Faith No More

Da Wikipedia.

C'l artìcul chè 'l è scrit in Miranduléś Emiliàn


«
You want it all but you can't have it, it's in your face but you can't grab it, it's alive, afraid, a lie, a sin, it's magic, it's tragic, it's a loss, it's a win, it's dark, it's moist, it's a bitter pain, it's sad it happened and it's a shame, you want it all but you can't have it, it's in your face but you can't grab it. What is it? It's it.»
(EN)(Epic, 1989)
«
'T al vō tut ma ta n al pō minga avér, ta gh 'l à in fàcia ma ta n al pō minga ciapàr, 'l è viṿ, al gh'à paùra, na buśìa, un pcâ, 'l è màgic, 'l è tràgic, 'l è na pardùda, 'l è na vìnsita, 'l è scûr, 'l è mój, 'l è un dulōr amàr, purtòp 'l è sucès e 'l è na vargóggna, 'T al vō tut ma ta n al pō minga avér, ta gh 'l à in fàcia ma ta n al pō minga ciapàr. Cuś è'l? 'L è qual lè.»
(MUD)


I Califurniàṅ Faith No More i èṅ un grup rock americàṅ fundâ in dal 1982. I èṅ stâ tra i prim a sunàr al nu metal/crossover, miténd insém 'l hard rock cun dal cantàdi rap.

I Faith No More mènt'r i sònan in Purtugàl in dal 2010

Biugrafìa

Gl'Inisi

La prima versiòṅ dal grup l'è quéla dal 1982, sót al nóm ad Faith No Man, cun Mike Morris ("The Man" 'l è al sò scutmaj) a la vóś e chitàra, Roddy Bottum al tastéri, Bill Gould al bas e Mike Bordin a la baterìa.

I sarnìsan al nóm ad Faith No More quand Morris al và via e i tóśan Jim Martin a la chitàra mèntar i càmbian cantànt soquànti vólti, tulénd anc la Courtney Love (in séguit mujér ad Kurt Cobain, leader di Nirvana) e pò rivànd a Chuck Mosley.

Cun quést chè, i regìstran al pès We Care a Lot (A sém dimóndi interesâ) in dal 1985 (na tòlta in gir di cuncèrt ad beneficénsa cuma al Live Aid o dal cansòṅ cuma We Are the World di USA For Africa) e 'l àlbum Introduce Yourself (A s preśentém) in dal 1987.

'L arìṿ ad Mike Patton

I Faith No More da 'l viṿ in Cile

In dal 1988 Chuck Mosley al s in và e al vèṅ rimpiasâ par Mike Patton.

Al 20 ad Śugn dal 1989 i Faith No More i faṅ gnir fóra The Real Thing (La ròba véra), prumós par mèś 'd un tour cun i Metallica. Al disc al vénd bèṅ (du migliòṅ ad còpi vindùdi) e al ciàpa anc un prèmi Grammy.

Al pès più famóś 'l è al rap metal Epic, mèntar i àtar sìngui i èṅ From Out of Nowhere e Falling to Pieces. Da nutàr anc la cover di Black Sabbath War Pigs e la rabìda, da bòṅ o da burla, Surprise! You're dead (druàda in dal film Gremlins 2).

«
It's not over yet, you don't remember? I won't let you forget, the hatred I bestowed upon your neck with a fatal blow, from my teeth and my tongue I've drank and swallowed, but it's just begun, now you are mine, I'll keep killing you until the end of time. Surprise! you're dead! Guess what? It never ends.»
(EN)(Surprise! You're dead, 1989)
«
A n è incóra finìda, ta n t arcòrd minga? A n t farò briśa daśmingàr, 'l òdi ch'a t ò purtâ al còl cun un cólp fatâl, da i mè dènt e la mè lìngua a-j-ò bvû e mandâ śò, ma 'l è sól tacâ, adès at sē mia, A t tgnirò sòdi par masàr-at fiṅ a la fin di tèmp. Surpréśa! At sē mòrt! Induìna un pòc? E al n finirà mai.»
(MUD)

In dal 1992 a véd la luś Angel Dust (Pólvra 'd Àngil), purtâ in élt (tri migliòṅ ad còpi vindùdi ma sól setsènt mila in di Stat Unî) cun 'l apòǵ dla cover di Commodores Easy misa in d'l àlbum in un secónd mumènt e gnuda fóra anc cuma sìngul insém a la spuraciòna Be Aggressive, in dua di putèṅ tòlt sù da la scóla in du 'l insgnàva al pàdar ad Patton i faṅ i côr. I àtar sìngui i èṅ Midlife Crisis, na canta scrita da Mike pinsànd a la cantànta Madonna, Everything's Ruined e A Small Victory.

