Casey Dellacqua

Da Wikipedia.
Jump to navigation Jump to search
C'l artìcul chè 'l è scrit in Miranduléś Emiliàn


Un drit dl'austragliàna tirâ a Wimbledon in dal 2013


La Casey Dellacqua (Perth, 11 ad Favràr dal 1985) l'è na tenìsta austragliàna prufesiunìsta da 'l 2002. L'è élta 165 cm e la péśa 66 chilo. La stà a Sydney. La dróa al bras sinìstar e la tira 'l arvèrs a dū maṅ. Al film ch'a gh piàś da piò 'l è Dirty Dancing.

In dla sò caréra la n à mai vins di tìtui WTA ma in dópi l'à śugâ quàtar finài dal Gran Slam, una cun la Francesca Schiavone in dal 2008 e tri cun l'Ashleigh Barty in dal 2013, pardénd-li però tuti, cuntintàd-as acsè ad tri tìtui WTA e ad vint-a-tri ITF. In dla clasìfica ad singuàr la gh l'à cavàda a rivàr a 'l 36śum pòst al 16 ad Śugn dal 2014, cun vint-a-dū tìtui ITF.

In d'l Agóst dal 2013 la gh'à abû 'n fiōl ciamâ Blake Benjamin da la sò dóna, l’Amanda.

Caréra

Dòp avér pistâ i camp ITF in dal 2002, in dal 2003 la próa a qualificàr-as in di turnèo WTA ad Gold Coast e ad Canberra ma la n gh la cava briśa. La śōga 'l Australian Open par via dna carta salvàdga ma la pèrd a 'l prim tùran. A Wimbledon la và fóra subìt in dal qualificasiòṅ ad òpra dla mudnéśa Adriana Serra Zanetti. In dal 2004 la tōś part sōl a di turnèo ITF a part qvél ad Gold Coast in dua però la và a cà subìt.

In dal Śnar dal 2005 la vins al sò prim incónt'r in dal sircùit prinsipàl a Hobart par pò pèrdar par 6.7 0-6 da la Na Li. In dal 2006 la riva a 'l secónd tùr'n anc a Bali (1-6 3-6 da la Marion Bartoli) e a Calcùta (3-6 2-6 da l'Iroda Tulyaganova). La s tira sù śugànd pò quàtar finàli ITF ad fila e s'rànd 'l an a la puśisiòṅ 172 dal mónd.

La Dellacqua durànt un dópi dal 2008
La Casey tòlta śò a Wimbledon in dal 2013
Un servìsi dl'austragliàna a Róma 2014

L'austragliàna la taca mâł al 2007 pardénd da la Roberta Vinci in dal qualificasiòṅ ad Gold Coast e pò subìt a Sydney e a Melbourne (in dua l'iva tòlt part dasfrutànd na carta salvàdga) da l'Ana Ivanović e da la Katarina Srebotnik. La Dellacqua la śōga pò tri turnèo ITF e la i vins tut. In Śugn la và a śugàr in sl'èrba in Inghiltèra. A Birmingham la pèrd a 'l secónd tùran da l'Eleni Daniilidou mènt'r a Wimbledon la s qualìfica baténd la Petra Cetkovská ma pò la céd a la Nicole Pratt par 3-6 4-6. A gl'US Open la bat la Jaroslava Švedova 6-3 6-2 par pò ciapàr la paga da la Marija Šarapova ch'la gh lasa sōl un śōg. Par la Casey i rìv'n àtar quàtar secónd tùr'n a Bali (in dua la pèrd da la Jelena Janković dòp avér batû la Caroline Wozniacki), a Calcùta, a Tòkyo e a Bangkok (6-2 3-6 5-7 da la Flavia Pennetta).

'L inìsi dal 2008 al và a la granda par la tenìsta ad Perth parchè la riva in di quàrt a Hobart (4-6 5-7 da l'Eleni Daniilidou) e in di utàṿ a gl'Australian Open in dua l'è bòna ad mandàr a cà la Karin Knapp, la Patty Schnyder (nùmar quìndas dal mónd) e l'Amélie Mauresmo (nùmar daśdòt dal mónd) prima ad céd'r a la Jelena Janković par 6-7 1-6. Al sò mumènt 'd òr al cuntìnua anc a Indian Wells in dua la pèrd sōl in di utàṿ da la Vera Zvonarëva par 7-6 0-6 4-6. In Maǵ la bat la Sara Errani a Straśbûrg andànd fóra a 'l secónd tùran cun la Chan Yung-jan. A 'l Roland Garros la bat la padròna ad cà, e nùmar nóṿ da mónd, la Marion Bartoli, par 6-7 6-3 6-2 e pò anc cl'atra francéśa, la Nathalie Dechy, par 6-4 6-2 prima ad far al valìś a 'l tèrs tùran cun la Carla Suárez Navarro c'n al puntéǵ ad 3-6 3-6. Stés riśultâ anc a Wimbledon in dua la pèrd da la Nicole Vaidišová par 2-6 4-6. A gl'US Open la gh riva da nùmar quarànta dal mónd ma la pèrd listés da na qualificàda francéśa, la Julie Coin. In dal 2009 la śōga sōl tri incónt'r in tut parchè pò la s fà mâł a la schina. La pèrd da la Sara Errani 1-6 2-6 a Sydney, da la Daniela Hantuchová 6-7 4-6 a Melbourne e da la Francesca Schiavone 1-6 1-6 a Dubai.

