40 gradi all'ombra del lenzuolo

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg 40 gradi all'ombra del lenzuolo
40 gradi all'ombra del lenzuolo.png
La Fenech e Milián in na figùra dal film
40 grâd in dl'òra dal linsōł
1976
Regia: Sergio Martino
Scritùr: Sergio Martino
Tonino Guerra • Giorgio Salvioni
Atùr: Edwige FenechEnrico Montesano
Barbara BouchetSydne RomeTomás Milián
Giovanna RalliMarty FeldmanAldo Maccione
Alberto LionelloDayle HaddonRenzo Rinaldi
Mimmo CraoFranco DiogeneNello Pazzafini
Fiammetta BarallaAngelo PellegrinoDorit Henke
Salvatore BaccaroSonia De Dominicis
Müsica: Maurizio De Angelis • Guido De Angelis
Lengua: ItagliàṅEmigliàṅRumagnōlNapulitàṅ
Dürä dal film: 105 minüt
Nasiòṅ: Itàglia


«
Dòp ch'a î pruâ incòsa... pruâ al Sès c'n un Surìś.»
(Tagline dal film)


40 gradi all'ombra del lenzuolo (40 grâd in dl'òra dal linsōł) l'è na cumèdia a epiśòdi dal 1976 ad Sergio Martino.

A 'l èstar l'è cgnusùda cuma “Cuarenta grados a la sombra de la sabana blanca” in Spaggna, “Fiebre italiana” in Mèsic, “Sex with a Smile” in di Stat Unî, “Kadinlarin dünyasi” in Turchìa e “Müssen Männer schön sein?” in Germàgna.

Sunt

Prim epiśòdi: La cavalóna

L’Emilia Chiapponi (Edwige Fenech), nomen omen, l'è andàda a star a Fënza in Emìglia-Rumàgna da quànd l'à spuśâ 'n avucàt dal pòst (Renzo Rinaldi) ma in sità i la cgnósan tut c'n al scutmàj ad “La cavalóna” parchè l'è na pèpa da lcar-'s i bafi. Tut i s la vrévan gusàr, specialmènt al cavalēr Marelli (Tomás Milián), un put traśandâ ch'al pòrta dū uciài ch'i pàr'n i vēdar dna butìglia e di cavìi ch'i sumìlian a na sēv tajàda mâł. Chi lò, ch'al lèś la Famìja cristiàna e al gh'à di santèṅ stramnâ da tut al bandi, al gh'à tut al nòt di insùni pòran fra lò e la cavalóna e al gh'à biśógn ad cuntàr-i a l’Emilia par telèfun a sinc óri dla basōra. A fòrsa 'd andàr avànti acsè a la dóna a gh vîṅ vója dabòṅ ad far-as c'l óm lè ch'la n à mai vdû. La gh dà acsè apuntamènt ad nòt in dla circuvalasiòṅ in dua la s fà ciulàr a la granda dòp avér-ag dit in dialét «Adès a t fag védar mè chi l'è la cavalóna!». Al giōran dòp a s vîṅ a savēr in un bar che qvél ch'a s l'è fata a n è minga 'l cavalēr ma 'n óm c'n i bafi àtar tant brut o anc da piò (Salvatore Baccaro) ch'adès al vōl śibìr da bév'r a tut dgénd in dialét «La m paréva na cavàla in calōr la m paréva, la m salta adòs, la m à fat murìr da 'l gust cla vaca... A m 'n sòṅ fat sèt, àtar che la Nives!». Marelli, ch'al n gh'éra mia andâ parchè al gh'iva paùra, al capìs ch'l à pardû l'ucaśiòṅ dla sò vita e al cróda śò par tèra in strada.

Secónd epiśòdi: ’L àtim ch'al scapa via

Al milanéś Filippo (Alberto Lionello) al fà 'l autìsta par la cuntésa rumàna Esmeralda (Giovanna Ralli), al la scaròsa dapartùt méntar lē la fà la gata mòrta sèg dasquaciànd al gambi e dand-'s al rusét in di làbar méntar lò al la tîṅ 'd òć mént'r al guìda andànd in a risć ad far 'n incidènt. Dòp ès'r-as farmâ in di camp, cun lē ch'la ciàpa 'l Sōl c'n i òć sarâ, lò al n in pōl piò e al gh salta adòs par gusàr-la in sla Rolls Royce ma purtròp in sal più bèl al gh'à 'l mâł dla lumàga. Cla sira lè Filippo al dà indrē la màchina, tòlta a nuléǵ, e a s vîṅ a savēr ch'i dū i èṅ na còpia ad puvràs (i gìr'n in Sincsènt) cun di prubléma a far sès e i próan a druàr dla fantaśìa par védar s'i càtan la manéra ad dar dal pēv'r a 'l situasiòṅ. Filippo al diś a sò mujér ch'la n è minga malnéta abàsta méntar lē la gh dà dal culatòṅ. Sinténd cla paròla lè dita a lò, a Filippo a gh vîṅ dûr dimóndi in mèś a 'l tràfic e alóra, tgnénd adrē a qvél ch'a gh'iva dit al dutōr, 'd inprufitàr-'s ad tut i mumènt bòṅ prima ch'i scapìsan via, i dū i tàc'n a ciulàr in mèś a la strada.

