La poliziotta fa carriera
|
C'l artìcul chè 'l è scrit in
Miranduléś |
 La poliziotta fa carriera
| ||
 La Fenech e Michele Gammino in na figùra dal film | ||
| La pulisiòta la fà caréra 1976 | ||
|---|---|---|
| Regìa: Michele Massimo Tarantini | ||
| Scritōr: Francesco Milizia • Marino Onorati Michele Massimo Tarantini | ||
| Atōr: Edwige Fenech • Alvaro Vitali • Gigi Ballista Michele Gammino • Mario Carotenuto • Clara Bindi Gianfranco D'Angelo • Jimmy il Fenomeno Francesco Mulé • Riccardo Garrone • Luigi Ventura Giuseppe Pambieri • Franca Scagnetti • Bruno Alias | ||
| Müsica: Pulsar | ||
| Léngua: Itagliàṅ | ||
| Dürä dal film: 94 minüt | ||
| Nasiōṅ: Itàglia | ||
La poliziotta fa carriera (La pulisiòta la fà caréra) l'è na cumèdia dal 1976 ad Michele Massimo Tarantini in na quàlc manéra séguit dal film La poliziotta ad Steno cun l'Edwige Fenech che chè la tōś al pòst dla Mariangela Melato. Cal film chè 'l è 'l prim capìtul dna trilugìa 'd film ad Tarantini cun la Fenech cuma prutaginìsta ch'la cuntìnua cun La poliziotta della squadra del buon costume dal 1979 e La poliziotta a New York dal 1981.
In Spaggna l'è vgnuda fóra c'n al tìtul ad “Bella, valiente y buena” mént'r in Frància i la cgnósan cuma “La flic chez les poulets” e in Germâgna cuma “Flotte Teens und das verrückte Polizeirevier”.
Sunt
La Gianna Amicucci (Edwige Fenech) l'è la fiōla dal purtēr Alfredo (Francesco Mulè) e l'è na ragàsa dimóndi bèla ma la gh'à 'n asènt rumàṅ dimóndi fòrt. I gh piàśan dimóndi i lìbar śai e 'l sò sógn 'l è qvél ad dvintàr na pulisiòta cuma 'l sò muróś pugléś Cecè (Michele Gammino) che però par lē 'l è tròp fiàp. Al dutōr Alberto Moretti (Giuseppe Pambieri) al viṿ in dal sò palàs, al dascór cun 'n asènt emigliàṅ pēś e al gh buta sèmpar gl'òć adòs ma quànd al gh mét anc al maṅ in s'al cûl al s ciàpa 'n śmataflòṅ acsè 'l impàra. Piutòst la Gianna la fà la dōlsa cun sò pàdar (Gigi Ballista) ch'al fà 'l questōr e dònca 'l prév dar-'g un cuć. E difàti s'a n fus par lò la ragàsa la n arév minga pasâ 'l selesiòṅ parchè l'è 'n diśàst'r in tut.
Al prim giōr'n ad lavōr la Gianna l'è talmènt imbalsàda che cun la sò Fiat 126 ch'al gh'à tòlt sò pàdar la fà subìt un ciòc cun la màchina dal cumisàri Romolo Antinori (Mario Carotenuto), al sò cap, e la gh fà anc la multa. Chi lò al la manda a lauràr cun 'l agìnt Tarallo (Alvaro Vitali). Durànt un gir in un depòśit 'd fèrvèć la Gianna la véd la màchina d'l unurévul sicigliàṅ Mannello (Gianfranco D'Angelo) e dònca la ciàma sò mujér Rosalia (Clara Bindi) a 'l telèfun par dmandàr s'i l'ìsan par caś rubàda. Lē la diś ad nò ma pò la i dà a sò marè parchè lè davśèṅ a gh'è la cà dna rója che lē la cgnós.
Adès la Gianna la gh'à da 'ndàr a catàr l’Anna Tardioli, la màd'r ad Luigino, un putèṅ lasâ a 'l sōri parchè lē 'd nòt la fà la putàna p'r un papòṅ ad nóm Mojefuma (Nello Pazzafini). P'r a n dar minga in d'l òć la pulisiòta la s vistìs da scaja e la s mét na pirùca biónda in cô, guàrda caś pròpria la nòt ch'al sò muróś, insém a 'n sò amìg (Gino Pagnani), al decìd ad far un “puttan tour” p'r i viài dla sità. Quànd i la védan, Cecè al śmònta śò p'r andàr a dascórar sèg ma da davśèṅ al l'arcgnós e a gh vîṅ un cōlp. Mèntar lē la gh in diś quàtar, Mojefuma al la céd a Federico Innocenti dit Burutàlc (Riccardo Garrone) ch'al vōl na bèla fémna da purtàr a na fèsta, in du a gira anc dla dròga, par far gusàr par la prima vòlta al fnucèṅ Tonino (Gastone Pescucci) ch'invéci 'l iva bèla butâ 'l òć su 'n àt'r òspit risulèṅ (Maurizio Mattioli). Federico al diś a la dóna che s'la gh la cava a far-al dvintàr 'n óm, lò al gh darà sènt-mila franc in cambi. Méntar tut i gh tìn'n adrē p'r a n pèrdar-'s al spetàcul, al cantànt dl'animasiòṅ (Jimmy il Fenomeno) al canta la màrcia nusiàla. Avénd cumpasiòṅ ad lò, la scapa via par la fnèstra e pò la s fà vgnir a tōr p'r Alberto che però al và in biànc anc 'sta vòlta chè.
E finalmènt, a la fiṅ, la Gianna, dòp avér cunsgnâ a la giustìsia al boss dla dròga Burutàlc, la gh la cava a tōr 'l uśèl in maṅ, la 'l iva prumìs, e a dar indrē 'l papagàl ch'al s éra pardû a 'l sò pruprietàri.