Edwige Fenech

Da Wikipedia.

C'l artìcul chè 'l è scrit in Miranduléś Emiliàn


L’Edwige Fenech (Annaba, 24 ad Dicémbar dal 1948), l'è n'atōra francéśa naturaliśàda itagliàna famóśa p'r al sò cumèdi spurcaciòni a l'itagliàna di an Stanta e anc p'r al pelìculi śali ch'l à girâ par di regìsta quài Mario Bava e Sergio Martino. In séguit, da i an Utànta in avànti, l'à anc fat la prudutōra, la stilìsta e la cundutōra televiśìva.

L'è stada ligàda p'r ùnd'ś an a 'l incìrca a 'l regìsta e prudutōr Luciano Martino e par daśdòt an a Luca Cordero di Montezemolo. La gh'à 'n fiōl ch'al s ciàma Edwin nâ in dal 1971.

Biugrafìa

L’Edwige Fenech la nas da pàdar maltéś e màdar sicigliàna in dal 1948 in Algerìa, in alóra culògna francéśa, in dla sità 'd mâr 'd Annaba, in chi tèmp là cgnusùda cuma Bône. Dvintàda baghéta la spatìna a Nisa par studiàr a 'l lìceo bai e madśìna. A quatórd'ś an la rècita in dal film Toutes folles de lui (Tuti mati par lò) ad Norbert Carbonnaux e in dla pelìcula tedésca Alle dame del castello piace molto fare quello. Sèmp'r in dal 1967 la tōś part a 'n cuncōrs ad belésa ciamâ “Lady France” durànt al Fèstival ad Cannes e la 'l vins.

Par la Fenech i s vèran acsè 'l pòrti dal cìnema. In dal 1969 la rècita par Mario Bava in dal śal 5 bambole per la luna d'agosto e 'l an dòp la taca la sò culaburasiòṅ cun Sergio Martino faghénd al film Lo strano vizio della signora Wardh e pò la cuntìnua cun Tutti i colori del buio e Il tuo vizio è una stanza chiusa e solo io ne ho la chiave. Dal 1972 'l è anc Perché quelle strane gocce di sangue sul corpo di Jennifer? ad Giuliano Carnimeo. 'L an dòp la rècita insém a Corrado Pani in Anna, quel particolare piacere ad Giuliano Carnimeo.

L'Edwige in “Top Sensation”
La Fenech in “Tut i culōr dal scûr”
Fóto da “Śōg'la bèṅ a scópa la sgnōra?”
Insém a Fioravanti in “A t ringràsi... nunóna”
Insém a Pippo Franco in na figùra ad “Cal pès grôs dl'Ubalda nûda dal tut e bèla bujènta”
Insém a Montagnani in “La mujēr vìrgin”
La Fenech in di tìtui ad “L'insgnànta”
Na figùra ad “Al visi straṅ dla sgnōra Wardh”

In cal méntar la dà inìsi a i sò lavōr in dal gènar dla cumèdia spurcaciòna a l'itagliàna cun dū tìtui cult: Quel gran pezzo dell'Ubalda tutta nuda e tutta calda e Giovannona Coscialunga disonorata con onore. Tut i la péscan, Mariano Laurenti par La bella Antonia, prima monica e poi dimonia e par La vedova inconsolabile ringrazia quanti la consolarono, Aldo Grimaldi par Quando le donne si chiamavano madonne, Giuliano Carnimeo par La signora gioca bene a scopa? e Marino Girolami par Grazie... nonna girâ insém a Giusva Fioravanti ch'al fà la part dal śuvnòt Carlét méntar lē l'è la Marijuana, la nóna.

In dal 1975 la tórna a 'l śal cun Nude per l'assassino in dua la rècita insém a Nino Castelnuovo. 'L an dòp 'l è 'l tùran ad 40 gradi all'ombra del lenzuolo e di film in dua la fà la pulisiòta, l'infarméra, la suldàda e l'insgnànta cun di tìtui quài La poliziotta fa carriera (1976), La dottoressa del distretto militare (1976), La soldatessa alla visita militare (1977) e L'insegnante va in collegio (1978).

Insém a sò marè Luciano Martino la gira La vergine, il toro e il capricorno, pò cun Steno la tōś part a La patata bollente. In dal 1980 la gira La moglie in vacanza... l'amante in città, Zucchero, miele e peperoncino e Io e Caterina cun Alberto Sordi. Dòp Cornetti alla crema e Ricchi, ricchissimi... praticamente in mutande la taca a recitàr manc. La tórna a 'l cìnema in dal 2007 p'r un cammeo in dal film ad scarésa Hostel: Part II 'd Eli Roth.

Filmugrafìa

Culegamènt estéran