Arantxa Rus

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


L'ulandéśa tòlta śò in dal 2011
L'Arantxa impgnàda in di US Open dal 2009
La Rus impgnàda cun la Clijsters in dal 2011


L’Arantxa Rus (Delft, 13 ad Dicémbar dal 1990, a s lèś [aʀɑntʃa ʀœs] in Ulandéś) l'è na tenìsta ulandéśa prufesiunìsta da 'l 2009. Al sò ranking più bèl l'è al nùmar ssant'òṅ, tucâ al 13 'd Agóst dal 2012.

L'è mansìna e la tira 'l arvèrs a dū maṅ. L'è élta 180 cm e la péśa 65 chilo.

In dla sò caréra l'à vins al turnèo di śōvan di Australian Open dal 2008 (6-3 6-3 a la śugadōra ad cà Jessica Moore) e mis in bisàca siē tìtui ITF, òṅ anc in Itâglia (a Bari in d'l Avrìl dal 2008 cóntar la parmśàna Alberta Brianti, 2–6 7–5 6–3).

Caréra

La taca al 2009 śugànd al qualificasiòṅ dal turnèo 'd Hobart ma la vèṅ sćiancàda dabòṅ da la spagnōla Lourdes Domínguez Lino 0-6 0-6. A 'l quint tentatìṿ la gh la cava a 'ndàr dènt'r al tablòṅ prinsipàl 'd un turnèo WTA a Monterrey ma lè la pèrd pò a 'l prim tùran da la Roberta Vinci 4-6 6-2 2-6. La riva invéci a 'l secónd tùran a Marbella (5-7 2-6 da la Kaia Kanepi). Dòp dū ITF śugâ in Cruàsia, la s qualìfica p'r al Roland Garros in dua la pèrd a 'l secónd tùran a òpra dla Jaroslava Švedova. A Pòrtrōś la ciàpa na lesiòṅ da la Sara Errani ch'la la bat 6-1 6-0. La s bèca n'atra scòpla da la rumagnōla a gl'US Open ch'la gh mòla un 6-0 6-3 a 'l prim tùran. La finìs 'l an śugànd dū ITF in Frància. In Utóbar la riva in di quàrt a Poitiers (4-6 4-6 da la Pauline Parmentier) ma la fà méj in Nuvémbar vinsénd qvél ad Nantes (6-3 6-2 a la Renata Voráčová) e tut al dū vòlti mandànd a cà la Camila Giorgi lung la strada.

In dal 2010 la cata incóra la Sara Errani a 'l prim tùran a Marbella ma la ciàpa la paga sèg par la tèrsa vòlta in 'n an: 1-6 2-6. La s fà valēr invéci a Estoril in dua, pasàdi al qualificasiòṅ, la bat la Kirsten Flipkens 7-6 6-1 par pò pèrdar in di quàrt da la Sorana Cîrstea 4-6 1-6. In dal turnèo ad cà ad 'S-Hertogenbosch la s imprufìta dna carta salvàdga e la riva a 'l secónd tùran in dua la céd 2-6 5-7 a la Dominika Cibulková. In sla tèra ad Palèrum e Bad Gastein la và a cà subìt par maṅ dl'Alberta Brianti e dl'Alizé Cornet. La tórna a Poitiers in Utóbar ma la pèrd da la Stéphanie Cohen-Aloro. La finìs 'l an a 'l 138śum pòst.

In dal 2011 la pasa bèṅ al qualificasiòṅ a gl'Australian Open sénsa lasàr par strada gnanc un sét e pò la bat anc la Bethanie Mattek-Sands 6-1 3-6 7-5 a 'l prim tùran prima ad cédar a la Svetlana Kuznecova 1-6 4-6. In Favràr la riva in finàl in d'l ITF ad Stucólma (3-6 4-6 da la Kristina Mladenovic). A Marbella la pèrd a 'l prim tùran da la carta salvàdga Dinara Safina (crudàda śò a 'l 81śum pòst), a Madrid la fà listés cóntar la Marija Šarapova ma cavànd-gh-la sèmpar a purtàr via 'n sét a gl'ex nùmar òṅ dal mónd. A 'l Roland Garros l'è bòna invéci ad bàtar a 'l secónd tùran la nùmar dū dal mónd in carga, la Kim Clijsters, par 3-6 7-5 6-1 par pò lasàr strada a la Marija Kirilenko. In Śugn la pèrd la finàl d'l ITF ad Cùneo (4-6 3-6 da l'Anna Tatišvili). In Agóst la śōga gl'US Open e lè la bat l'Elena Vesnina par pò lasàr-'g al péni cóntar la nùmar òṅ dal mónd Caroline Wozniacki 2-6 0-6.

