Alfred Hitchcock

Da Wikipedia.
C'l artìcul chè 'l è scrit in Miranduléś Emiliàn


Alfred Joseph Hitchcock (Leytonstone, 13 'd Agóst dal 1899 - Los Angeles, 29 'd Avrìl dal 1980) 'l è stâ un regìsta e prudutór dal cinéma britànic. 'L è cgnusû, par via di sò capulavór thriller, cuma al «mìstar dal śgriśōr».

Biugrafìa

Alfred Joseph Hitchcock

Gl'inìsi

Tèrs fiól ad William, Alfred da pìcul 'l éra un putèṅ pauróś e sulitàri, cun pòc amig: chi elemènt chè, insém a 'l sò èsar spavintâ par la pulisìa (maduràda dòp ch'l éra stâ mis par punisiòṅ in na sèla par na nòt) i turnaràṅ pò in séguit in dimóndi di sò film.

Gnû sù cun na rìgida educasiòṅ religióśa, Alfred al cata al sò prim lavór in dal 1915 quand al taca a far di diśégn par la Henley telegraph and cable Company, ma la sò prima ucupasiòṅ in dal mónd dal cìnema l'è dal 1920 quand al diśégna i tìtui ad tèsta par di film.

In dal 1923 Hitchcock al vèṅ tòlt da la Gainsborough Pictures in du al fà da tut, da la senegiadùra, a i diśégn, da i tìtui a 'l senugrafìi in fiṅ al muntàǵ e a 'l apòǵ a la regìa.

Al perìud ingléś

Finalmènt, in dal 1925 a gh vèṅ fat far al sò prim film da regìsta, The Pleasure Garden in part girâ in sal Lag ad Côm. 'L an dòp Hitchcock al spóśa Alma Reville. Sò mujér la lavurarà sèg calaburànd a 'l senegiadùri di soquànd di sò film ch'i gh'àṅ da gnir in séguit. La famìja la sa ślarga: in dal 1928 a nas la Patricia e Alfred al gira al sò secónd film, The Mountain Eagleche però 'l è andâ pardû.

Al sò prim film ad sucès 'l è The Lodger in dua al trata par la prima vòlta òṅ di sò téma ricurènt: quél 'd 'n inusènt ch'al ciàpa ingiustamènt la cólpa 'd un crìmin. In dal 1929 'l è la vòlta ad Blackmail, al sò prim film cun al sunôr. In di an ch'i vènan (ch'i èṅ pò par la crìtica i an dal sò perìud ingléś) al dirìǵ, fra i àtar, L'uomo che sapeva troppo (ambintâ in Śvisra), Il club dei 39, Giovane e innocente e La signora scompare.

Filmugrafìa

Culegamènt estéran