«
I started this, it's all for me, what's yours is mine and mine is mine, that's plain to see, so give it up, I've got to have, I swallow, I swallow, I swallow, I swallow. Be aggressive, B-e aggressive, B-e-a-g-g-r-e-s-s-i-v-e. What someone else would leave behind and spit it out, let go to waste, I claim as mine, you're my flavour of the week. Tall and reckless, ugly seed, reach down my throat, you filthy bird, that's all I need, this empty pit, I've got to feed to prove I'm fit, a healthy man, I've got to be. Malnutrition, my submission, you're the master and I take it on my knees.»
(EN)(Be Aggressive, 1992)
«
Mè a-j-ò tacâ, 'l è tut mio, quél ch'l è tuo 'l è mio e quél ch'l è mio 'l è mio, 'l è dimóndi ciàr, alóra dà-gh a muć, mè a gh'ò d'avér, a mand śò, a mand śò, a mand śò, a mand śò. Sì agresìṿ, sì-ì agresìṿ, sì-ì a-g-r-e-s-ì-ṿ. Quél che qualchidòṅ àtar al butarév via e al sputarév fóra butànd-al in dal rusc, mè a 'l vój pròpria, at sē al mè gust dla stmana. Gròs e spudurâ, rumèla daśgustóśa và-m śò par la góla, uśèl schifóś, a n vój àtar, cal stómag chè vōd a gh'ò d'impinìr-al par far védar ch'a stag bèṅ, 'n óm in fórma a gh'ò da èsar. Deperimènt, al mè èsar ad sóta, tè ad sē al padròṅ e mè a 'l acèt in śnòć
(MUD)

Al declìn

I Faith No More a Brixton in dal 2009

Durànt la registrasiòṅ ad King for a Day... Fool for a Lifetime (Rè p'r un dè... Stùpid p'r al rèst dla vita, 1995), Jim Martin al i mòla. Al sò pòst a vèṅ tòlt Trey Spruance, ex chitarìsta di Mr. Bungle. 'L àlbum al dvénta disc 'd òr in dal Régn Unî, Austràglia, Ulànda, Germàgna e Nóva Śelànda ma al séggna un pas indrē vindénd sól un migliòṅ e mèś ad còpi a 'l incìrca. I sìngui i èṅ tri: Ricochet, Evidence e Digging the Grave, quést chè sarnî par la culòna sunóra dal film Jack Frusciante è uscito dal gruppo.

I cuncèrt ad sustégn dal disc i vèṅan suspéś dòp quàtar méś.

«
It would be wrong to ask you why because I know what goes inside, is only half of what comes out, isn’t that what it’s about? To remind us we’re alive, to remind us we’re not blind, in that big, black hole comfortable. Digging the grave, I got it made, let something in, or throw something out? You left the door open wide.»
(EN)(Digging the Grave, 1995)
«
A sarév śbaliâ dmandàr-at al parchè, parchè a sò quél ch'a sucéd dèntar, 'l è sól mèś ad quél ch'a vèṅ fóra, a n è minga ad quést ch'a s dascór? P'r arcurdàr-as ch'a sém viṿ, p'r arcurdàr-as ch'a n sém mia òrub, in cal grand buś négar, còmad. Scavànd la fòsa, a gh'ò da far-al, lasa-gh quèl dèntar o tir-at fóra quèl àtar? 'T à lasâ vèrt tut 'l us.»
(MUD)

In dal 1997, cun Jon Hudson a la chitàra, i FNM i faṅ gnir fóra Album of the Year (L àlbum d'l an). Cun un migliòṅ ad còpi vindùdi, al sèst disc al gh'à un sucès discrèt in Europa (specialmènt in Germàgna) e in Austràglia, ma dimóndi più bas in di Stat Unî. In d'l Avrìl dal 1998, dòp avér publicâ i sìngui Ashes to Ashes, Last Cup of Sorrow e Stripsearch e la racòlta Who Cares A Lot? (A chi gh interésa un muć?, cun al sìngul I started a Joke, vècia b-side ad Digging the grave) al grup al s mòla uficialmènt.

