Alexandra Cadanțu

Da Wikipedia.
C'l artìcul chè 'l è scrit in Miranduléś Emiliàn


La Cadanțu a 'l servìsi, sfinìda e cun dal lansōr adòs
La ruména tòlta śò in dal 2013


L’Alexandra Cadanțu (Bùcarest, 3 ad Maǵ dal 1990) l'è na tenìsta ruména. In dal 2012 l'à śugâ pardénd-la na finàl WTA a Monterrey. In bisàca la gh'à siē siē tìtui ITF. L'è rivàda a èsar la nùmar ssanta-sinc dal mónd al 30 ad Luj dal 2012.

L'è élta 170 cm e la péśa 56 chilo. La dróa al bras dèstar e la tira 'l arvèrs a dū maṅ. A gh piàś guardàr di film, lèśar e durmìr. La sò atōra favurìda l'è l'Angelina Jolie.

Caréra

La Cadanțu la vins al sò prim tìtul ITF in dal 2006 a Bùcarest (al nùmar siē) baténd in finàl l'Irina-Camelia Begu par 6-3 1-6 6-3. 'L an dòp la vins 'l ITF nùmar sinc dla capitàla dla Rumanìa dòp ès'r andàda fóra in di quàrt in dal nùmar quàtar da la Julia Görges. In dal 2010 la vins àtar dū tìtui ITF a Bùcarest e a Crajòva. In Nuvémbar la fà 'l pîṅ anc in Braśìl vinsén-an àtar dū e bandunànd in dla finàl in 'n àtar.

In dal 2011 la próa par la prima vòlta a śugàr un turnèo WTA ma la n pasa briśa 'l qualificasiòṅ a Bugutà, a Fès e a Esturìl. In Maǵ la và fóra a 'l secónd tùran in d'l ITF ad Réś batùda par 2-6 1-3 bandòṅ da la Sabine Lisicki. In Śugn la pèrd da cl'atra tedésca, la Mona Barthel, in dal qualificasiòṅ ad Wimbledon mént'r a Båstad l'è l'Elena Bovina a mét'r-ag di spróc in mèś a 'l ródi. In Luj la pèrd in di quàrt d'l ITF ad Bùcarest (al nùmar dū) da la Simona Halep par 3-6 6-1 6-7. In Setémbar la s mét in bisàca al tìtul ITF ad Bjèla ma minga qvél ad Telavi in dua la lasa strada in finàl a l'Aleksandra Panova. In Utóbar, baténd la Mona Barthel 6-2 5-7 6-4, la gh la cava a śugàr al sò prim turnèo WTA in Lussembûrg e anc a purtàr in pòrt la sò prima partìda (6-1 6-4 a la Nastas'sja Jakimava) par pò cédar a la Lucie Hradecká 3-6 4-6. La sèra 'l an a 'l 96śum pòst dal ranking dal fémni.

In dal 2012 la śōga al sò prim turnèo dal Gran Slam a Melbourne ma la và fóra subìt ciapànd un 0-6 1-6 da la Roberta Vinci. In Favràr la pèrd a 'l prim tùran a Bugutà (2-6 2-6 da la Romina Oprandi) ma pò la riva in finàl a Monterrey baténd via via la Jelena Dokić 3-6 6-1 7-5, la Silvia Soler Espinosa 7-6 6-3, la Lourdes Domínguez Lino 6-2 6-0 e la Gréta Arn 6-2 4-6 7-5. In finàl però la gh'à da cuntintàr-as cun cl'atra ungheréśa, la Tímea Babos, ch'la gh'à la méj sèg par 6-4 6-4. In Avrìl a Fès la bat subìt l'Alberta Brianti in tri sét ma pò la và fóra ad òpra dla Simona Halep par 2-6 5-7. In Maǵ la pèrd dimóndi mâl e a 'l inìsi a Róma e a 'l Roland Garros, prima da la Francesca Schiavone 1-6 2-6 e pò da la Marija Šarapova 0-6 0-6. Anc in sl'èrba la fà di pastròs, andànd fóra sèmpar in dal prim tùran cun l'Irina Falconi, la Dominika Cibulková e la Marija Kirilenko. A Palèrum la fà méj baténd la Kiki Bertens e l'Alizé Cornet ma in di quàrt la céd 2-6 2-6 a la Sara Errani pò vinsidōra dal turnèo sicigliàṅ. In Luj la pèrd par dū vòlti (semifinàl e finàl) da la spagnōla María Teresa Torró Flor in di ITF ad Bùcarest e 'd Olomouc ma almànc l'è bòna ad casàr fóra śugadōri cuma la Nastassja Burnett, la Pauline Parmentier e la Mónica Puig. Da Seùl a la fiṅ d'l an la n vins piò gnanc 'n incóntar.

In dal 2013 la pòrta a cà un secónd tùran a Cali (4-6 7-5 2-6 da la Sesil Karatančeva) e i quàrt a Bugutà (2-6 1-6 da la Jelena Janković). A Acapûlc, Miami e a Charleston invéci la pèrd subìt da la Sara Errani, da la Stefanie Vögele e da la Madison Keys. A Katowice, pasànd p'r al qualificasiòṅ, la riva in semifinàl baténd la Sabine Lisicki 7-5 6-2, l'Irina-Camelia Begu 4-6 6-3 6-4 e la Shahar Peer 5-7 6-3 6-3 prima ad cédar a la Petra Kvitová par 0-6 4-6. In Avrìl la pèrd a 'l prim tùran a Marrakesch da la Kristina Mladenovic 4-6 6-4 4-6 e in Maǵ la riva in finàl in d'l ITF ad Praga in dua la céd par 6-3 1-6 1-6 a la Lucie Šafářová. A Wimbledon la fà 'l cólp casànd fóra subìt la Tamira Paszek 6-2 7-5 par pò pèrdar da la giapunéśa Kimiko Date-Krumm (42 an) cun al puntéǵ ad 4-6 5-7.

Culegamènt estéran