Slaughter

Da Wikipedia.
C'l artìcul chè 'l è scrit in Miranduléś Emiliàn


«
Though it hurts me way deep inside, when I turn and look and find that you're not there, I try to convince myself but the pain, the pain is still not gone, still I drive down this lonely, lonely road, oooh I got this feelin, girl I've got to let you go but now you've got to fly (fly high), fly to the angels, Heaven awaits your heart.»
(EN)(Fly to the Angels, 1990)
«
Anc s'a m fà mâł dèntar dabòṅ, quànd a m pril a guàrd e a m rénd cònt ch'ta n gh sē minga, a próṿ a cunvìs'r-um ma 'l dulōr, al dulōr al n è incóra finî, a guîd incóra lung cla stra chè vōda, oooh a gh'ò cla sensasiòṅ chè, ragàsa a gh'ò da lasàr-'t andàr ma adès at gh'à da vulàr (vulàr élt), vulàr vèrs gl'àngii, al Paradìś al spèta 'l tò cōr.»
(MUD)


Dana Strum e Mark Slaughter tòlt śò in dal 2010

I Slaughter (Masèl) i èṅ un grup hard rock americàṅ uriginàri ad Las Végas (Nevàda). Al s è furmâ a la fiṅ dal 1988 da 'l séndri di Vinnie Vincent Invasion, al grup d'l èx chiratìsta di Kiss Vinnie Vincent, dòp che la Chrysalis Records l'iva sćiancâ 'l cuntràt sèg par far-'l invéci sōl c'n al cantànt Mark Slaughter e 'l basìsta Dana Strum. Chi lōr dū i aṅ pò ciamâ 'l chitarìsta Tim Kelly e 'l baterìsta Blas Elias par cumpletàr al grup.

In dla sò caréra i s èṅ fat nutàr subìt c'n al prim àlbum Stick It to Ya ch'al gh l'à cavàda a dvintàr “plàtin dópi” in di Stat Unî anc par via 'd sìngui ad sucès cuma Up All Night, Spend My Life, Mad About You e Fly to the Angels.

Biugrafìa

Al grup al fà vgnir fóra 'l sò prim disc in dal 1990, Stick It to Ya, e 'l è subìt un sucès, specialmènt i dū sìngui Up All Night e Fly to the Angels, cun qvést chè ch'al finìs in rutasiòṅ su MTV. Sèmp'r in c'l an lè a véd la luś un mini àlbum da 'l viṿ, Stick It Live, cun sinc pès dèntar.

Tim Kelly tòlt śò in dal 1990

Al grup al partìs p'r un tour insém a i Kiss e la sò canta Shout It Out la finìs in dla culòna sunóra dal film cun Keanu Reeves Un mitico viaggio. A la 18śma edisiòṅ di American Music Awards la banda la ciàpa 'n prèmi in dla categurìa di artìsta heavy metal nóṿ.

In dal 1992 i Slaughter i faṅ catàr in di negòsi 'l àlbum The Wild Life ch'al fà 'l sò debùt diretamènt in dla top 10 dla Billboard finénd par dvintàr “disc 'd òr”. Al grup al fà prumusiòṅ andànd in tour c'n Ozzy Osbourne. Purtròp par lōr 'l è 'l mumènt dal grunge ch'al cuntribuìs a śmursàr al luś su 'd lōr e pò i tàcan di prubléma persunài. Mark Slaughter al gh'à da uperàr-'s a 'l còrdi vucàli, Tim Kelly al vîṅ arestâ par tràfic ad dròga e Dana Strum al fà 'n incidènt in mòta. Inóltar la EMI, ch'la s éra in cal méntar cumpràda la Chrysalis Records, la decìd ad druàr la fòrbśa sćiancànd soquànt cuntràt cuma qvél cun Billy Idol e c'n i Huey Lewis and the News. Anc l'aventùra di Slaughter sèg la finìs cun la publicasiòṅ dla racòlta Mass Slaughter: The Best of Slaughter.

Al grup al pasa a l'etichéta CMC Records ma 'l disc Fear No Evil al n s al caga pròpria ninsòṅ a part un pôc in Giapòṅ. C'n al disc Revolution i Slaughter i próan la carta d'l “hard rock psichedèlig” ma anc cal lavōr chè 'l è 'n fiàsc cumersiàł. Al 5 ad Favràr dal 1998 a mōr in 'n incidènt in màchina Tim Kelly stablénd-as cónt'r un càmion in dal deśèrt d'l Ariśòna. Al grup al decìd 'd andàr avànti listés tulénd al chitarìsta Jeff Blando a 'l sò pòst e faghénd vgnir fóra un disc da 'l viṿ dedicâ a 'l sunadōr dasfurtunâ uriginàri dal New Jersey, Eternal Live, e 'n ùltim disc in studi, Back to Reality (1999).

Cumpunènt

Mark Slaughter in na fóto dal 2011
Dana Strum durànt un cuncèrt in dal Dakòta dal Nòrd dal 2008

Quéi 'd adès

  • Mark Slaughter - vóś, chitàra, tastéri (1988-incō)
  • Dana Strum - bas, côr (1988-incō)
  • Jeff "Blando" Bland - chitàra (1998-incō)
  • Zoltan Chaney - baterìa (2011-incō)

Mémbar vèć

  • Tim Kelly - chitàra (1988–1995, 1995-1998)
  • Blas Elias - baterìa (1988–2003)

Discugrafìa

Àlbum

  • 1990 - Stick It to Ya
  • 1992 - The Wild Life
  • 1995 - Fear No Evil
  • 1997 - Revolution
  • 1999 - Back to Reality

Da 'l Viṿ

  • 1990 - Stick It Live
  • 1998 - Eternal Live

Racòlti

  • 1995 - Mass Slaughter: The Best of Slaughter
  • 2002 - Then and Now
  • 2006 - The Best of Slaughter
  • 2011 - 10 Greatest Songs

Culegamènt estéran