«
It's over today, the heat is gone, time is gone, F for Fake, I feel no wrong, hide no wrong, I love this place, the lights under this face, so dry.»
(EN)(Stripsearch, 1997)
«
Incō l'è finìda, al cald 'l è sparî, al tèmp 'l è andâ, F par Fals, a n sènt gnint ad mal, a n gh'ò gnint ad mal da lugàr, a m piàś dimóndi cal pòst chè, al luś sóta cla fàcia chè, acsè suta.»
(MUD)

Prugèt da par lōr

Dòp ch'i Faith No More i s èṅ mulâ, i cumpunènt dal grup i s èṅ mis a far quèl àtar.

Al cantànt Mike Patton specialmènt al s è dat da far dimóndi, sunànd par Mr. Bungle (cun quìst chè 'l à rigistrâ un disc ciamâ Disco Volante e àtar 2), Tomahawk, Lovage, Fantômas (quàt'r àlbum cun lì lór), The Dillinger Escape Plan e Peeping Tom. Da par lò 'l à fat gnir fóra tri disc: Adult Themes for Voice, Pranzo Oltranzista e Mondo Cane in dal 2010. Quést chè 'l è na racòlta ad cover ad canti itagliàni di an Sinquànta e Ssanta cuma Senza Fine e Il cielo in una stanza, prudóta par la nòstra regiòṅ. Mike al dascór dimóndi bèṅ in Itagliàṅ (al n par gnanc ch'al sia 'n americàṅ), anc parchè 'l è stâ spuśâ cun la bulgnéśa Titi Zuccatosta dal 1994 al 2001. 'L à anc prudót di àtar artìsta quài Sepultura e Melvins e fundâ na sò cà discugràfica.

Al baterìsta Bordin invéci al s è mis a sunàr par Ozzy Osbourne, Korn e Jerry Cantrell di Alice in Chains.

Al tastérista Roddy Bottum l' à dat vita al grup Imperial Teen, famóś par la canta Yoo Hoo dal 1999. In dal 1993 'l iva dit publicamènt 'd èsar un fnòć e minga par gnint al tèst ad Be Aggressive, scrit par schèrs in di cunfrònt ad Patton, 'l è suo.

Furmasiòṅ

Quéla 'd adès

Ex-cumpunènt

Discugrafìa

Album in studi

  • 1985 - We Care a Lot
  • 1987 - Introduce Yourself
  • 1989 - The Real Thing
  • 1992 - Angel Dust
  • 1995 - King for a Day... Fool for a Lifetime
  • 1997 - Album of the Year

Album dal viṿ

  • 1990 - Live at the Brixton Academy

Racòlti

  • 1998 - Who Cares a Lot?
  • 2003 - This Is It: The Best of Faith No More
  • 2005 - Epic & Other Hits
  • 2005 - The Platinum Collection
  • 2009 - The Very Best Definitive Ultimate Greatest Hits Collection

Sìngui

  • 1987 - We Care a Lot
  • 1988 - Anne's Song
  • 1990 - From Out of Nowhere
  • 1990 - Epic
  • 1990 - Falling to Pieces
  • 1992 - Midlife Crisis
  • 1992 - A Small Victory
  • 1992 - Everything's Ruined
  • 1993 - Easy
  • 1993 - I'm Easy/Be Aggressive
  • 1994 - Another Body Murdered
  • 1995 - Digging the Grave
  • 1995 - Ricochet
  • 1995 - Evidence
  • 1997 - Ashes to Ashes
  • 1997 - Last Cup of Sorrow
  • 1997 - Stripsearch
  • 1998 - I Started a Joke

Videugrafìa

  • You Fat Bastards: Live at the Brixton Academy
  • Video Croissant
  • Evidence
  • Who Cares A Lot: Greatest Videos
  • This Is It: The Best of Faith No More
  • Introduce Yourself

Culegamènt estéran