Praticamènt fóra da 'l primi mila, l'austragliàna la pōl cuntàr in dal 2010 su tri carti salvàdghi in di turnèo ad cà ad Brisbane, Sydney e Australian Open. La pasa dū tùran sōl a Melbourne in dua la pèrd pò da la Venus Williams par 1-6 6-7. In Favràr, par far sù di punt, la vins 'n ITF da vintsìnc-mila dòlar in sl'èrba. In Mars la pasa 'l qualificasiòṅ a Miami ma pò la và fóra a 'l prim tùran cun l'Ekaterina Makarova. La Casey la patìs 'n àt'r infurtùni e la pèrd incóra 'l rèst dla stagiòṅ. La próa a turnàr a Wimbledon ma a n gh'è gnint da far, la pèrd 1-6 0-6 cun la Bojana Jovanovski.

Crudàda dimóndi śò in clasìfica, da 'd là da 'l sincsentéśum pòst, la Dellacqua la próa a tiràr-as sù in dal 2011. In Avrìl la vins 'n ITF in Austràglia. In Maǵ a Bruxelles la bat la nùmar vint dal ranking, la Shahar Peer, par 6-1 5-7 6-3 ma pò la céd in tri sét a la giapunéśa Ayumi Morita. Dòp avér pardû a 'l prim tùr'n a gl'US Open da l'Alizé Cornet, la Casey la śōga siē ITF da vintsìnc-mila dòlar e la i vins tut, pasànd acsè da la puśisiòṅ 274 a la puśisiòṅ 156 a la fiṅ d'l an.

'L inìsi dal 2012 a n è minga un quèl ad speciàł, cun l'austragliàna ch'la n pasa mai al secónd tùran. In Maǵ la s mét in bisàca 'n ITF da sinquànta-mila dòlar śugâ in sl'èrba giapunéśa in dua la cata sōl dal śugadōri da 'd là da 'l duśentéśum pòst. A 'l Roland Garros la pèrd a 'l prim tùran da la Sara Errani, pò finalìsta, ma la la fà sudàr dimóndi purtànd-la a 'l tèrs sét. A Birmingham la n śōga minga 'l sò incóntar dal tèrs tùran cun la Jelena Janković ma la cata pò listés la sèrba in dla semifinàl ad Dallas e la gh pèrd par 5-7 4-6. In tut al manéri la Dellacqua la finìs la stagiòṅ in dal primi sènt, preciśamènt a la puśisiòṅ utànt'òt.

Dòp sinc prim tùr'n ad fila, e a n ès'r-as minga qualificàda a Miami, la Casey la và a śugàr 'n ITF a Ciàs in Śvisra ma la pèrd a 'l secónd tùran da la Giulia Gatto-Monticone. In séguit la n s qualìfica minga a 'l Roland Garros e gnanc a Wimbledon. A gh và méj a gl'US Open ma chè la và fóra listés a 'l prim tùran cun l'Ajla Tomljanović. In Setémbar la bat la Kristina Mladenovic a Tòkyo par pò cédar a la Dominika Cibulková. Gl'ùltim turnèo śugâ in dal 2013 i èṅ dū ITF da sinquànta-mila dòlar a Bendigo e la i pòrta a cà facilmènt lasànd par strada sōl dū sét in déś partìdi.

La Dellacqua la taca bèṅ al 2014 faghénd secónd tùr'n a Brisbane (3-6 1-6 da la Viktoryja Azaranka) e a Hobart (5-7 6-4 3-6 da l'Alison Riske) e utàṿ a gl'Australian Open in dua la bat la Vera Zvonarëva 6-2 6-2, la Kirsten Flipkens 6-3 6-0 e la Jie Zheng 6-2 6-4 par pò pèrdar in tri sét da l'Eugenie Bouchard. A Indian Wells, pasànd p'r al qualificasiòṅ, la riva in di quàrt baténd la Christina McHale, la Kirsten Flipkens, la Roberta Vinci e la Lauren Davis par bandòṅ. La céd pò a la Simona Halep par 2-6 2-6. A Miami i gh dànan na carta salvàdga e lē la la mèrita dabòṅ parchè la pèrd sōl a 'l tèrs tùran cun la Venus Williams par 4-6 7-5 4-6. In sla tèra rósa la fà secónd tùr'n a Róma, a Straśbûrg e a 'l Roland Garros, méj in sl'èrba in dua la riva in semifinàl a Birmingham (6-7 1-6 da la Barbora Záhlavová-Strýcová) e a 'l secónd tùr'n a Wimbledon (4-6 0-6 da l'Agnieszka Radwańska).

Culegamènt estéran