María Teresa Torró Flor
|
C'l artìcul chè 'l è scrit in
Miranduléś |
.JPG)
La María Teresa Torró Flor (Villena, 2 ad Maǵ dal 1992) l'è na tenìsta spagnōla. In dla sò caréra l'è rivàda a èsar la nùmar sinquànta dal mónd al 28 'd Avrìl dal 2014, miténd-as in bisàca ùndas tìtui ITF e òṅ ad qvéi WTA.
L'è élta 178 cm, la péśa 62 chilo e la dróa al bras dèstar. Al sò arvèrs 'l è a dū maṅ ma 'l cólp ch'la śōga méj 'l è 'l drit.
Sò pàdar al fà 'l inśgnēr, sò màdar la mistra. A la Torró Flor a gh piàś al śōg dal balòṅ, guardàr di film e scultàr dla mùśica, specialmènt al canti dla Rihanna.
Caréra
La spagnōla la s pòrta a cà al sò prim tìtul ITF in dal Dicémbar dal 2008, un déś-mila śugâ in sla tèra batùda. In dal Luj dal 2010 la próa a qualificàr-as p'r al turnèo WTA ad Palèrum ma la céd a 'l secónd tùran a la Mirjana Lučić-Baroni. La gh la cava invéci 'l an dòp in Avrìl a Marbèja ma pò la pèrd subìt da la Cvetana Pironkova. A Barcelóna i gh dànan na carta salvàdga ma la Sara Errani la la mét in riga dand-ag un 6-1 6-0 dimóndi pēś.
Al salt la valensiàna la 'l fà in dal 2012 quànd l'è bòna ad purtàr-'s a cà sinc tìtui ITF ad fila in sla tèra batùda, i ùltim dū da sènt-mila dòlar a Bùcarest cóntar la Garbiñe Muguruza Blanco e a Olomuc cóntar l'Alexandra Cadanțu. Cun tut chi punt lè, lì lē la s davśìna a la puśisiòṅ sènt dal mónd e la gh'à di punt asè par śugàr dirèt soquànt turnèo International WTA ma la n s in 'mprufìta minga parchè la mùcia sù tri scòpli cun l'Urszula Radwańska a Taškent 4-6 5-7, cun la Laura Robson a Cantòn 2-6 1-3 bandòṅ e cun l'Ayumi Morita a Pechîṅ 3-6 0-6. Prima dla fiṅ d'l an la gh la cava a mét'r-as in bisàca anc 'n àtar ITF da vintsìnc-mila dòlar in Spaggna baténd par 6-1 6-4 l'Estrella Cabeza Candela e finénd acsè 'l an a 'l 99śum pòst.
A 'l inìsi dal 2013 la Torró Flor la pèrd subìt par dū vòlti cun la Bojana Jovanovski a Hobart e a Melbourne. A Cali e a Bugutà invéci l'è la Paula Ormaechea a mandàr-la a cà ma almànc la secónda vòlta l'è stada bòna ad rivàr in di quàrt. In Maǵ, pasànd p'r al qualificasiòṅ, la fà fóra la Francesca Schiavone a Madrid par 6-2 7-5 prima ad cédar a la Marion Bartoli par 4-6 6-2 4-6. Anc a Straśbûrg, a 'l Roland Garros, a Nurimbèrga, a Wimbledon e a Bùdapest la riva a 'l secónd tùran pardénd via via da la Flavia Pennetta, da la Sabine Lisicki, da la Lucie Šafářová, da la Dominika Cibulková e da la Timea Babos. Dòp n'Istâ da daśmindgàr in dal cimènt americàṅ, in Setémbar la tōś part a 'l turnèo ad Taškent in dua la riva par la prima vòlta in semifinàl (2-6 2-6 da la Bojana Jovanovski). A Tokyo la bat la Klára Koukalová par 7-6 1-6 6-3 prima ad patìr na patnàda ad c'l àtar mónd da l'Angelique Kerber ch'la la bat par 6-0 6-1 ma la s pōl cunsulàr listés parchè la śgranfgna a la fiṅ d'l an la puśisiòṅ ssanta-sinc dal mónd.
La spagnōla la taca mâł al 2014 pardénd a 'l prim tùran a Rio de Janeiro e a Florianòpulis da la Nastassja Burnett e da la Teliana Pereira. A Indian Wells la s tira sù lasànd al briśi a la Galina Voskoboeva, ch'la gh'à da bandunàr in sal puntéǵ ad 6-1 1-0 par la valensiàna, e pò baténd anc l'Angelique Kerber, nùmar siē dal mónd, par 2-6 7-6 6-4. A 'l tèrs tùran però la gh'à da pigàr-as par 1-6 3-6 a la rusa Alisa Klejbanova. La Torró Flor la vins finalmènt al sò prim tìtul WTA in Avrìl a Marrakech baténd in d'l órdan la Bojana Jovanovski par 6-2 6-2, la Lara Arruabarrena Vecino par 6-1 6-2, la Polona Hercog par 7-6 7-6, la Garbiñe Muguruza Blanco par 6-0 6-3 (lasànd a cl'atra sōl i prim tri śōg dal secónd sét) e la Romina Oprandi par 6-3 3-6 6-3. Cun cal sucès chè, la María Teresa la riva par la prima vòlta a 'l sinquantéśum pòst dal ranking dal fémni.