La signora gioca bene a scopa?

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg La signora gioca bene a scopa?
Signora gioca bene a scopa.png
Carlo Giuffrè e la Fenech in na figùra dal film
Śōg'la bèṅ a scópa la sgnōra?
1974
Regìa: Giuliano Carnimeo
Scritōr: Tito Carpi • Carlo Giuffrè
Luciano Martino • Francesco Milizia
Atōr: Carlo GiuffrèEdwige FenechLia Tanzi
Franca ValeriCarlo Delle PianeDidi Perego
Gigi BallistaOreste LionelloEnzo Cannavale
Enzo RobuttiEnzo AndronicoCarla Mancini
Müsica: Alessandro Alessandroni
Léngua: ItagliàṅEmigliàṅNapulitàṅVènet
Dürä dal film: 85 minüt
Nasiōṅ: Itàglia


«
Come si gode con la Marisa da nessuno si gode briśa.»


La signora gioca bene a scopa? (Śōg'la bèṅ a scópa la sgnōra?) l'è na cumèdia dal 1974 ad Giuliano Carnimeo giràda a Parma ma tut gl'atōr ch'i fànan la part dgl'emigliàṅ i dascóran cun 'l asènt bulgnéś.

A 'l èstar l'è cgnusùda cuma “Póker de camas” in Spaggna e “Poker in Bed” in di Stat Unî.

Sunt

Michele Cammagliulo (Carlo Giuffrè) 'l è 'n napulitàṅ ch'l à vèrt un negòsi ad scarpi in piàsa a Parma insém a 'l sò sòci Peppino (Enzo Cannavale). A sarvìr in butéga a gh'è un ragàs vènet, Tonino (Carlo Delle Piane), piutòst ingiangulâ.

A Michele a gh piàś dimóndi śugàr a poker ma al pèrd sèmpar c'n al cumendadōr Gervasio Caminata (Gigi Ballista) e acsè na sira 'l è custrét a dastacàr 'n aségn ch'l al mandarév in ruìna. Mént'r al s cata sóta 'l lèt dla Marisa (Lia Tanzi), la pràtica dal cumendadōr cgnusùda cuma „La stangóna“, al sènt che chi lò 'l à cunsgnâ 'l aségn a 'l surèli Nascimbeni, la Giulia (Franca Valeri) e la Monica (Didi Perego), par pagàr-'g al lat. Michele al cgnós bèṅ cla cougar dla Giulia parchè lì lē la s al gusa ch'l è 'n piaśēr ślungànd-ag na quàlc vòlta di bòṅ da sènt-mila franc.

Un giōran, méntar Michele 'l è drē a sarvìr in negòsi la sgnōra Fantoni (Carla Mancini) ch'la gh'à na vila a Carp, a vèṅ dèntar la Giulia ch'la gh diś ad pasàr da cà sua cla sira lè ch'la gh'à da finìr ad pituràr un quàdar ch'l'iva fat guardànd-al cavâ śò, a gh cala sōl un quèl, 'l uśèl, ch'la s arcòrda ch'l è bèl grôs ma ch'la 'l vōl védar bèṅ incóra p'r a n śbaliàr-as mia. Michele al gh và sprand ad tōr indrē 'l aségn ma la dóna la 'l à dâ a sò surèla e acsè 'l óm al gh'à da gusàr-'s-la anc se chi lē la dgiva ch'la gh impurtàva sōl dal bèsti, al vachi, i tôr, i cunèṅ, i pui e i faśàṅ. Adès ch'l'à imparâ bèṅ al sò segrét però la 'l vōl tgnir lè par tgnir adrē a i cònt méntar la dóna di fat, la Giuditta (Adriana Facchetti), la śmadóna a róta 'd còl.

Un dè a riva in dla via 'l anvōd dal surèli Nascimbeni, Alberto (Oreste Lionello), insém a la sò muróśa tedésca, l’Eva (Edwige Fenech). Invéci ad dar-ag śò a lèt, chi lò al pénsa sōl a butàr śò di racònt cun la sò màchina par scrìvar mént'r al napulitàṅ al li próa tuti par métar-'g al maṅ adòs e al gh la cava parchè l’Eva la gh'à 'n punt débul: la pèrd la tèsta quànd la sènt al mój e l'àqua. Ma a fòrsa ad gusàr-'s-al, cal tri dóni lè i al frùstan tròp e 'l dutōr (Enzo Andronico) al gh cunsìlia ad tōr-la più dólsa. Michele al dmanda ajùt a la Marisa par far-as dar al nóm 'd òṅ ch'al pòsa dar-ag na maṅ. Chi lē la gh manda 'l antiquàri Primo Guendalini (Enzo Robutti) ma i daśdòt sentimétar ch'a s dascurìva par lò i éran qvéi dna statṿa dònca lì lò al n è briśa 'l galét giùst. Quànd però Michele al véd Tonino pisàr al capìs subìt ch'l à catâ finalmènt al tisi giùst par cgl'inśgórdi dla Monica e dla Giulia méntar l’Eva al s la vōl tgnir strica lò.

Culegamènt estéran