L'amico di famiglia

Da Wikipedia.
Jump to navigation Jump to search
C'l artìcul chè 'l è scrit in Miranduléś Emiliàn
Video-x-generic.svg Les Noces Rouges
L'amico di famiglia
Amico di famiglia.png
Michel Piccoli e la Audran in na figùra dal film
’L amìg ad famìja
1973
Regia: Claude Chabrol
Scritùr: Claude Chabrol
Atùr: Michel PiccoliStéphane AudranPippo Merisi
Claude PiépluClotilde JoanoEliana De Santis
Daniel LecourtisFrançois RobertHenri Berger
Müsica: Pierre Jansen
Lengua: Francéś
Dürä dal film: 95 minüt
Nasiòṅ: FrànciaItàglia


«
Na questiòṅ ad lusùria e mòrt.»
(Tagline dal film)


L'amico di famiglia (’L amìg ad famìja) 'l è 'n film dramàtic francéś e itagliàṅ dal 1973 ad Claude Chabrol ch'al 'l à girâ a Valençay. Al tōś ispirasiòṅ da di fat sucès dabòṅ in dal Favràr dal 1970, qvéi cgnusu cuma gl'“amànt ad Bourganeuf”.

Cal lavōr chè l'à purtâ a cà al “Prèmi Fipresci” a 'l Fèstival ad Berlîṅ.

Sunt

La Lucienne (Stéphane Audran) la gh'à abû na fiōla da śōvna a darsèt an, l’Hélène Chevalier (Eliana De Santis), ma pò la s è sitemàda spuśànd 'n óm pulìtig dimóndi impurtànt, sìndic dna sitadìna dla Lòira e anc senadōr, Paul Delamare (Claude Piéplu). Fra i dū al ròbi i n vànan minga tant bèṅ anc se da fóra ninsòṅ a gh fà a mènt. Lò al pénsa sōl a la sò caréra e a muciàr sù di bèsi ma al n la gusa mai parchè al gh'à 'l mâł dla lumàga, lē la s cunsóla fra i bras 'd 'n óm pulìtig ad sinìstra, Pierre Maury (Michel Piccoli). I dū i ciùlan dapartùt e ad cuntìnuv, in un muśèo, in di bòsc, a cà d'l óm ad nòt méntar Paul 'l è via.

Quànd a gh'è da vutàr incóra, al partî al mét insém i dū óm par vìnsar méj e Pierre al dvènta vice-sìndic. Anc chi lò 'l è bèla spuśâ cun na dóna malàda ch'l'à pardû la vója 'd vìvar e ch'la pasa tut al sò tèmp a lèt o in cà, la Clotilde (Clotilde Joano). Un dè la dóna la vèṅ catàda mòrta e tut in paéś i crédan ch'la s sia tòlta la vita ma invéci l'è stâ sò marè a cupàr-la.

Na sira Paul al ciàma a séna Pierre parchè al gh vōl śibìr un piàṅ par na speculasiòṅ edilìsia su 'n sit ch'al gh'à da cumpràr par far-ag sù dimóndi bèsi. Da Parì i èṅ tut 'd acòrd c'n al prugèt ad tiràr sù na fàbrica 'd plàstica in dal sò paéś, a gh vōl sōl òṅ ch'al faga la prupòsta in cunsìli e Delamare al dmanda a Maury ch'al la faga lò. Finìda la séna l’Hélène la vōl savēr da sò màdar s'la và a lèt cun Pierre parchè la gh'à di suspèt ma lē la gh diś 'd a n pinsàr-al gnanc. Quànd però Paul al i bèca a far-'g i còran, al custrìnś Pierre a star a 'l sò piàṅ quànd lò invéci al n vliva briśa p'r a n fargàr mia i sò sitadèṅ cun la fàbrica.

La Lucienne la s śibìs pò 'd andàr sèg a Parì par dascórar c'n i pulìtig ch'i còntan dabòṅ e mét'r-as 'd acòrd p'r al prugèt definitìṿ. La dóna la vōl guidàr lē parchè lung la via la s férma par far in manéra che Pierre al pòsa masàr sò marè a stangàdi. I dū amànt i daṅ pò fōg a la màchina par far finta ch'a sia sucès 'n incidènt. Al prefèt (Daniel Lecourtis) al fà in manéra ch'al caś al vaga via lis parchè al n vōl mia di scàndai su 'l partî par via dla speculasiòṅ. Ma quànd l’Hélène la manda na létra in dua la diś che sò màdar l'è l'amànta dal vice-sìndig, al ròbi i càmbian e anc dimóndi parchè adès l'è na questiòṅ ad còran. La pulisìa la và a cà dla Lucienne e pò la mét al manéti anc a Pierre.

Culegamènt estéran