Stefanie Vögele

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


La Stefanie Vögele a 'l servìsi


La Stefanie Vögele (Leuggern, 10 ad Mars dal 1990) l'è na tenìsta śvisra, prufesiunìsta da 'l 2006. L'è rivàda a èsar la nùmar sinquànta dal mónd 'l 8 ad Luj dal 2013.

L'è élta 170 cm e la péśa 60 chilo. La dróa al bras dèstar e la tira 'l arvèrs a dū maṅ. A gh piàś guardàr a la televiśiòṅ i cartòṅ animâ di Simpsons e i telefilm ad Friends. La gh'à tri surèli e 'n gat. L'è bòna ad dascóran in Tedèsch, Ingléś e Francéś.

In dla sò caréra l'à vins sinc tìtui ITF in tut.

Caréra

La śvisra la taca al 2007 śugànd dū turnèo ITF a Stucàrda (al nùmar òṅ) e a Belfort. In Germâgna la s férma in semifinàl cun la Petra Kvitová par 7-6 1-6 2-6 mént'r in Frància la riva in finàl baténd l'Andrea Petković par pò pèrdar cun la Virginie Pichet par 6-2 0-6 2-6. Dòp avér mis in bisàca un tìtul ITF in Ìndia, la pèrd in di quàrt a Antàglia cun l'Angelique Kerber par 1-6 1-6.

In dal 2008 la śōga, pasànd al qualificasiòṅ, al sò prim turnèo WTA a Esturìl ma la pèrd subìt da la Marija Kirilenko par 4-6 7-6 1-6. In Agóst la sa spòsta in di Stat Unî par tōr part a 'l ITF dal Bronx andànd fóra in semifinàl cun l'Elena Bovina e par śugàr al qualificasiòṅ di US Open. La i pasa baténd la Gréta Arn, la Sloane Stephens e la Lucie Hradecká ma pò la vèṅ castigàda subìt da la Flavia Pennetta par 6-2 2-6 2-6. La finìs 'l an a la puśisiòṅ 130 dal mónd.

La śvisra tòlta śò a Pòrtrōś in dal 2009
La Vögele tòlta śò al dè dla Befàna dal 2012

In dal 2009 la fà prim tùran a Hobart e Dubai. In Maǵ la śōga 'l ITF ad Bùcarest e lè la bat la Stéphanie Foretz Gacon in di quàrt e la Julia Görges in semifinàl prima ad pèrdar da l'Andrea Petković 3-6 2-6. In Śugn la riva incóra in finàl in dal turnèo ITF ad Nottingham dand la paga a la Melanie South e a la Yanina Wickmayer ma pò la céd a l'itagliàna Maria Elena Camerin 2-6 6-4 1-6. La stmana dòp la bat l'Ekaterina Makarova a Birmingham par pò pèrdar in di quàrt da la Na Li par 3-6 6-7. A Wimbledon la s férma subìt cun la Venus Williams mént'r a Praga la fà secónd tùran vinsénd la prima partìda cun la Petra Martić. In Luj la patìs na scòpla da la Sara Errani in semifinàl a Pòrtrōś 1-6 2-6. La pèrd anc da cl'atra itagliàna, la Francesca Schiavone, a 'l secónd tùran di US Open, 4-6 4-6 al puntéǵ.

In dal 2010 la và fóra a 'l secónd tùran a gl'Australian Open par maṅ dla Viktoryja Azaranka. Dòp avér batû la Nadia Petrova a Dubai, la Vögele la mùcia sù siē scunfìti ad fila e pò atri siē a partìr da 'l 4-6 2-6 patî da la Venus Williams in dal prim tùran ad Madrid. La s tira 'n pò sù cun i quàrt ad Pòrtrōś in dua la bat la Petra Kvitová 7-5 6-2 e la Tamira Paszek 7-5 6-4 prima ad cédar a la śugadōra ad cà, la Polona Hercog, par 5-7 5-7. A Ìstanbul la manda a cà la Jaroslava Švedova prima ad far al valìś lē cun l'Elena Vesnina 3-6 2-6. La sèra 'l an cun al secónd tùran a Uśàka (2-6 2-6 da la Marion Bartoli) e tri prim tùran in àtar tànt turnèo ITF.

In dal 2011, dòp avér vins 'n ITF in dal Régn Unî in Mars, la gh próa anc a Réś ma la léva 'l téndi a 'l secónd tùran pardénd da l'austragliàna Marina Eraković 3-6 4-6. In Luj la tōś part a 'l WTA ad Bùdapest. Dòp avér dâ la paga a la Petra Martić par 7-5 7-5 la céd a la bulgnéśa Sara Errani par 3-6 1-6. La finìs 'l an da nùmar 138 dal mónd.

In dal 2012 la pasa 'l qualificasiòṅ a Sydney e a Melbourne ma pò la và fóra a 'l prim tùran par maṅ dla Viktoryja Azaranka e dla Sabine Lisicki. A Charleston la riva in di utàṿ in dua la pèrd da la Vera Zvonarëva par 7-5 3-6 4-6. In Setémbar la céd in finàl a l'Annika Beck in dal turnèo ITF ingléś ad Shrewsbury ma la stmana dòp la pōl mét'r in bisàca al tìtul ad qvél ad Clermont-Ferrand (6-4 6-1 a la Tatjana Malek). La in vins òṅ anc a la fiṅ d'l an in Giapòṅ cóntar la Kimiko Date-Krumm.

In dal 2013 la fà secónd tùran a Shenzhen (5-7 4-6 da la Marion Bartoli) e a Parì a 'l quèrt. Chè l'è bòna ad bàtar la Mandy Minella, la Stéphanie Foretz Gacon e la Mónica Puig in dal qualificasiòṅ e pò anc la Cvetana Pironkova prima ad lasàr strada par 6-7 3-6 a la Petra Kvitová. In Favràr la pèrd in dla semifinàla ad Memphis da la Marina Eraković e pò in Mars la riva a 'l secónd tùran a Indian Wells (2-6 3-6 da la Nadia Petrova) e a Miami (4-6 2-6 da la Kirsten Flipkens), sèmpar dand la paga a la Petra Martić. In Avrìl la śōga dimóndi bèṅ al turnèo ad Charleston parchè la gh bat la Carla Suárez Navarro, la Julia Görges e la Caroline Wozniacki. La céd sōl in tri sét a la Jelena Janković in semifinàl. A Madrid in Maǵ la pasa 'l qualificasiòṅ ma briśa 'l prim tùran in dua la cata la valensiàna Anabel Medina Garrigues ch'la la mét in riga cun un 6-3 6-3. A 'l Roland Garros la manda a cà l'Heather Watson e la vinsidōra in sla tèra rósa ad Bruxelles dla stmana prima, l'èstuna Kaia Kanepi. La śvisra la gh'à pò da far al valìś cun la Marija Kirilenko par 6-7 5-7. A 'S-Hertogenbosch la bat a 'l prim tùran la Julija Putinceva ma pò la pèrd da la Lesja Curenko 1-6 6-7. La gh và mâl anc a Wimbledon (5-7 6-7 a 'l prim tùran da la Sorana Cîrstea).

Culegamènt estéran