I guerrieri dell'anno 2072

Da Wikipedia.

C'l artìcul chè 'l è scrit in Miranduléś Emiliàn

I guerrieri dell'anno 2072

Jared Martin in na figùra dal film
I cumbatènt d'l an 2072
1984
Regìa: Lucio Fulci
Scritōr: Elisa Livia Briganti • Dardano Sacchetti
Cesare Frugoni • Lucio Fulci
Atōr: Jared MartinRenato RossiniHoward Ross
Fred WilliamsonEleonora BrigliadoriAl Cliver
Claudio CassinelliCosimo CinieriPenny Brown
Müsica: Riz Ortolani
Léngua: Itagliàṅ
Dürä dal film: 94 minüt
Nasiōṅ: Itàglia


«
Ninsòṅ a scamparà a cal spetàcul chè.»
(Tagline dal film)


I guerrieri dell'anno 2072 (I cumbatènt d'l an 2072) 'l è 'n film fantàstic dal 1984 ad Lucio Fulci ambintâ in dal futûr.

Sunt

In d'l an 2072 i canài televiśìṿ, par far ascōlt, i métan sù sōl di prugràma viulènt cuma la rēda Seven Seas ch'la traśmét di cumbatimènt fra mutuciclìsta c'n al campiòṅ ch'l è Drake (Jared Martin). Sam (Gianni Di Benedetto), al cap dal canàł cuncurènt Wbasic, al decìd acsè ad mandàr in ónda anca lò un prugràma cumpàgn cun di cundanâ a mòrt ch'i gh'àṅ da cumbàtar par meritàr-as la gràsia. A sarnìr i cuncurènt 'l è al computer Junior ch'al tîṅ in cunsiderasiòṅ qvéi ch'i èṅ bòṅ ad far crésar i spetadōr e dònca al pésca sù anc Drake. In cal méntar sò mujér, la Susan (Valeria Cavalli), la vèṅ masàda e Drake al finìs in parśòṅ p'r ès'r-as fat giustìsia da par lò, a dita dla pulisìa, e pò in un pòst in dua al gh'à da cumbàtar cun di àtar gladiadōr e lè al gh cata Monk (Donald O'Brien), òṅ ch'al cgnusìva bèla da prima e ch'l è armàś ufēś in dla ghigna tant ch'adès al gh'à 'n òć biònic. Chi lò al fà al mecànic par qvéi dla Wbasic.

I gladiadōr i vènan instigâ a cumbàtar e custrét a masàr dal figùri ch'i gh s pàran davànti, frut dl'imaginasiòṅ, ma Drake al s tira indrē. La siensiàda Sarah Newman (Eleonora Brigliadori) la gh miśùra i pinsēr rabî ch'al gh'à in dla suca druànd di raǵ làśèr. Quànd lò al tórna in dla sò cambra al gh cata chi àtar gladiadōr ch'i tàc'n a dar-'g adòs e a piciàr-al. Al cap di preturiàṅ, Traven (Renato Rossini), al gh mét al bèc e al decìd ad masàr-an òṅ ma Drake 'l al férma dgénd che piutòst al s cuparév lò, mandànd acsè a gl'urtìghi al spetàcul.

Culegamènt estéran