Le porte del silenzio

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Le porte del silenzio
Porte del silenzio.png
John Savage e la Sandi Schultz in na figùra dal film
Al pòrti dal silénsi
1991
Regia: Lucio Fulci
Scritùr: Lucio Fulci
Atùr: John SavageSandi SchultzJennifer Loeb
Richard CastlemanFred LewisMary Coulson
Elizabeth ChugdenBob ShrevesFred Lewis
Müsica: Franco Piana
Lengua: Ingléś
Dürä dal film: 88 minüt
Nasiòṅ: Itàglia


«
Quànd at pas'rà 'l pòrti dal gnint, ninsòṅ a t sarà davśèṅ: sōl l'òra dla tò mòrt.»
(IV Lìbar dl'Apucalìs.)


Le porte del silenzio (Al pòrti dal silénsi) 'l è 'n film dal mistēr dal 1991 ad Lucio Fulci, girâ druànd al nóm 'd Henry Simon Kittay, ch'al 'l à anc scrit tgnénd adrē a 'n sò racònt da 'l tìtul “Porte dal nulla”. 'L è stâ girâ in Luiśiàna, sóta la prudusiòṅ dla Filmirage ad Joe D'Amato, e 'l è anc 'l ùltim fat da Fulci prima ch'al murìs.

A 'l èstar 'l è cgnusû c'n al tìtul ad “Door to Silence”.

Sunt

Melvin Devereux (John Savage) 'l è 'n óm 'd afâr ch'al gh'à 'd andàr cun la sò màchina a Abbeville (Luiśiàna). Dòp ès'r armàś a pē lung la via, al véd na bèla dóna (Sandi Schultz) ch'la s davśìna e ch'la gh śibìs ad dar-'g un pasàǵ p'r andàr a ciamàr un mecànic. 'L óm al l'à vduda anc a 'l funeràł ad sò pàdar soquànt tèmp prima ma al n sà minga 'l sò nóm anc se lē la gh'iva dit ch'i s cgnusìvan bèla. In tut al manéri 'l è ciàr ch'la gh tîṅ a drē.

Mént'r i èṅ drē a spetàr ch'la màchina la végna giustàda, la sgnōra la decìd 'd andàr in un mutèl sèg parchè l'è dimóndi interesàda a lò ma pò la scriv c'n al sò rusét in sal spèć, méntar Melvin 'l éra in bagn a preparàr-as, ch'a n è minga 'l mumènt giùst. Quànd lò al tórn' in cambra al n la véd piò.

Melvin al ciàpa la màchina e al s mét in viàś. Lung al parcōrs al cata 'n car murtuàri davànti a lò ch'al n gh lasa minga strada anc se lò al gh sòna adrē. Gnint da far: anc quànd al próa a pasàr-al, al becamòrt (Richard Castleman) al gh s para sèmpar davànti. Al próa acsè a cambiàr strada ma al gh finìs listés incóra da drē. Guardànd-ag méj, Melvin al véd ch'in di fiōr scrit insìma a gh'è 'l nóm Sylvia, qvél ad sò mujér (Elizabeth Chugden). A cal punt chè al gh vōl andàr a fónd e quànd al cata 'l car da mòrt fér'm in un bar, al 'n imprufìta par far-'s un bicér e par dascórar cun 'l autìsta par savēr al nóm dal cadàvar: “Melvin”. 'L óm al próa a ciamàr a cà ma a n rispónd ninsòṅ, pò al fà a mènt ch'al sò arlói al ségna sèmpar sét óri e mèś, cumpàgn a qvél ch'al gh'à in màchina.

Melvin al fà na scapàda a 'l cambri murtuàri e lè al véd la sgnōra e 'l becamòrt. Al gh dmanda s'al cadàvar ad Melvin Devereux al s cata lè e lē la gh diś ad sè. 'L óm al và a védar e al riva in na cambra pîna 'd casi da mòrt, tuti cun dla gint ch'la pòrta 'l sò nóm. In una, la sōla saràda, a gh'è anc al sò còrp. Par furtùna 'l è 'n arbgàt. Melvin al s déśda in màchina quànd na śōvna ch'la vōl un pasàǵ p'r andàr a Memphis, la Margie (Jennifer Loeb), la 'l ciàma. Par muntàr sù, cla purcùsa lè la taca a cavàr-as śò dgénd ch'a gh'è cald dimóndi, pò par sinquànta dòlar la gh la dà ma 'l mâł dla lumàga 'l è lè ch'al riva.

In sal batèl par pasàr al Missisìpi al véd incóra al car da mòrt. Al vèra la casa par védar cuś a gh'è dèntar: un cadàvar carbuniśâ a nóm “Melvin Devereux”. Esénd parsuàś che cal còrp là al sia 'l suo, Melvin al và a dmandàr ajùt a na sò sîna ch'la stà da cal bandi, la Martha (Mary Coulson), par sintìr se par caś sò màdar la gh'àppia cuntâ quèl in cal méntar. Chi lē la gh diś ch'la n la sènt da di an, piutòst la vōl a tut i cóst lèś'r-ag la maṅ, un quèl che lē la fà par mistēr. Tgnénd a drē a qvél ch'la gh cònta na riga, lò al sarév bèla mòrt da di óri.

Culegamènt estéran