Malèna

Da Wikipedia.
C'l artìcul chè 'l è scrit in Miranduléś Emiliàn
Video-x-generic.svg Malèna
Malèna.png
La Monica Bellucci in na figùra dal film
id.
2000
Regia: Giuseppe Tornatore
Scritùr: Luciano Vincenzoni • Giuseppe Tornatore
Atùr: Monica BellucciGabriella Di Luzio
Giuseppe SulfaroPaola PaceLuciano Federico
Matilde PianaAngelo PellegrinoGilberto Idonea
Gaetano AronicaPietro NotarianniVitalba Andrea
Müsica: Ennio Morricone
Lengua: ItagliàṅSicigliàṅIngléś
Dürä dal film: 109 minüt
Nasiòṅ: Stat UnîItàglia


«
Un baghét ch'l è drē a dvintàr 'n óm e na dóna ch'l'è in sal punt ad cambiàr la sò vita par sèmpar.»
(Tagline dal film)


Malèna (id.) 'l è 'n film itagliàṅ e americàṅ dal 2000 ad Giuseppe Tornatore ch'l è stâ candidâ a dū Prèmi Òscar.

'L è custâ vint migliòṅ ad dòlar e 'l è stâ girâ in dal 1999 a Siracùśa, a Catàgna e a El Jadida (Maròc).

Sunt

Durànt la secónda guèra mundiàla Renato Amoroso (Giuseppe Sulfaro), un baghét ad tréd'ś an ch'al viṿ in Sicìglia insém a i sò genitōr e a na surèla più granda, al pèrd la tèsta, cuma del rèst anc i sò amìg, par la bèla Maddalena Scordia (Monica Bellucci), cgnusùda in tut al paéś cuma “Malèna”. Chi lē l'è spuśàda ma adès la stà da par lē parchè sò marè 'l è partî p'r al frònt. Quànd la gira p'r al stradi, tut i óm i ś vòltan par tgnir-la 'd òć śbavōś mént'r al dóni spuśàdi i l'òdian parchè i gh'aṅ paùra che lē la pòsa purtàr-ag via i marè.

Un diségn dla Malèna

'L amōr che Renato al gh'à par la Malèna 'l è sćèt dabòṅ ma al n sà mia cuma far parchè 'l è tròp pìcul par cuntàr incòsa a la dóna ma briśa par tiràr-as na quàlc pugnéta pinsànd a lē. Un dè al gh tîṅ adrē e, rivâ a cà sua, al gh pòrta via na mudànda ch'l'éra stada stindùda in giardèṅ par sugàr-as.

A séguit ad soquànt petegulés catìṿ ch'a s sènt dir in gir in di sò cunfrònt, al pàdar dla Malèna al la manda via 'd cà par salvàr 'l unōr dla famìja. Ma 'l ròbi par lē i vàn'n incóra pèś quànd l'armàgn védva. Sénsa famìja e sénsa bèsi, lì lē la s cata in di guàj. La riva anc a tajàr-'s i sò lung cavìi négar par vénd'r-i e catàr sù quèl.

La mujér 'd un dentìsta la la manda a prucès dgénd ch'l'à fat adultèri anc s'a n è minga véra. La Malèna la vins la càuśa ma la vèṅ viulentàda pròpria p'r al sò avucàt, al dutōr Centorbi (Gilberto Idonea), che pò al la vrév anc spuśàr ma sò màdar la n è mia 'd acòrd sèg parchè la n vōl briśa na dunàsa e na rója, a sò dita, in famìja.

Culegamènt estéran