Roger Federer

Da Wikipedia.

C'l artìcul chè 'l è scrit in Miranduléś Emiliàn


Roger in alenamènt


Roger Federer, (Baśilèa, 8 'd Agóst dal 1981, a s lèś /ˈrɒdʒər ˈfɛdərər/ in Tedésc) 'l è 'n tenìsta śvìsar prufesiunìsta da 'l 1998, nùmar òṅ dal mónd par 302 stmani in tut (237 ad fila, da 'l 2 ad Favràr dal 2004 a 'l 17 'd Agóst dal 2008). 'L è élt 186 cm e al péśa 85 chilo. Al sò stîl clàsic ad śōg, fat ad cólp a 'l vōl e cun 'n arvèrs a na maṅ sōla, a s véd a fadìga in di sircùit d'l ATP, adèsa pîṅ ad piciadōr da fónd camp.

In dla sò caréra Federer 'l à vins darsèt tìtui dal Gran Slam (dapartùt), stanta-siē turnèo ATP (al prim a Milàṅ in dal Śnar dal 2001), e siē Masters. 'L à anc vins na mdaja 'd argìnt a gl'ulimpiàdi da par lò e una 'd òr in dópi.

Al sò rivàl stòric 'l è Rafael Nadal: sèg l'à vins siē finàli ATP pardénd-an trédas.

Caréra

Federer al s cava la sē
Prim piàṅ dal servìsi ad Roger
Federer tòlt śò a Doha in dal 2012
Roger al s lasa andàr

Dòp avér fat al sò debùt in dal sircùit ATP in dal 1998, Roger al pòrta a cà al sò prim tìtul in Itâglia in dal 2001 baténd Julien Boutter. A e 'l Roland Garros e a Wimbledon al riva a i quàrt ma chè 'l è bòṅ ad far fóra Pete Sampras in sinc sét tirâ par 7-6 5-7 6-4 6-7 7-5, farmànd acsè al sò record ad vìnsiti ad fila a 31. Al finìs 'l an a 'l 13śum pòst.

In dal 2002 al fà 'n pas in avànti śgranfgnànd a la fiṅ d'l an al sèst pòst di tenìsta masć, rivànd in finàl in dal turnèo ad Miami pardénd da Andre Agassi. In dal 2003 al dvénta al prim śvìsar a vìnsar Wimbledon e 'l al fà cóntar 'l austragliàṅ Mark Philippoussis in finàl. Gl'urganiśadōr dal turnèo ad Gstaad i gh pòrt'n in regàl na vaca da lat par prèmi e lò al la tōś dand-'g al nóm ad Juliette. Ma al regàl più bèl al s al fà lò purtànd-'s a cà al Master dla fiṅ d'l an spasànd via Andre Agassi par 6-3 6-0 6-4, rivànd pò a èsar al nùmar dū dal ranking da drē ma tacâ a Andy Roddick.

Al 2004 al taca par lò a la granda, tant ch'al vins al sò secónd Slam (in Austràglia) e pò anc a Dubai, a Indian Wells e a Ambûrg. In sla tèra rósa al và fóra a 'l tèrs tùran a Parì p'r òpra dal braśigliàṅ Gustavo Kuerten ma al gh la cava a vìnsar par la prima vòlta in Śvisra (a Gstaad). In mèś, al sò secónd Wimbledon (Roddick al gh'à da cédar par 4-6 7-5 7-6 6-4).

Finàli in di Gran Slam

Turnéo An Vins/Pardû Aversàri in finàl Puntéǵ
Wimbledon 2003 V Mark Philippoussis 7-6, 6-2, 7-6
Australian Open 2004 V Marat Safin 7-6, 6-4, 6-2
Wimbledon 2004 V Andy Roddick 4-6, 7-5, 7-6, 6-4
US Open 2004 V Lleyton Hewitt 6-0, 7-6, 6-0
Wimbledon 2005 V Andy Roddick 6-2, 7-6, 6-4
US Open 2005 V Andre Agassi 6-3, 2-6, 7-6, 6-1
Australian Open 2006 V Marcos Baghdatis 5-7, 7-5, 6-0, 6-2
Roland Garros 2006 P Rafael Nadal 1-6, 6-1, 6-4, 7-6
Wimbledon 2006 V Rafael Nadal 6-0, 7-6, 6-7, 6-3
US Open 2006 V Andy Roddick 6-2, 4-6, 7-5, 6-1
Australian Open 2007 V Fernando González 7-6, 6-4, 6-4
Roland Garros 2007 P Rafael Nadal 6-3, 4-6, 6-3, 6-4
Wimbledon 2007 V Rafael Nadal 7-6, 4-6, 7-6, 2-6, 6-2
US Open 2007 V Novak Đoković 7-6, 7-6, 6-4
Roland Garros 2008 P Rafael Nadal 6-1, 6-3, 6-0
Wimbledon 2008 P Rafael Nadal 6-4, 6-4, 6-7, 6-7, 9-7
US Open 2008 V Andy Murray 6-2, 7-5, 6-2
Australian Open 2009 P Rafael Nadal 7–5, 3–6, 7–6, 3-6, 6-2
Roland Garros 2009 V Robin Söderling 6-1, 7-6, 6-4
Wimbledon 2009 V Andy Roddick 5-7, 7-6, 7-6, 3-6, 16-14
US Open 2009 P Juan Martín del Potro 3-6, 7–6, 4-6, 7-6, 6-2
Australian Open 2010 V Andy Murray 6-3, 6-4, 7-6
Roland Garros 2011 P Rafael Nadal 7-5, 7-6, 5-7, 6-1
Wimbledon 2012 V Andy Murray 4-6, 7-5, 6-3, 6-4
Wimbledon 2014 P Novak Đoković 7-6, 4-6, 6-7, 7-5, 4-6

Culegamènt estéran