burn it up.

«
Give me a reason to hold on to this love, give me a reason to stay strong in my heart, show me a reason that I go on, words came straight from the start, all alone, give me one good reason, a reason to go on. Did I just see a tear in your eyes? Did I just miss a silent sign? Is it the end or is it my mind? Making it hard for you to try.»
(EN)(Give me a reason, 2000)
«
Dà-m un mutìṿ par tgnir sòdi c'l amór chè, dà-m un mutìṿ par lasàr al mè cór fòrt, fà-m védar un mutìṿ e a vag avànti, al paròli i èṅ dvintàdi fòrti fiṅ da 'l inìsi, tut da par mè, dà-m un mutìṿ bòṅ, un mutìṿ p'r andàr avànti. Ò-j-a vist própria adès na làgarma in di tò òć? M vōl-al sól un ségn ad silènsi? È-la la fiṅ o è-la la mè mènt? A la fag difìcila par pruàr.»
(MUD)

In d'l Agóst dal 2002 'l è al tùran ad Fight (Cumbàt), un disc rigistrâ praticamènt dal viṿ in un studi dla Pennsylvania e a s sènt fin da 'l inìsi cun la title-track, cun Rock before we bleed o cun Always live to win, ch'i gh'àṅ quèl ad gréś. Pîna ad sentimènt l'è Undying mèntar in d'l àlbum Doro la fà anc un duét cun Peter Steele di Type O Negative in dla canta Descent.

Ad chi du disc chè a s pōl catàr na versiòṅ in digipack cun di braṅ da piò.

Al 13 ad Dicémbar dal 2003, dòp di méś in gir par sunàr, Doro la tórna a cà sua a Dusseldorf par festegiàr al ventéśum aniversàri dla sò caréra e la ciàma di òspit speciài quài Lemmy e Mickey Dee di Motorhead, UDO, Blaze Bayley (ex cantànt di Iron Maiden) e soquànt di mémbar vèć di Warlock. Al cuncèrt ch'a gh vèṅ fóra 'l è un sucesòṅ.

La Doro Pesch mènt'r in sal palc la canta 'n pès

Par védar un cuncèrt ad cal perìud lè, a s pōl tór al DVD muśicàl dal 2003 Für Immer pîṅ ad materiàl interesànt, cun un live rigistrâ in na spilónca a Balve durànt al Fight tour e tut i sò viddèoclip muciâ sù.

In dal 2004 la rigistra un disc dal viṿ, Classic diamonds cun i sò pès più famóś insém a l'urchèstra ad Bochum.

In dal 2006 la fà gnir fóra al disc Warrior soul (Anma da guèra) e Doro la fà védar ch'l è incóra bòna ad far di disc dur cuma na vòlta, basta scultàr i braṅ You're my family dedicàda a i sò sustenidór, 'l hard rock 'd Haunted heart e ad Thunderspell, al lènt In liebe und freundschaft e la rabìda Ungebrochen. Dòp soquànt an, la tórna anc in Itâglia par sunàr a Milàn, Firänz e Trevìś.

Fear no evil 'l è al tìtul dal disc dal 2009, ùndas braṅ in dla sò tradisiòṅ. Al disc al s vèra cun la canta puténta Night of the Warlock ch'la fà gnir vója ad tàcar subìt 'n headbanging sénsa vargnoggna e pò al và avànti cun Running from the Devil in dua Doro la fà gnir fóra la sò vóś catìva di an Utànta. Celebrate e 25 Years i vólan far un tribùt a la sò lunga caréra mèntar a n manca minga al lènt, It kills me.

«
For over a hundred years I've been watching you, you've tried your best to run away but I won't let you, I hear your heartbeat from miles away and I know you're scared cause I smell your pain, so play in his game, there's nothing to fear, sinner or saint does not matter here.»
(EN)(Night of the Warlock, 2009)
«
Par più ad sènt an a t ò tgnû 'd òć, tè 't à pruâ a scapàr via cuma méj ta psiv ma a n al t lasarò briśa far, a sènt la tò batarìa ad cór luntàṅ da 'd chè e a sò ch'at gh'à paùra parchè a naś al tò dulōr, alóra śóga al sò śōg, a n gh'è gnint 'd avér paùra, pcadōr o sant a n cònta gnint chè.»
(MUD)
La Doro la vōl sintìr s'al pùblic nurvegéś 'l è cald durant al Norway Rock Festival dal 2009

In dal 2010 a vèṅ fóra 25 Years in Rock, un cufanét ad 2 DVD e 1 CD cun rigistrâ insìma 'l cuncèrt selebratìṿ di vint-sinc an dla sò caréra, tgnû al 13 ad Dicémbar dal 2008 a Düsseldorf davànti a òt-mila sustenidōr scatenâ. La Doro la canta da Dio Big City Nights e Rock You Like an Hurricane insém a Klaus Meine e a Rudolph Schenker di Scorpions. E pò i mòntan sù i Warlock dal 1986 par 'n eśibisiòṅ ch'la n s pōl minga daśmindgàr.

In dal 2012 la cantànta tedésca la dà a la luś Raise Your Fist al sò 12ś'm àlbum in studi.

Discugrafìa

c'n i Warlock

  • 1984 - Burning the Witches
  • 1985 - Hellbound
  • 1985 - You Hurt My Soul (EP)
  • 1986 - True As Steel
  • 1987 - Triumph And Agony

da par lē

  • 1989 - Force Majeure
  • 1990 - Doro
  • 1991 - Rare Diamonds (Racòlta)
  • 1991 - True At Heart
  • 1993 - Angels Never Diee
  • 1992 - Doro Live (dal Viṿ)
  • 1995 - Machine II Machine
  • 1998 - Love Me In Black
  • 1998 - The Ballads (Racòlta)
  • 1998 - Best of Doro (Racòlta)
  • 2000 - Calling The Wild
  • 2002 - Fight
  • 2004 - Classic Diamonds (dal Viṿ cun l'urchèstra ad Bochum)
  • 2005 - In Liebe und Freundschaft (EP)
  • 2006 - Warrior Soul
  • 2007 - B-Sides & Rarities (Racòlta)
  • 2009 - Fear No Evil
  • 2010 - 25 Years in Rock (dal Viṿ)
  • 2012 - Raise Your Fist

Duét

Culegamènt estéran