Sette note in nero
|
C'l artìcul chè 'l è scrit in
Miranduléś |
 Sette note in nero
| ||
 La Jennifer O'Neill in na figùra dal film | ||
| Sèt nòti in négar 1977 | ||
|---|---|---|
| Regìa: Lucio Fulci | ||
| Scritōr: Lucio Fulci • Roberto Gianviti Dardano Sacchetti • Vieri Razzini | ||
| Atōr: Jennifer O'Neill • Gianni Garko • Marc Porel Gabriele Ferzetti • Jenny Tamburi • Luigi Diberti Evelyn Stewart • Loredana Savelli • Fabrizio Jovine | ||
| Müsica: Franco Bixio • Fabio Frizzi • Vince Tempera | ||
| Léngua: Itagliàṅ | ||
| Dürä dal film: 95 minüt | ||
| Nasiōṅ: Itàglia | ||
Sette note in nero (Sèt nòti in négar) 'l è 'n film śal dal 1977 ad Lucio Fulci girâ a Róma, in Tuscàna e a Dover in dal Régn Unî.
A 'l èstar 'l à ciapâ i tìtui “Murder to the Tune of the Seven Black Notes” in di Stat Unî, “Sieben schwarze Noten” in Germâgna, “Siete notas en negro” in Spaggna e “L'emmurée vivante” in Frància.
Sunt
La Virginia (Jennifer O’Neill) l'è na dóna burgéśa e cun di bèsi ch'la viṿ insém a sò marè Francesco Ducci (Gianni Garko) in un paiśèṅ dla Tuscàna. Fiṅ da pìcula (Fausta Avelli) la gh'à 'l putēr ad véd'r e 'd sintìr di quèi cuma quànd la s è figuràda in dla mènt la mòrt ad sò màdar (Elizabeth Turner) in dal méntar ch'la s butàva śò da na muntàgna par cupàr-as.
Durànt un viàś in màchina la gh'à na viśiòṅ dla mòrt dna dóna muràda viva in cà insém a di atri figùri cuma 'n óm sòp ch'al gira traśànd un pē, un nùmar dla rivìsta “Il nuovo settimanale” c'n un servìsi in cupertìna da 'l tìtul “èsar dal raśdóri cun cuntintésa”, na cica in un pòrtaséndra e un grugn dna vècia impinî ad sangṿ. In séguit, méntar la s cata in na vila ad sò marè, la sènt che da 'd là da 'l mur a gh'è 'n cadàvar e alóra la ciàpa un pigòṅ par tiràr-al śò. La pulisìa la gh cata dènt'r un schèltar e pò la pòrta in parśòṅ Francesco dand-ag la cólpa d'l umisìdi. La dóna però la n créd minga che lò a sia culpévul e cun 'l ajùt ad sò cugnàda, la Gloria (Evelyn Stewart), e 'd un parapsicòlug, Luca Fattori (Marc Porel), la próa a 'ndàr-'g a fónd.
I sò suspèt i càscan su 'n óm ch'a s vdiva in dla sò viśiòṅ, Emilio Rospini (Gabriele Ferzetti). A prév ès'r ùtil savēr quànd l'è vgnuda fóra la rivìsta ma ninsòṅ a la cgnós.