Redneck

Da Wikipedia.
C'l artìcul chè 'l è scrit in Miranduléś Emiliàn
'N ufìsi pîṅ ad śavàj da redneck: al manifèst ad George W. Bush, un fenicòtar da giardèṅ, un brét da casa, un dâd ad pèsa e 'n Geśù Crist ad plàstica


Al redneck l'è na paròla druàda p'r uféndar e tōr in gir al parsòni ad pèla biànca ch'i vìv'n in di stat dal sud di Stat Unî (cuma Alabàma, Tennessee, Kentucky, Arkànsas, Missisìpi) e ch'i èṅ di cuntadèṅ gréś cuma la śmalta, di vilàṅ, di cajòṅ e di badilòṅ e da spés di buletàri ch'i dascóran cun 'n asènt dal pòst dimóndi fòrt. I viv'n in camper o in dal cà ad légn, in campàggna o in muntàggna, da spés cun di sćiòp sèg.

Al sò significàt (Còl rós) al s riferìs a 'l fat che na vòlta chi lōr i sapàvan la tèra laurànd in di camp sóta 'l sōl e acsè a gh gniva al còl rós. Al cardénsi dal pòpul i dìś'n ch'i n capìsan gnint, ch'i vag'n a pés e a casa par divertìr-as, bvénd dla bira a ròt ad còl, ch'i sìan di cunservadōr ad dèstra e dal vòlti anc rasìsta e bigòt.

Dū vèć redneck p'r Obama

In Śvèsia a gh'è 'n grup ch'al 'l i tōś in gir, i Rednex, e anc soquànt cartòṅ animâ americàṅ i al fàṅ, cuma i The Simpsons e South Park. In di Stat Unî invéci in dal 1987 'l è vgnû fóra 'n film ad scarésa da rìdar dedicâ a i redneck, Redneck Zombies ad Pericles Lewnes, pò in dal 2011 'l è stâ 'l tùran dla cumèdia Redneck Roots.

Tut i an a East Dublin, in dal stat dla Geòrgia, a gh'è l'Ulimpìade di Rednecks, in dua i rìv'n in masa cun i sò tratōr, i sò càmion e pick up, un muć ad Còi rós par far dal gari cuma al lans dal fèr ad cavàl, al spudàć dla scménsa più luntàṅ ch'a s pōl o 'l tuf cun la pansa in dla śmalta[1].

Nòti

  1. I Śōg grand d'l argój sudìsta corriere.it, 14 ad Luj dal 2005