Topaz

Da Wikipedia.

C'l artìcul chè 'l è scrit in Miranduléś Emiliàn

Topaz

John Vernon e la Karin Dor in na figùra dal film
id.
1969
Regìa: Alfred Hitchcock
Scritōr: Leon Uris • Samuel A. Taylor
Atōr: Frederick StaffordKarin DorDany Robin
John VernonClaude JadeMichel Piccoli
Philippe NoiretMichel SuborRoscoe Lee Browne
Tina HedstromJohn ForsytheSonja Kolthoff
Müsica: Maurice Jarre
Léngua: IngléśFrancéśSpagnōlRus
Dürä dal film: 125 minüt
Nasiōṅ: Stat Unî


«
Al scàndal dal sècul in dal mónd dal spiunàǵ.»
(Tagline dal film)


Topaz (id.) 'l è 'n film ad spiunàǵ americàṅ dal 1969 'd Alfred Hitchcock trat da 'n rumànś ad Leon Uris.

Sunt

Durànt la guèra fréda, al diretōr in secónda dal KGB Boris Kusenov (Per-Axel Arosenius), la mujér (Sonja Kolthoff) e sò fiōla Tamara (Tina Hedstrom) i pàs'n i cansèi dl'ambasàda rusa a Cupenàghen in dua i s càt'n in vacànsa. I èṅ spiâ da di agìnt in burghéś ch'i gh tìn'n adrē. La famìja la gh la cava a lugàr-'s in mèś a di turìsta ch'i s càt'n in un negòsi ch'al vénd dal siràmichi danéśi. La śóvna la śbraga ad prupòśit na statṿa par catàr al tèmp ad ciamàr a 'l telèfun 'l ambasadōr americàṅ e par mét'r-as in cuntàt c'n al funsiunàri dla CIA Michael Nordstrom (John Forsythe) ch'al gh'à da far-i scapàr a 'l èstar.

Soquànt tèmp dòp i Kusenov i càtan cà in di dintór'n ad Washington. A l'ambasàda francéśa René D'Arcy (George Skaff) al fà ciamàr òṅ di sò cunsiliér da soquànt an in di Stat Unî, André Devereaux (Frederick Stafford), parchè al s daga da far par pascàr al nascundìli di Kusenov. Devereaux al taca a 'vér-ag di suspèt e al gh'à paùra che qualchidòṅ al pòsa pasàr dal nutìsi a i rus. Al ciàma acsè al sò amìg Nordstrom ch'al gh dà ragiòṅ cuntànd-ag ch'a gh'è n'urganiśasiòṅ ciamàda “Topaz” ch'la gh lavóra adrē. Sò mujér Nicole (Dany Robin) la s aùgura ch'al viàś ch'i gh'àṅ da far a New York al pòsa distràr-al da ch'l afàr là, dimóndi delicâ e periculóś. Par l'ucaśiòṅ i rìvan da Parì anc sò fiōla Michèle (Claude Jade) e sò marè François Picard (Michel Subor), un giurnalìsta inviâ là par cuntàr qvél ch'a sucéd in dal Nasiòṅ Unìdi.

Rivâ a New York, Nordstrom al diś a Devereaux che Kusenov al gh'à cuntâ ch'a gh'è 'n pat cumersiàl e militàr fra Cuba e l'Ugnòṅ Suviètica ma ch'al n sà gnint da piò, sōl che Rico Parra (John Vernon), mémbar dal guèran cubàṅ, al s cata in sità cun sèg na còpia dal pat. Dand di bèsi a 'l sò segretàri Luis Uribe (Donald Randolph), òṅ ch'l à pardû sò fiōl in dla Baja di Pòrc par cólpa di americàṅ, i Stat Unî i prévan śgranfgnàr i ducumènt segrét ma a gh sarés da catàr un furastēr ch'al dascurìs sèg. André 'l è 'l óm giùst. Chi lò al dà mandâ a òṅ di suo, Philippe Dubois (Roscoe Lee Browne), ad purtàr-ag dal foto di ducumènt e lò al gh la cava anc se Uribe 'l armàgn in trapla.

Par saràr al sérć, Devereaux al gh'à 'd andàr diretamènt a L'Avana par catàr sù dal próvi ch'in dl'ìśula a gh'è di mìsii nucleàr rus. Là al pōl cuntàr su 'l apòǵ dla Juanita de Cordoba (Karin Dor), na védva 'd 'n eróe dla rivulusiòṅ a i tèmp 'd Ernesto Che Guevara ch'la viṿ sóta la prutesiòṅ ad Parra ch'l è anc inamurâ 'd lē. Ma la Juanita l'è da cl'atra banda, esénd a cap dn'asuciasiòṅ ch'l'è cóntar Fidel Castro.

Culegamènt estéran