Il delitto perfetto
|
C'l artìcul chè 'l è scrit in
Miranduléś |
 Dial M for Murder
| ||
| Il delitto perfetto | ||
 Dawson e la Grace Kelly in na figùra dal film | ||
| Al delìt parfèt 1954 | ||
|---|---|---|
| Regìa: Alfred Hitchcock | ||
| Scritōr: Frederick Knott | ||
| Atōr: Ray Milland • Grace Kelly • John Williams Robert Cummings • Anthony Dawson • Leo Britt Patrick Allen • George Leigh • George Alderson Robin Hughes • Guy Doleman • Bess Flowers | ||
| Müsica: Dimitri Tiomkin | ||
| Léngua: Ingléś | ||
| Dürä dal film: 105 minüt | ||
| Nasiōṅ: Stat Unî | ||
Il delitto perfetto (Al delìt parfèt) 'l è 'n film thriller americàṅ dal 1954 'd Alfred Hitchcock trat da 'n lavōr teatràl ad Frederick Knott. Qvést chè 'l è al prim lavōr dal regìsta ingléś in dua la recìta la Grace Kelly, sarnìda parchè, a sò dita, la pâr una fréda e dastacàda ma invéci la gh'à al fōg dèntar.
Hitchcock 'l à girâ la séna d'l umisìdi cun di efèt in tri dimensiòṅ par réndar méj al tintatìṿ dla Kelly ad ciapàr al fòrbśi in prim piàṅ par difénd'r-as.
In dal 1998 'l è stâ fat 'n arfacimènt ad cal film chè intitulâ Delitto perfetto cun Michael Douglas, la Gwyneth Paltrow e Viggo Mortensen.
Sunt
Tony Wendice (Ray Milland) 'l è 'n ex campiòṅ ad tènis che adès al vénd di artìcui spurtìṿ a Lóndra. Un dè al vèṅ a savér che sò mujér Margot (Grace Kelly) la gh fà i còran cun un scritōr americàṅ ad rumànś śal, Mark Halliday (Robert Cummings). Par vindicàr-as e par ciapàr i bèsi dla sò spóśa, Wendice al decìd ad far-la cupàr da 'n àtar, p'r a n finìr-ag minga in mèś. Al sarnìs un sò ex cumpàgn 'd università, Swann Lesgate (Anthony Dawson), culpévul ad furt e che adès al s fà mantgnìr par dal dóni vèci.
C'n al ricàt e cun la prumésa ad dar-ag pò di bèsi, Wendice al custrìnś Swann a masàr la mujér par lò, pinsànd a 'n piàṅ a sò dita parfèt. Par far-as 'n àlibi, Tony al và na sira a 'n ricevimènt insém a Mark, faghénd catàr a 'l sicàri la ciàṿ d'l us sóta a 'l tapē par spasàr-'s i pē par parmét'r-ag 'd insfilsàr-'s a cà méntar la Margot la pònsa. A ùnd'ś óri dla sira 'l à in prugràma ad ciamàr par telèfun sò mujér par far-la alvàr e par far in manéra che Swann, lugâ da drē da 'l téndi, al pòsa strusàr-la quànd lē l'è prilàda da cl'atra banda.
Cla nòt lè però al ròbi i n vànan briśa cuma lò 'l iva traplâ. Na Margot in sotvésta, prima 'd murìr, la gh la cava a śgranfgnàr un para 'd fòrbśi e a piantàr-i in dla schina ad c'l àtar, cupànd-al. Wallace al scólta incòsa a 'l telèfun e al tórna a cà subìt arbaltànd però listés la situasiòṅ a sò vantàś. Difàti al gh la cava a far incriminàr la Margot p'r umisìdi vuluntàri.