Il caso Paradine
|
C'l artìcul chè 'l è scrit in
Miranduléś |
 The Paradine Case
| ||
| Il caso Paradine | ||
 L'Alida Valli in na figùra dal film | ||
| Al caś Paradine 1947 | ||
|---|---|---|
| Regìa: Alfred Hitchcock | ||
| Scritōr: Robert Hichens • David O. Selznick | ||
| Atōr: Alida Valli • Gregory Peck • Ann Todd Charles Coburn • Charles Laughton • Joan Tetzel Ethel Barrymore • Louis Jourdan • Leo G. Carroll Isobel Elsom • Patrick Aherne • John Goldsworthy | ||
| Müsica: Franz Waxman | ||
| Léngua: Ingléś | ||
| Dürä dal film: 113 minüt | ||
| Nasiōṅ: Stat Unî | ||
Il caso Paradine (Al caś Paradine) 'l è 'n film dramàtic dal 1947 'd Alfred Hitchcock trat da 'l lìb'r umònim ad Robert Smythe Hichens e prudót par David O. Selznick. Par cla pelìcula chè l'Ethel Barrymore l'è stada candidàda a i Prèmi Òscar.
Al film, girâ in biànc e négar, 'l è custâ da piò ad quàtar migliòṅ ad dòlar, ma al 'n à pò purtâ a cà sōl dū in tut al mónd.
Sunt
L’Anna Maddalena Paradine (Alida Valli), na dóna ad clas, bèla e pîna ad mistēr, l'è suspetàda 'd avér masâ sò marè, un vèć culunèl lundinéś òrub e cun di bèsi, śuntànd-ag dal vlèṅ in dal vèṅ.
Al sò avucàt Anthony Keane (Gregory Peck), un prìnsip dal fōr, al fà incòsa par tiràr-la fóra di guàj anc quànd a pâr ch'al giudìsi a sia bèla scrit. Chi lò, spuśâ da ùnd'ś an cun la Gay (Ann Todd), al taca però a inamuràr-as piàn piâṅ dla sò cliénta e al pénsa anc ad mulàr al caś par salvàr al matrimòni ma sò mujér la gh diś 'd andàr avànti parchè la sà che s'la védva Paradine la finìs impicàda dabòṅ a sarés un brut cōlp listés par la cunsìnsia ad sò marè ch'al n al prév mai daśmindgàr al fat.
Keane al taca alóra a tōr-'s-la cun al camarēr e stalēr dal culunèl, André Latour (Louis Jourdan), sprand acsè 'd avér catâ al culpévul giùst par salvàr la sò amàda. 'L avucàt al decìd 'd andàr-'l a catàr in dla vila di Paradine e chi lò al dipìnś la Maddalena cuma na parsòna catìva e marsa, 'd un mars ch'a s taca adòs anc sōl sfriśànd-la. Quànd pò André al fà al sò ingrès in tribunàl, par dir la sua, la sgnóra Paradine la 'l sènt rivàr da la pusa 'd ciûś e 'd aldàm ch'al s pòrta adrē, 'n udōr che lē la cgnós bèṅ esénd lò al sò amànt.
Par l’Anna, ch'la gh'à cónt'r al giùdas Lord Thomas Horfield (Charles Laughton), un budlòṅ sénsa cōr, unt, biśùnt e spurcaciòṅ, i quèi i s métan mâl quànd Latour al s masa in parśòṅ.