Tèrs epiśòdi: La guàrdia dal còrp

Par tgnir adrē a sò fiōla Marina (Dayle Haddon) e prutéśar-la, 'n imprenditōr pîṅ ad bèsi in viàś a New York par lavōr, al dà 'l incàrag a la guàrdia dal còrp Alex (Marty Feldman), magnadōr ad caròti, 'd andàr in dla sò vila par tgnir-la 'd òć. Chi lò al tîṅ adrē a la létra a 'l sò còmpit e al n la mòla mai, al s insfìlsa par la fnèstra anc in dal bagn méntar lē la s lava in dla vasca. Un dè la ragàsa la mét in pē na móstra 'd art mudèrna in sò dal giardèn e la ciàma 'l artìsta 'd Palèrum François (Mimmo Crao), ch'al pâr un fiōl di fiōr, par far véd'r al sò òpri. Alex al s fà càr'g ad tastàr c'n al maṅ tut i amìg hippy ch'i gh'aṅ da vgnir. Quànd a rivâ lè 'n travestî, lò par 'n àtim al créd ch'al sia armâ parchè al lugàva quèl in mèś a 'l gambi. In dal méntar ch'i òspit i bàlan e i nōdan in pisìna, la Marina la s pòrta in cà François par baśàr-al ma Alex al s mét in mèś incóra. La ragàsa la dmanda ad far-as da na banda p'r un pôc parchè la vōl far 'l amōr sèg, quàl lè al gh diś ad sè ma al n fà minga dabòṅ. Par paràr-al via François al gh tira na ghèga e pò al próa a saplìr-al in na statṿa cun dal cimènt („a la manéra di sicigliàṅ“, al diś lò) ma Alex a gh salta fóra sćiancànd-la c'n un śghét, péna in tèmp par mandàr a gambi a l'ària un piàṅ par rapìr la Marina da part dla banda ad François.

Quàrt epiśòdi: I bèsi 'n bóca

Salvatore (Enrico Montesano) al sòna a 'l us dla cà dla mujér (Barbara Bouchet) 'd un cumendadōr lumbàrd ch'al viṿ in Śvisra (Franco Diogene). Sèg al gh'à na valìś pîna 'd bèsi, vint migliòṅ ad franc. 'L óm al gh i śibìs a pat che lē la gh vaga a lèt par n'óra 'd arlój parchè da quànd al l'à vduda 'l à pardû la tèsta par lē e pò al dè dòp al gh'à da tōr 'n aparéć e al n la vidrà mai piò. La dóna la fà l'uféśa ma chi bèsi lè i gh farévan còmad par tōr na plisa, dònca la gh diś ad sè. La matìna dòp 'l óm al tórna a sunàr a la pòrta e al gh dà àtar vint migliòṅ parchè al vōl i 'l aṅ spustâ 'd un dè e chi bèsi lè i gh vànsan parchè al banchi i èṅ saràdi e lò al n pōl briśa purtàr-i sèg in aparéć. Dòp la secónda gusàda, i dū i s véd'n a 'l aeropòrt parchè lò al gh'à da partìr e lē la gh'à da cumpagnàr sò marè ch'al tórna da 'n viàś ad lavōr. Salvatore al gh diś ch'in di cèso a gh'è 'n àtar pachét ad bèsi par lē, 'l ùlt'm e pò basta. Finìda la tèrsa ciulàda, la dóna la và incónt'r a sò marè ma la véd ch'a gh'è anc Salvatore. Al cumendadōr al dmànda a 'l óm s'l à purtâ i sò bèsi da Milàṅ cum i éran 'd acòrd, ssanta migliòṅ ad franc, e lò, ch'ad mistēr al pòrta i sòld ad chi àt'r a 'l èstar par lugàr-i, al gh diś ad sè parchè al i à bèla cunsgnâ a la sgnōra.

Quìnt epiśòdi: Un pòst tranquìl

Al raśunēr Adriano Serpetti (Aldo Maccione) al gh'à da tōr 'n apartamènt in un palàs a Nàpuli. Vrénd la frèstra al véd na dóna ch'la s vōl cupàr butànd-as śò da 'l ùltim piàṅ, la Marcella Fosne (Sydne Rome), sunadōra 'd arpa. In na quàlc manéra al gh la cava a tiràr-la dènt'r e a far-ag pasàr la vója 'd masàr-as ma pò la vója la gh vîṅ a lò, qvéla ad far-'s-la parchè l'è pròpria na bèla ragasōla. Chi lē, ch'la gh'à biśógn ad śnum, la 'l invìda in dal sò apartamènt par gusàr insém, al prubléma 'l è ch'la gh'à anc un caṅ lóv ciamâ Otello dimóndi gelóś dla sò padròna e rabî c'n i furastēr. Al cōlm dla sfurtùna 'l è ch'al raśunēr 'l è dimóndi spauróś. Mént'r i èṅ a lèt Adriano al s caga adòs e dònca al gh dà a muć. Al fà sù i linsōi par lavàr-'g-i e al s in và dgénd a la Marcella ch'al g'à bèla na mujér e dū fiōi e s'al gh'à dit ch'al la vliva spuśàr 'l éra sōl par purtàr-'s-la a lèt ma 'l cagnàs al n è minga 'd acòrd e al gh baja adòs. Adriano al scapa via par la fnèstra e al rìsćia 'd vulàr śò. Tut i crédan ch'al s vōl tōr la vita, anc la Marcella che quànd la 'l véd la créd ch'l al faga par lē. Sù 'd gir par la cuntintésa, la gh và adrē muntànd insìma a 'l curniśòṅ dal palàs par baśàr-al ma invéci la n fà àtar che butàr-'l ad sóta. Par furtùna che śò a gh'è 'l tlòṅ di vìgii dal fōg ma anc Otello ch'al gh cur adrē.

Culegamènt estéran