Paura nella città dei morti viventi

Da Wikipedia.

C'l artìcul chè 'l è scrit in Miranduléś Emiliàn

Paura nella città dei morti viventi

La Doria la làgarma sànguv in na figùra dal film
Paùra in dla sità di mòrt vivént
1980
Regìa: Lucio Fulci
Scritōr: Lucio Fulci • Dardano Sacchetti
Atōr: Katherine MacCollChristopher George
Janet AgrenAntonella InterlenghiDaniela Doria
Giovanni Lombardo RadiceVenantino Venantini
Luca PaisnerAdelaide AsteCarlo De Mejo
Müsica: Fabio Frizzi
Léngua: ItagliàṅIngléś
Dürä dal film: 89 minüt
Nasiōṅ: Stat Unî


«
Da 'l sfési dla tèra i èṅ vgnû par catàr sù i viṿ.»
(Tagline dal film)


Paura nella città dei morti viventi (Paùra in dla sità di mòrt vivént) 'l è 'n film ad scarésa dal 1980 ad Lucio Fulci vinsidōr dal Fèstival dal fantàstic 'd Avoriaz dal 1980. Cunsiderâ al prim tìtul dla "Tilugìa dla mòrt", tri film girâ par Fulci fra 'l 1980 e 'l 1981 cun prutagunìsta la Catriona MacColl (i àtar i èṅ ...E tu vivrai nel terrore! L'aldilà e Quella villa accanto al cimitero), al film 'l è vgnû fóra in Itâglia 'l 11 'd Agóst dal 1980 faghénd sù 985.238.798 franc in tut.

La pelìcula la séggna al pasàǵ definitìṿ ad Fulci in dal mónd dla scarésa, cun i sò film ch'i tac'n a impinìr-'s ad séni splatter e viulénti, cuma qvéla in dua la Daniela Doria, lagarmànd sangṿ e cun 'l urt dal gòmit, la taca a butàr fóra da la bóca tut al sò budèli. In Germâgna i ìvan mis a 'l band cal film chè, gnanc na prima versiòṅ cinsuràda l'andàva bèṅ.

Sunt

In dla sità americàna ad Dunwich, tiràda sù in dal sit dla vècia Salem, la sità dal strìi, al prevóstar William Thomas (Fabrizio Jovine) al s tōś la vita impicànd-'s atàc a 'n àlbar 'd un simitèri. Pròpria in cal méntar, la medium Mary Woodhouse (Katherine MacColl) la véd a New York la sò mòrt durànt na sintàda par dascórar cun i spìrit e la pèrd i sèns. Tut chi àtar sintâ sèg lè 'd intóran i tōś'n at dla sò mòrt, anc la studiōśa dal da 'd là Theresa (Adelaide Aste) e al cumisàri ad pulisìa (Robert Sampson), rivâ lè da pôc, ch'al dà la cólpa a la dròga. Saplìda in dal campsànt, chi lē la s darséd pò in dla casa da mòrt. Par sò furtùna al giurnalìsta Peter Bell (Christopher George) al sènt i sò sîg e al la libra a cólp ad pigòṅ pròpria méntar lē la n éra più bòna ad tiràr fiâ.

Rivàda a cà dla Theresa, la Mary la gh cònt qvél ch'l'iva vdû prima dal mancamènt. La Theresa la gh diś ch'a s trata 'd un quèl cuntâ anc in dal lìbar 'd Enoch, scrit 4000 an prima. Al suicìdi dal prēt al sarés 'l inìsi dl'invaśiòṅ in sla tèra da part di spìrit di mòrt, in sal punt ad sucédar parchè a sém davśèn a la nòt ad Tutisànt.

In cal méntar a Dunwich, Bob (Giovanni Lombardo Radice), un ragàs c'a pâr ch'al gh'àppia na quàlc rudèla fóra 'd pòst, girànd p'r al stradi dal paéś, al finìs dèntar a na cà bandunàda in dua al cata na bàmbula gunfiàbila ma anc qvél ch'a pâr un putèṅ mars pódag, cun tut i bēg adòs. Da n'atra banda, Tom (Michele Soavi) e la Rose (Daniela Doria) i èṅ drē a far di quèi spurcaciòṅ in màchina quànd la śōvna la véd al prēt impicâ e la taca a 'rgtàr al sò budèli. A 'l sò murōś invéci al religiōś al gh dastàca mità dal crani. Al cadàvar dl’Emily (Antonella Interlenghi) al vèṅ catâ in un pusòt impinî ad matèria. 'L è 'l inìsi dna nòt ad scarésa, cun la sità in maṅ a di mòrt turnâ da 'l infèran pascànd dal sangṿ.

Culegamènt estéran