Ennio Morricone

Da Wikipedia.
C'l artìcul chè 'l è scrit in Miranduléś Emiliàn
Morricone tòlt śò a Cannes in dal 2012


Ennio Morricone (Róma, 10 ad Nuvémbar dal 1928) 'l è 'n cumpuśidōr itagliàṅ, famóś specialmènt p'r avér scrit da piò ad sincsènt culóni sunòri ad film. 'L à vins dū Prèmi Òscar (in dal 2007 a la caréra e in dal 2016 p'r al film The Hateful Eight ad Quentin Tarantino), tri Grammy Awards, tri Golden Globes, sinc prèmi BAFTA tra 'l 1979 e 'l 1992, déś Dàvid ad Dunatèl, ùndas Nàstar 'd Argìnt, dū European Film Awards, un Lèòṅ 'd Òr a la caréra e 'n Polar Music Prize. Al gh'à anc na stéla, la nùmar 2574, in dla Hollywood Walk of Fame. Da śōvan 'l iva studiâ la trómba.

Biugrafìa

A 'l inìsi dla sò caréra al scriv dal culòni sunóri par Luciano Salce, la Lina Wertmüller e Bernardo Bertolucci, par pò pasàr a 'l western ad Sergio Leone (Per un pugno di dollari, Per qualche dollaro in più e Il buono, il brutto, il cattivo). In séguit al s davśìna a 'l mónd dla scarésa (Amanti d'oltretomba) e dal cìnema 'd aṿtōr (I pugni in tasca ad Marco Bellocchio, Uccellacci e uccellini e Teorema ad Pier Paolo Pasolini, in séguit anc Il Decameron, I racconti di Canterbury, Il fiore delle Mille e una notte e Salò o le 120 giornate di Sodoma). In dal 1967 al vîṅ sarnî par Marco Ferreri p'r al sò L'harem méntar dū an dòp al firma la culòna sunóra ad Metti, una sera a cena ad Giuseppe Patroni Griffi.

A 'l inìsi di an Stanta al lavóra par soquànt thriller cuma Indagine su un cittadino al di sopra di ogni sospetto 'd Elio Petri, L'uccello dalle piume di cristallo ad Dario Argento, Le foto proibite di una signora per bene ad Luciano Ercoli, Uccidete il vitello grasso e arrostitelo ad Salvatore Samperi, Una lucertola con la pelle di donna ad Lucio Fulci, La tarantola dal ventre nero ad Paolo Cavara, Il gatto a nove code ad Dario Argento, Giornata nera per l'ariete ad Luigi Bazzoni, La corta notte delle bambole di vetro 'd Aldo Lado, Quattro mosche di velluto grigio ad Dario Argento, Mio caro assassino ad Tonino Valerii, Cosa avete fatto a Solange? ad Massimo Dallamano, Chi l'ha vista morire? 'd Aldo Lado, Spasmo 'd Umberto Lenzi e Macchie solari 'd Armando Crispino.

In dal 1975 al scriv la mùśica par Labbra di lurido blu méntar 'l an dòp al filma qvéla ad Novecento ad Bernardo Bertolucci. In chi an lè al tórna a la scarésa cun L'anticristo, L'esorcista II - L'eretico, L'orca assassina e Holocaust 2000. In dal 1978 e in dal 1980 a catém al mìstar Morricone in Il vizietto e in Il vizietto II. In dal 1983 al lavóra cun Tinto Brass in La chiave pò 'l an dòp al tórna a lauràr insém a Sergio Leone in C'era una volta in America.

A la fin di an Utànta al scriv al culòni sunóri ad Frantic par Roman Polanski e 'd Nuovo Cinema Paradiso par Giuseppe Tornatore, pò in dal 1990 'l è la vòlta ad Pedro Almodóvar e dal sò Légami!. In dal 1996 al tórna a scrìvar par Dario Argento in La sindrome di Stendhal e al fà cumpàgn anc dū an dòp c'n al sò Il fantasma dell'Opera. In dal 2000 al scriv la mùśica 'd Malèna, una dal sò tanti culaburasiòṅ cun Giuseppe Tornatore.

Da 'l 1980 in avànti 'l à laurâ anc da spés par di regìsta americàṅ 'd prim piàṅ cuma John Carpenter (La cosa dal 1982), Brian De Palma (The Untouchables - Gli intoccabili, 1987, Vittime di guerra, 1989 e Mission to Mars, 2000), William Friedkin (Assassino senza colpa?, 1987), Barry Levinson (Bugsy, 1991), Mike Nichols (Wolf - La belva è fuori, 1994), Oliver Stone (U Turn - Inversione di marcia, 1997) e Quentin Tarantino (The Hateful Eight, 2015).

Culegamènt estéran