Il tredicesimo piano

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg The Thirteenth Floor
Il tredicesimo piano
Tredicesimo piano.png
Craig Bierko in na figùra dal film
Al tredicéśum piàṅ
1999
Regia: Josef Rusnak
Scritùr: Daniel F. Galouye
Josef Rusnak • Ravel Centeno-Rodriguez
Atùr: Craig BierkoGretchen MolLeon Rippy
Armin Mueller-StahlSteven SchubBurt Bulos
Vincent D'OnofrioJeremy RobertsTia Texada
Dennis HaysbertRif HuttonHoward S. Miller
Müsica: Harald Kloser
Lengua: Ingléś
Dürä dal film: 100 minüt
Nasiòṅ: Stat UnîGermàgna


«
Ta gh pō andàr anc s'at pèns ch'al n gh sia minga.»
(Tagline dal film)


Il tredicesimo piano (Al tredicéśum piàṅ) 'l è 'n thriller ad fantasiénsa americàṅ e tedésc dal 1999 ad Josef Rusnak trat da 'l rumànś “Simulacron 3” ad Daniel F. Galouye (bèla purtâ in di schér'm in Il mondo sul filo ad Rainer Werner Fassbinder).

In dla culòna sunóra dal film, curàda p'r Harald Kloser, i s càtan di pès di The Cardigans (Erase/Rewind), di H.I.M. (Join Me In Death), di Deep Dish feat. Everything But The Girl (The Future of The Future (Stay Gold)) e àt'r incóra.

Custâ sédas migliòṅ ad dòlar, al film al 'n à fat pò sù daśdòt e mèś.

Sunt

Hannon Fuller (Armin Mueller-Stahl) 'l è 'n vèć prugramadōr ch'al gh'à na sucietà grôsa 'd infurmàtica a 'l tredicéśum piàṅ 'd un palàs in Califòrgna e al gh lavóra insém a i sò culaburadōr Douglas Hall (Craig Bierko) e Jason Whitney (Vincent D'Onofrio). Fuller 'l à invintâ 'l sistéma 'd creàr na realtà virtuàla ambintàda in dla Los Angeles dal 1937 pupulàda 'd persunàǵ ch'i créd'n ad star a 'l mónd dabòṅ, su 'l mudèl dla gint dal dè 'd incō, cuma lò e i sò culéga. Quànd chi lò, tacànd-'s a i sò machinàri, al fà 'n viàś a 'l indrē in dal tèmp, par ciulàr-as dal śōvni, al s insfìlsa da “utènt” in dla mènt dal sò sugèt là sibernètic ch'al pèrd la memòria 'd qvél ch'a gh sucéd méntar 'l è manipulâ.

Un dè Fuller al capìs un quèl sculvulgènt, al próa a dir-'l a Douglas ma qualchidòṅ 'l al masa prima. Prima 'd murìr però 'l iva fat in tèmp a scrìv'r incòsa su na létra, indirisàda a Douglas stés, ch'l iva lasâ in dal 1937 a 'n barìsta alter ego 'd Jason, Jerry Ashton (Vincent D'Onofrio). Douglas 'l è suspetâ 'd èsar lò 'l sasèṅ anc parchè 'l à ereditâ la sucietà infurmàtica che Hannon al vliva invéci saràr e pò a gh'è 'n testimòni, Tom Jones (Jeremy Roberts), che par ciapàr di bèsi 'l è prònt a dar-'g adòs. A 'l impruvìś a salta fóra na ragàsa, la Jane (Gretchen Mol), ch'la diś 'd èsar la fiōla 'd Fuller rivàda da Parì mo invéci al detective Larry McBain (Dennis Haysbert) 'l è sicûr ch'l'è sōl na buśiàrda parchè Hannon al n gh'iva minga di fiōi méntar lē la pâr èsar la caséra 'd un supermarcâ cun di prubléma 'd memòria, la Natasha Molinaro (Gretchen Mol).

Par saltàr-'g-an fóra, Douglas al decìd 'd andàr a pascàr la léltra in dal 1937, miténd-'s in di pagn dal sò alter ego, John Ferguson (Craig Bierko).

Culegamènt estéran