Lourdes Domínguez Lino
|
C'l artìcul chè 'l è scrit in
Miranduléś |
.jpg)
La Lourdes Domínguez Lino (Pontevedra, 31 ad Mars dal 1981) l'è na tenìsta spagnōla prufesiunìsta da 'l 1996 ch'l'è stada la nùmar quarànta dal mónd 'l 11 ad Setémbar dal 2006. In dal 2002 l'è stada farmàda par tri méś parchè l'iva tòlt dla cucaìna.
La galisiàna l'è élta 163 cm e al péśa 60 chilo. Al sò alenadōr 'l è Victor López. La dróa al bras dèstar e la tira 'l arvèrs cun na maṅ sōla. Al sò śōg 'l è qvél da fónd camp in dua lē la pésca ad far pôc śbali, tirànd di cólp liftâ ch'i strabàlsan dimóndi lung e élt. La s cata bèṅ in si camp ad tèra rósa.
A gh piàś anc śugàr a 'l balòṅ e scultàr dla mùśica.
In dla sò caréra l'à mis in bisàca quatórdas tìtui ITF e l'è rivàda par sinc vòlti in finàl in di turnèo WTA, vinsénd-an dū.
Caréra
La spagnōla l'à vins par dū vòlti al turnèo ad Bugutà, na prima vòlta in dal 2006 baténd in finàl la Flavia Pennetta par 7-6 6-4 (dòp avér-ag pardû par 6-7 4-6 'l an prima in d'l ùlt'm at) e pò anc in dal 2011 cóntar la francéśa Mathilde Johansson cun al puntéǵ ad 2-6 6-3 6-2. Al 30 ad Luj dal 2006 la gh'à abû invéci la pèś in dla finàl ad Bùdapest cun l'Anna Smashnova par 1-6 3-6.
La Lourdes la tórna a śugàr na finàl WTA in d'l Avrìl dal 2013 a Marrakesch cóntar la milanéśa Francesca Schiavone pardénd-ag sèg par 1-6 3-6.