Alle dame del castello piace molto fare quello

Da Wikipedia.
C'l artìcul chè 'l è scrit in Miranduléś Emiliàn
Video-x-generic.svg Komm liebe Maid und mache
Alle dame del castello piace molto fare quello
Alle dame del castello piace molto fare quello.png
L'Edwige Fenech in na figùra dal film
A 'l dami dal castèl a gh piàś dimóndi far qval lè
1969
Regia: Jozef Zachar
Scritùr: Alfredo Medori • Kurt Nachmann
Atùr: Edwige FenechSieghardt RuppMichaela May
Angelica OttGustav KnuthWalter Buschhoff
Müsica: Claude Alzner
Dürä dal film: 85 minüt
Lengua: Tedésc
Nasiòun/Paèiş: Germâgna


«
Par mè i lìb'r i èṅ sōl un quèl da dar-ag śò la pólvra»
(La Sabine la vèra 'l bèc e la diś la sua.)


Alle dame del castello piace molto fare quello (A 'l dami dal castèl a gh piàś dimóndi far qval lè) l'è na cumèdia spurcaciòna tedésca dal 1969 ad Jozef Zachar ch'la tōś ispirasiòṅ da i racònt malnét 'd Honoré de Balzac. Qvésta chè l'è la pelìcula in dua l'à eśurdî l'Edwige Fenech.

A 'l èstar 'l è cgnusû anc c'n i tìtui ad “The Brazen Women of Balzac” in di Stat Unî, “Sex Is a Pleasure” in dal Régn Unî, “Les vierges folichonnes” in Frància e “Sedentas de Amor” in Braśìl mént'r in Itàglia in dal 1978 'l è stâ distribuî incóra cuma “Piacere di donna”.

Sunt

Al cònt Roland (Joachim Hansen) al viṿ in un castèl insém a la biónda Eugènie (Francy Fair), minga incóra sò sò mujér, una ch'la gh'à 'l ciòld fis p'r al sès ma lò al n la cuntènta briśa e lē l'è custréta acsè a catàr sfōg in di lìbar spurcaciòṅ 'd Honoré de Balzac. Un dè a riva lè sò anvōda Annette (Michaela May) p'r imparàr a muntàr i cavài ma invéci la s mét a lèśar òṅ ad chi lìbar lè anc lē a vōś élta cun sò sîṅ ch'al s arlìa sèg dgénd ch'al ragasōli par bèṅ i n vaṅ minga in gir in sótvèsta cum la fà lē.

Di àt'r òspit dal cònt i èṅ al banchér Loewensdhal (Walter Buschhoff) e sò mujér Isabelle (Caterina Altieri) una ch'la 'l à spuśâ malvluntéra sōl par pagàr i dèbit ad sò pàdar. Inóltar lò al n l'à incóra gusàda p'r un pat ch'i aṅ fat in alóra e lē la gh'à na vója ad far-as di àtar... In cal méntar l’Annette la vōl che la camaréra Sabine (Angelika Ott) la gh cuntìs incòsa su 'l sès parchè la n gh la cava pròpria minga 'd aspitàr al matrimòni par far dal purcarìi. La Sabine, tulénd un cunsìli da 'l lìbar, la gh diś ad far finta 'd indurmintàr-'s in un parc c'n al gambi mèśi avèrti e c'n al vènt ch'al gh tira sù la stanèla. Faghénd acsè chi óm i cascaràṅ śò cuma di póm mars, qvést 'l è pôc ma sicûr. La ragàsa la próa a pinsàr da chi la vrév èsar cunquistàda e la sarnìs al capstalēr François (Sieghardt Rupp) ma invéci a scultàr tut qvél ch'i dìśan 'l è Fritz al casadōr (Ralf Wolter), 'n óm incóra vìrgin ch'al n véd 'l óra ad far na ciuladìna e sparàr acsè i sò prim cōlp.

Quànd i rìv'n anc Manuel da Silva (Sieghardt Rupp) e la sò dóna, la Felicita (Edwige Fenech), a dir-la tuta butàda via cuma na butìglia vōda, l’Isabelle la 'l adócia subìt ma anc l’Annette la fà cumpàgn tant che prima 'd andàr a culgàr-as la gh'à 'l curàǵ ad dir «A psî cuntinuàr a far qvél ch'a v pâr e a stusàr quànt a vlî parchè mè quànd a dórum òṅ al prév far da tut mèg, a n gh la cav'rév mai a far-'g a mènt». Méntar Manuel e l’Isabelle i s la gòdan, a riva lè Loewensdhal ch'l è gelóś mat e al sènt udōr ad còran ma, da 'l mumènt che lò al n cgnós briśa 'l còrp ad sò mujér nûd, 'l óm al la fà franca méntar lē la s cunsóla cun l’Eugènie. La Felicita invéci l'è incasàda négra e la và acsè da Loewensdhal par dir-ag ch'admàṅ da matìna al sgnōri i turàṅ al sōl cavàdi śò dal tut in dal bòsc dònca lò al purà védar bèṅ c'n i sò òć ad chi l'éra 'l còrp ch'l iva vdû a lèt cun Manuel.

Culegamènt estéran