'L inìsi dal 2012 'l è 'n diśàstar: quàtar scunfìti ad fila. A Dubai la n pasa briśa al qualificasiòṅ (2-6 2-6 da la Simona Halep) e a Indian Wells incóra 'n prim tùran. In Mars la s tira sù vinsénd 'l ITF 'd Osprey in di Stat Unî, ma pò la pèrd subìt a Charleston (6-1 4-6 4-6 da la Anna Tatišvili) e a Barcelóna (4-6 1-6 da la Nastassja Burnett). In Avrìl la và a śugàr al turnèo maruchèṅ ad Fes: dòp avér batû la Klára Zakopalová par 6-4 5-7 7-6, la pèrd da la nùmar sènt-déś dal mónd Laura Pous Tió 3-6 5-7. In Maǵ la śōga un Roland Garros d'incurniśàr vinsénd tri incóntar ad fila: 6-4 4-3 bandòṅ a la Jamie Hampton, 6-3 7-6 a la Virginie Razzano (ch'l iva péna far fóra la Serena Williams) e 7-6 2-6 6-2 a la nùmar vint-sèt dal mónd Julia Görges. In sal più bèl la pèrd da l'èstuna Kaia Kanepi 1-6 6-4 0-6. A Wimbledon la s cava la vója ad pigàr la nùmar sinc dal mónd Samantha Stosur a 'l secón d tùran par 6-2 0-6 6-4. In Agóst la pèrd a 'l prim tùran a Montreal (da la Christina McHale), a Cincinnati (da la Sesil Karatančeva) e a gl'US Open (1-6 3-6 da la Galina Voskoboeva), sōl un tùran da piò a Dallas (6-7 2-6 da la Jelena Janković). La finìs 'l an cun atri tri scòpli in sal cupét: 6-1 6-2 par la Caroline Wozniacki a Seùl, 6-0 6-2 par la Viktoryja Azaranka a Linz e 3-6 6-4 6-1 par la Daniela Hantuchová in Lussembûrg.

Purtròp par lē i prim tùran i cuntìnuan anc in dal 2013: la in mùcia òt ad fila (dū vòlti p'r òpra dla valensiàna María Teresa Torró Flor) ch'i dvèntan nóṿ śuntànd-ag la scunfìta in dal qualificasiòṅ ad Sydney ch'la s bèca da la Galina Voskoboeva. In Maǵ la vins sōl na partìda in dū ITF francéś e pò la pèrd subìt anc in di WTA ad Bruxelles (2-6 5-7 da la Ol'ga Govorcova) e dal Roland Garros (1-6 2-6 da la sò bistiàsa négra Sara Errani). La s tira un pôc sù rivànd in di quàrt d'l ITF ad Marsìglia (2-6 4-6 da l'Anabel Medina Garrigues), ma pò la tórna a pistàr i camp dal sircùit WTA a Nurumbèrga, 'S-Hertogenbosch e Wimbledon e i rìvan par lē àtar tri prim tùran. A bat'r-la i èṅ la Jelena Janković 6-4 6-2, la Magdaléna Rybáriková 7-5 6-2 e l'Ol'ga Alekseevna Pučkova 6-4 6-2. L'ulandéśa la dvènta acsè la śugadōra cun più scunfìti ad fila in sal cupét in dla stòria dal tènis dal fémni parchè la in mùcia sù darsèt, faghénd cumpàgn a la Sandy Collins in di an Utànta[1]. Crudàda śò a 'l 156śum pòst, par far sù di punt in présia in Luj la và a śugàr 'n ITF in Ulànda ma la pèrd a 'l secónd tùran da la nùmar 459 dal mónd, la śvedéśa Sandra Roma. Par sò furtùna al diśàstar al s férma al 15 ad Luj a Bad Gastein in dua la Rus la tórna a vìnsar 'n incóntar cun la María Teresa Torró Flor par 7-5 5-7 6-4.

Culegamènt estéran

Nòti